TiiTlaixpantijkauan Jehová timochijchikauaj tikchiuaskej ken Jesús otlamachti ijkon ken okichijkej iapóstoles. Itech nin tlamachtil tikitaskej seki tlamantli tlen tikneltokaj.

1.   ToTajtsin Dios. Tikueyichiuaj akin melauak toTajtsin Dios, akin sapanoua Ueyititok uan akin okichijchi nochi tlen onka, ye itoka Jehová (Salmo 83:18; Apocalipsis 4:​11). Ye iDios Abrahán, Moisés uan Jesús (Éxodo 3:6; 32:11; Juan 20:17).

2.   Biblia. Tikneltokaj toTajtsin Dios techtlapouia ika Biblia (Juan 17:17; 2 Timoteo 3:​16). Tlen tikneltokaj kisa itech 66 amochmej, ninmej amochmej moixmatij ken Antiguo uan Nuevo Testamento. Se ixtlamatki tlen itoka Jason D. BeDuhn, okijto tlen iTlaixpantijkauan Jehová “kineltokaj uan tlen kichiuaj kisa itech Biblia, kitekitiltiaj uan amo kipatlaj tlen ompa ijkuilitok”. a

    Maski tikseliaj nochi tlen kijtoua Biblia, amo nochtin tlapoualismej tlen itech tikajsij itlaj kineskayotiaj, ikinon amo tiktemouaj tlen kijtosneki sejse tlajtoli tlen ijkuilitok itech Biblia (Apocalipsis 1:1).

3.   Jesús. Tikchiuaj ken Jesucristo uan tikchiuaj ijkon ken otlamachti uan tiktlakaitaj porque ye “Totemakixti” uan iKone toTajtsin Dios (Mateo 20:28; Hechos 5:​31). Non kiteititia tejuan tikchiuaj ken Cristo (Hechos 11:26). Pero Biblia amo kiteititia Jesús ye toTajtsin Dios akin kipia nochi chikaualistli uan amo kijtoua kajki se Trinidad (Juan 14:28).

4.   ITekiuajkayo toTajtsin Dios. Nin se Tekiuajkayotl tlen kajki iluikak uan amitlaj tlen kajki itech inyolo akinmej kichiuaj ken Cristo. Kinpojpolos nochtin tekiuajkej uan kichiuas tlen kineki toTajtsin Dios itech Tlaltikpak (Daniel 2:​44; Mateo 6:​9, 10). Ayakmo miak poliui uan mochiuas nochi nin, porque nochi tlen Biblia kijtoua panoskia yimochijtok, non kiteititia tikatej itlamian tonalmej (2 Timoteo 3:​1-5; Mateo 24:​3-​14, TNM).

    Jesús ueyi tekiua itech iTekiuajkayo toTajtsin Dios. Opejki tlanauatia itech xiuitl 1914 (Apocalipsis 11:15).

5.   Otechmakixtijkej. Jesús omikik topatka, ikinon uelis nochipa tiyoltoskej uan ayakmo tikpiaskej tlajtlakoli (Mateo 20:28; Hechos 4:12). Tla tiknekij timopaleuiskej ika imikilis, moneki tikneltokaskej Jesús, tikpatlaskej tonemilis uan timoapolaktiskej (Mateo 28:19, 20; Juan 3:16; Hechos 3:19, 20). Tlen tikchiuaj kiteititia kox melauak titlaneltokaj (Santiago 2:24, 26). Maski amo technamiki matechmakixti toTajtsin Dios, ye techmakas tlamantli kuali tlen amo technamiki tikpiaskej (Gálatas 2:16, 21, TNM).

6.   Iluikak. Jehová, Jesucristo uan ángeles tlen yolmelauakej chantij itech iluikak, kanin katej espíritus (Salmo 103:19-​21; Hechos 7:​55). b Akinmej pouij itech 144,000, kinyolitiskej para mayetokan iluikak uan tlanauatiskej iuan Jesús itech Tekiuajkayotl (Daniel 7:​27; 2 Timoteo 2:​12; Apocalipsis 5:​9, 10; 14:​1, 3).

7.   Tlaltikpak. ToTajtsin Dios okichijchi tlaltikpak para nochipa itech matichantikan (Salmo 104:5; 115:16; Eclesiastés 1:4). ToTajtsin Dios kichiuas akinmej kitlakamatij ayakmo mamokokokan uan mayetokan nochipa itech se xochitlali (Salmo 37:11, 34).

8.   Tlen amo kuali uan tlajyouilistli. Biblia kiyekijtoua se ángel okixnamik toTajtsin Dios. Ijkon opejki nochi tlen amo kuali uan tlajyouilistli (Juan 8:44). Nin ángel, tlen satepan omoixmatki ken Diablo uan Satanás, okikajkaya Adán uan Eva porque okinekiaya makipaleuikan. Tlen okichijkej sapanoua amo kuali uan tinochtin techtlajyouiltia (Génesis 3:1-6; Romanos 5:12). ToTajtsin Dios okitekauili mayeto tlen amo kuali uan tlajyouilistli para ijkon moteititis amo melauak tlen okijto Satanás, pero amo kikauas nochipa mayeto tlen amo kuali.

9.   Mikilistli. Ijkuak ikaj ixpoliui ayakmo itlaj mokaua tlen ok yoltok (Salmo 146:4; Eclesiastés 9:5, 10). Akinmej yoixpolikej amo tlajyouijtokej ijtik tlitl.

    ToTajtsin Dios sapanoua miakej kinyolitis (Hechos 24:15). Pero akinmej amo kinekiskej kitlakamatiskej toTajtsin Dios, sepa kinmixpoloskej uan ayakmo keman kinyolitiskej (Apocalipsis 20:14, 15).

10.   Familia. San uelis monamiktiskej se tlakatl uan se siuatl porque ijkon okitlali toTajtsin Dios. San uelis mokajkauaskej ixpan tekiuajkej tla ikaj auilnemi (Mateo 19:4-9). Kuali tikmatokej tlen kijtoua Biblia melauak kuali uan kinpaleuia familias mayolpakikan (Efesios 5:22-6:1).

11.   ¿Ken tikueyichiuaj toTajtsin Dios? Amo tikueyichiuaj cruz nion se imagen (Deuteronomio 4:​15-​19; 1 Juan 5:​21). Tikchiuaj nin tlamantli:

    •   Tiktlatlaujtiaj toTajtsin Dios (Filipenses 4:6).

    •   Tiktlajtoltiaj uan timomachtiaj Biblia (Salmo 1:​1-3).

    •   Timokuayejyekouaj tlen timomachtiaj itech Biblia (Salmo 77:12).

    •   Timonechikouaj uan ompa timotlatlaujtiaj, timomachtiaj Biblia, titlakuikaj, tikijtouaj tlen otimomachtijkej uan timoyolchikauaj (Colosenses 3:16; Hebreos 10:23-25).

    •   Titetlapouiaj “kuali tlajtolmej itech Tekiuajkayotl” (Mateo 24:14, TNM).

    •   Tikinpaleuiaj akinmej amitlaj kipiaj (Santiago 2:​14-​17).

    •   Tikinchijchiuaj uan tikinmaluiaj kalmej kanin timonechikouaj uan noijki okseki kalmej kanin titekitij para titlamachtiskej ika Biblia itech nochi tlaltikpak (Salmo 127:1).

    •   Titlapaleuiaj ijkuak panoua se tlaxixinilistli (Hechos 11:27-​30).

12.   Ialtepe toTajtsin Dios. Tikinpiaj tlanechikolmej. Itech sejse tlanechikol katej sekimej tlakamej tlen kintokayotiaj tlayekankej, non amo kijtosneki okachi inpati ken oksekimej nion amo kintlaxtlauiaj (Mateo 10:8; 23:8). Amo tiktemakaj diezmo nion tiktlajtlanij tomin (2 Corintios 9:7). Tekitl tlen tikchiuaj motlaxtlaua ika tomin tlen kitemakaj oksekimej ika nochi inyolo uan amikaj ikaj kimati akin kitemaka.

     Sekimej tlakamej tlen kipiaj miak ixtlamatilistli, kinmixmatij ken Cuerpo Gobernante, yejuan kiyekanaj tekitl tlen kichiuaj iTlaixpantijkauan Jehová itech nochi Tlaltikpak (Mateo 24:45).

13.   San sekan titekitij. Maski tlatlamantli altepetl kanin tichantij, tinochtin san se tlamantli tikneltokaj (1 Corintios 1:​10). Timochijchikauaj amo tikinchikoitaskej oksekimej (Hechos 10:34, 35; Santiago 2:4). Maski timopaleuiaj amo tikinmiluiaj oksekimej tlen moneki kichiuaskej, sejse iTlaixpantijka Jehová kipejpena tlen kichiuas ijkon ken kijtoua Biblia (Romanos 14:​1-4; Hebreos 5:​14).

14.   Tonemilis. Timochijchikauaj timotlasojtlaskej (Juan 13:34, 35). Timochijchikauaj amo tikchiuaskej itlaj tlen amo kipaktia toTajtsin Dios. Ikinon amo tikmotlaliliaj nion tikkuaj estli (Hechos 15:28, 29; Gálatas 5:​19-​21). Amo timokualaniaj inmiuan oksekimej nion timokajkalakiaj itech guerras (Mateo 5:9; Isaías 2:4). Tikintlakaitaj tekiuajkej uan tikintlakamatij pero tla techiluiaj matikchiuakan tlen amo kipaktia toTajtsin Dios amo tikchiuaj (Mateo 22:21; Hechos 5:​29).

15.   Timouikaj inmiuan oksekimej. Jesús okijto: “Xiktlasojtla mokni kemi te timotlasojtla”. Noijki okijto akinmej okichiuayaj ken Cristo “yejwah noiwa ayakmó de nin tlaltíkpaktli” (Mateo 22:39; Juan 17:16). Ikinon timochijchikauaj tikinchiuiliskej nochtin tlen kuali, pero amo timokajkalakiaj itech política uan amo titekitij inmiuan oksekimej religiones (Gálatas 6:​10; 2 Corintios 6:​14). Pero tiktlakaitaj tlen kipejpenaj kichiuaskej oksekimej itech non tlamantli (Romanos 14:12).

 Tla tikneki tikmatis okachi itech tlen tikneltokaj, uelis tikajsis okseki tlamantli itech página tlen tikpiaj itech Internet. Noijki uelis titlanotsas kanin titekitij, uelis tias kanin timonechikouaj ik kanin tichanti noso uelis timotlapouis iuan se iTlaixpantijka Jehová.