TiiTlaixpantijkauan Jehová tiktlakaitaj nochi tlen kijtouaj ixtlamatkej uan tikseliaj tla melauak tlen kijtouaj.

 Se diccionario kijtoua ciencia kijtosneki, “tlen kimatij ixtlamatkej kikixtiaj itech tlen onka, kitemouaj ken chijchitok nochi tlen onka uan momachtiaj non tlamantli” (Clave. Diccionario de uso del español actual). Biblia amo kijtoua tlen kimatij ixtlamatkej. Pero kijtoua seki tlamantli tlen techpaleuia matimomachtikan nochi tlen onka uan matimopaleuikan ika tlen kijtouaj ixtlamatkej. Matikitakan seki tlamantli:

•   Nochi tlen onka iluikak: “Xiajkotlachiakan iluikak uan xikitakan. ¿Akin okichijchi nochi non tlamantli? Ye kinyekana ken ijkuak ikaj kinyekana miakej soldados uan nochi kinnotsa ika intoka” (Isaías 40:26).

•   Nochi tlen onka tlaltikpak: Salomón “otlajto itech kuajyo, itech cedro tlen kajki Líbano uan hisopo tlen moskaltia itech tepamitl uan noijki otlajto itech yolkamej, totomej, yolkamej tlen motilanaj uan michimej” (1 Reyes 4:33).

•   Pajtli: “N tlakah chikawakeh amo kimotlakewiah se tlapajti, yej non kokoxkeh” (Lucas 5:31).

•   Ken tlakajki: “¿Yotikalaki kanin monechikoua setl noso yotikitak kanin monechikoua tesiuitl [...]? ¿Kanin peua moxitinia ejekatl ipan nochi tlaltikpak tlen uits ik kanin kisa tonaltsin?” (Job 38:22-24).

 Itech amatlajkuilolmej tlen tikinpiaj tikteititiaj tiktlakaitaj tlen kimatij ixtlamatkej porque ualeua ompa kijtoua seki tlamantli tlen onka uan tiktekitiltiaj seki tlamantli tlen yejuan yokimatkej. Noijki tiiTlaixpantijkauan Jehová tikinmiluiaj tokoneuan kuali mamomachtikan uan ijkon kajsikamatiskej nochi tlen onka. Sekimej iTlaixpantijkauan Jehová tekipanouaj itech bioquímica, matemáticas uan física.

 Tejuan amo tikneltokaj ixtlamatkej technankiliskej nochi tlen timotlajtlaniaj. a Ixtlamatkej kitaj ken chijchitok tlaltikpak uan uelis techiluiskej tlen ika chijchitok. Noijki kitaj ken chijchitok tocuerpo uan techiluiaj ken tekiti nochi tlen tikpiaj. Pero ¿tleka tlaltikpak kuali chijchitok para ipan matichantikan? Uan ¿tleka tocuerpo nochi kuali chijchitok?

 Tejuan tikneltokaj san Biblia kuali technankilis (Salmo 139:13-16; Isaías 45:18). Ikinon tla tiknekij kuali timomachtiskej, moneki tikmatiskej tlen kijtouaj ixtlamatkej uan tlen tlamachtia Biblia.

 Ualeua xamo miakej kijtouaj motlajtolnamiki tlen kijtoua Biblia uan tlen kijtouaj ixtlamatkej. Ijkon panoua porque amo kuali kajsikamatij tlen kijtoua Biblia. Matikitakan tleka ijkon tikijtouaj. Biblia amo kijtoua tlaltikpak okichijchijkej itech chikuase tonal tlen kipia veinticuatro horas (Génesis 1:1; 2:4).

 Seki tlamantli tlen kimatij ixtlamatkej amo kiteititia melauak tlen kijtouaj uan oksekimej ixtlamatkej amo kiseliaj. Matikitakan tleka ijkon tikijtouaj. Ijkuak sekimej ixtlamatkej tlen kimatij biología, química uan oksekimej kitaj ken chijchitok nochi tlen onka, kijtouaj nochi tlen onka amo omochijchijtia ijkon ken opanotia xiuitl. Tejuan noijki ijkon timokuayejyekouaj.