Amo. ITlaixpantijkauan Jehová amo kinmiluiaj oksekimej amo makinmotlalilikan vacunas. Yejuan kijtoua toselti tikpejpenaskej kox tikinmotlaliliskej vacunas noso amo. Miakej iTlaixpantijkauan Jehová kimotlaliliaj vacunas.

 Nochipa tikitaj tlen pajtli uelis techpaleuis uan tikpatioitaj nochi tlen kichiuaj tepajtijkej porque kitemouaj pajtli para amo okachi timokokoskej. Tikintlasojkamatiliaj nochtin akinmej tlapajtiaj porque mochijchikauaj techpaleuiskej ijkuak timokokouaj uan okachi tlapaleuiaj ijkuak miakej mokokouaj.

 ITlaixpantijkauan Jehová kitlakamatij tlen tekiuajkej tlanauatiaj para mamomaluikan. Ijkuak opejki kokolistli COVID-19, iTlaixpantijkauan Jehová miak uelta yokitlalijkej itech jw.org ken moneki momaluiskej uan okitlalijkej ika tlatlamantli tlajtolmej. Noijki momaluiaj ijkuak san sekan monechikouaj, ijkuak katej inkalijtik, amo monapalouaj, momajtekiaj uan kimotlaliliaj cubrebocas (Romanos 13:1, 2).

 Itech amatlajkuilolmej tlen kinchijchiuaj iTlaixpantijkauan Jehová kipia seki principios Bíblicos tlen techpaleuiaj:

•   Toselti tikpejpenaj ken timopajtiskej (Gálatas 6:5).

   “[Nin amatlajkuilol] amo kijtoua ken uelis timopajtis noso tlen pajtli okachi kuali. Kijtoua tlen kichiuaj sekimej pero toselti moneki tikpejpenaskej ken timopajtiskej” (¡Ma titlachixtokan!, 8 de febrero 1987).

   “San tejuatsin uan mokoneuan nankipejpenaskej kox nankiseliskej se vacuna noso amo” (¡Ma titlachixtokan!, 8 de diciembre 1965).

•   Ijkuak timokokouaj timopajtiaj porque tikpatioitaj tonemilis (Hechos 17:28).

   “ITlaixpantijkauan Jehová kitaj tlen pajtli uelis kinpaleuis ijkuak mokokouaj. Kipatioitaj innemilis ikinon kitemouaj ken mopajtiskej pero mochijchikauaj amo kixnamikiskej tlen kijtoua Biblia” (Akin Tetlapouijtok, 1 de mayo 1976).

   “Amo se tlajtlakoli tikitatiuij se tepajti para matechilui ken tikatej uan tlen uelis tikchiuaskej para amo timokokoskej. ITlaixpantijkauan Jehová uelis kiseliskej seki pajtli. Noijki sekimej tlapajtia ijkon ken Lucas akin okatka tepajti itech achto siglo[...]. Ikinon iTlaixpantijkauan Jehová noijki kinpatioitaj akinmej tlapajtiaj uan kintlasojkamatiliaj porque mochijchikauaj tlapaleuiskej” (Akin Tetlapouijtok, 1 de febrero 2011).