TiiTlaixpantijkauan Jehová tikneltokaj tlen tlamachtia Biblia uan tlanauatilmej tlen kinpia techpaleuiaj kuali matikpejpenakan tlen tikchiuaskej uan ijkon tikyolpaktiskej toTajtsin Dios (Isaías 48:17, 18). Amo tejuan otikintlalijkej ninmej tlanauatilmej, pero tikintlakamatij. Matikitakan tlen moneki kichiuaskej novios. a

•   Akinmej monamiktiaj moneki nochipa san sekan yetoskej(Mateo 19:6). Ijkuak sekimej peua moixmatij kijtosneki kinekij monamiktiskej. Ikinon amo san tikajauilmatij.

•   Tla ikaj ayamo kipia xiuitl para monamiktis, amo moneki peuas ikaj kixmatis. Ikaj uelis monamiktis tla yikipia xiuitl uan amo san kineki ikaj iuan motekas (1 Corintios 7:36).

•   Para ikaj monamiktis moneki yetos iselti. Tla ikaj san okinek okikajka isiua noso inamik inmixpan tekiuajkej, amo kijtosneki ixpan toTajtsin Dios uelis oksepa monamiktis. ToTajtsin Dios kijtoua uelis mokajkauaskej inmixpan tekiuajkej tla se omomekati (Mateo 19:9).

•   Akinmej kichiuaj ken Cristo moneki monamiktiskej san iuan akin noijki tlaneltoka ken yejuan (1 Corintios 7:39). ITlaixpantijkauan Jehová moneki kixmatiskej uan monamiktiskej san iuan akin noijki iTlaixpantijka Jehová uan yomoapolakti. Amo monamiktis iuan akin san kitlakaita tlen tikneltokaj (2 Corintios 6:14). ToTajtsin Dios nochipa kinmiluia itekipanojkauan mamonamiktikan san iuan akin tlaneltoka ken yejuan (Génesis 24:3; Malaquías 2:11). Noijki ixtlamatkej kijtouaj nin tlamantli kinpaleuia. b

•   Telpochmej uan ichpochmej moneki kintlakamatiskej intatajuan (Proverbios 1:8; Colosenses 3:20). Tla chantij iuan intatajuan moneki kintlakamatiskej tlen kinmiluiaj makichiuakan tla kinekij ikaj kixmatiskej. Nin kijtosneki kintlakamatiskej ijkuak kinmiluiaj keman uelis ikaj kixmatiskej uan tlen uelis kichiuaskej.

•   Biblia kijtoua tinochtin moneki tikitaskej tlen tikchiuaskej (Gálatas 6:5). Ikinon tiiTlaixpantijkauan Jehová uelis tikpejpenaskej keman uan kox tiknekij ikaj tikixmatiskej, pero moneki tikchiuaskej ijkon ken kijtoua Biblia. Miakej motlapouiaj inmiuan oksekimej iTlaixpantijkauan Jehová tlen kuali iuan mouikaj uan ixtlamatkej, porque yejuan kinekij kuali mayetokan (Proverbios 1:5).

•   Miakej ijkuak mochiuaj novios ualeua tlajtlakolchiuaj. Biblia kijtoua amo kuali matiauilnemikan. Nin amo san kijtosneki ijkuak motekaj uan ayamo monamiktiaj, noijki ijkuak momajmachiliaj, kichiuaj sexo oral, sexo anal, noso okseki tlamantli ken nin (1 Corintios 6:9-11). Tla mopipitsouaj uan momajmachiliaj hasta kinekiskej motekaskej, maski amo motekaskej, kichiuaj itlaj pitsotik tlen kikualania toTajtsin Dios (Gálatas 5:19-21). Uan Biblia noijki kijtoua amo kuali tikmoluiskej tlen pitsotik (Colosenses 3:8).

•   Toyolo sapanoua tekajkayaua (Jeremías 17:9). Kichiua ikaj matlajtlakolchiua maski kimatok amo kuali. Tla amo kinekij tlajtlakolchiuaskej, akinmej novios amo mayetokan inselti. Tla yauij iuan oksekimej ijkuak paxialotiuij noso ikaj inmiuan yaui amo kichiuaskej tlen amo kuali (Proverbios 28:26). Akin kichiua ken Cristo uan ayamo monamiktia kimatok amo uelis kitemos ikaj itech Internet, non uelis kichiuias matlajyoui porque amo kixmati (Salmo 26:4).