1-6. Yiziphi izimo oFakazi bakaJehova abatshumayela kuzo?

 UDADEWETHU osakhulayo okuthiwa nguRebecca odabuka eGhana, uthi insimu yakhe ngabantu afunda labo esikolo. Kawatshiyi amabhuku esiwasebenzisa ekutshumayeleni nxa esiya esikolo. Ngesikhathi sekhefu uRebecca uyadinga abanye abantwana angabatshumayeza futhi banengi asefunda labo iBhayibhili eklasini yakhe.

² Amaphayona amabili ahlala esihlengeni okuthiwa yiMadagascar empumalanga ye-Africa ajayele ukuhamba umango ongaba ngamakhilomitha angu-25 esiyatshumayela ilanga litshisa bhe! Amaphayona la afunda iBhayibhili labantu abanengi endaweni le.

³ OFakazi beParaguay labanye abavela emazweni angu-15 bazenzela isikepe ukuze basisebenzise nxa besiyatshumayeza abantu abahlala eduze kwemifula uParaguay loParana. Isikepe lesi singumahamba lendlwana futhi singahlala abantu abangu-12, njalo silesisindo esingamakhilogremu angu-45 000. Isikepe lesi singumuzi wabo nxa bephakathi kohambo futhi sincede abamemezeli laba abatshisekayo ukuthi batshumayele izindaba ezinhle endaweni okwakungelandlela yokufika kuzo.

⁴ Emangweni we-Alaska eMelika abafowethu labodadewethu balethuba elihle lokutshumayela ngesikhathi sehlobo ngoba kuyabe kulezivakatshi ezinengi ezivela kwamanye amazwe. Kuba lezikepe ezinengi ezivela kwamanye amazwe ezifika endaweni le zithwele izivakatshi. OFakazi abahlala endaweni le bahle bazihlangabeze ngezindaba ezinhle besebenzisa izinqola ezilamabhuku abhalwe ngendimi ezitshiyeneyo. Endaweni efananayo abanye abamemezeli bahamba ngendizamtshina ukuze bayefika endaweni ezikhatshana kakhulu. Lokhu kuncede ukuthi izindaba ezinhle zitshunyayelwe ebantwini abahlala e-Aleut, e-Athabascan, e-Tsimshian laseTlingit.

⁵ Umzalwane okuthiwa nguLarry ohlala eTexas eMelika utshumayela endaweni ahlala kuyo lapho okugcinwa khona abantu abadinga ukunakekelwa nsuku zonke. Kayekeli ukutshumayela lanxa wehlelwa yingozi eyamtshiya esehamba ngewilitsheya. Uqhubeka exoxela abanye izindaba zoMbuso ezigoqela lethemba alalo lokuthi nxa sokubusa uMbuso kaNkulunkulu uzaphinda ahambe futhi.—Isaya. 35:5, 6.

 ⁶ Abanye oFakazi bake bathatha uhambo lwamalanga amathathu ngesikepe besuka eMandalay ukuze bayengena umhlangano enyakatho yeMyanmar. Abafowethu labodadewethu laba bathwala amabhuku okutshumayela ngoba babezimisele ukutshumayeza abanye abantu ababehamba labo ngesikepe. Kwakusithi nxa isikepe singama edolobheni loba kwenye indawo, abamemezeli laba babephanga behle esikepeni bayetshumayeza abantu abahlala lapho. Ngesikhathi esifananayo kwakusiba labantu ababegada isikepe futhi babesiba yinsimu entsha yabamemezeli laba.

7. Yiziphi indlela oFakazi bakaJehova abazisebenzisayo ukuze bafakaze ngoMbuso kaNkulunkulu, futhi inhloso yabo ngeyani?

⁷ Izibonelo lezi zitshengisa ukuthi oFakazi bakaJehova emhlabeni wonke ‘bafakaza ngokugcweleyo ngoMbuso kaNkulunkulu.’ (Imiseb. 28:23) Batshumayela endlini ngendlu, baxoxa labantu emgwaqweni futhi bayatshumayela langamafoni. Bahlala bezimisele ukutshumayela ngoMbuso kaNkulunkulu kungelani lokuthi basemabhasini, emaphakhi kumbe bathethe ikhefu emsebenzini. Lanxa indlela esizisebenzisayo zitshiyene inhloso yethu yinye, ngeyokutshumayela izindaba ezinhle loba ngaphi lapho okulabantu khona.—Mat. 10:11.

8, 9. (a) Kuyini okumangalisayo ngomsebenzi wokutshumayela? (b) Yiwuphi umbuzo esingazibuza wona futhi kumele senzeni ukuze sithole impendulo yawo?

⁸ Sithemba lawe ungomunye wabamemezeli boMbuso abatshumayela emazweni adlula 235. Nxa kunjalo, wenza umsebenzi omuhle kakhulu onceda ukuthi umsebenzi wokutshumayela izindaba ezinhle uqhubekele phambili. Indlela umsebenzi lo ophumelela ngayo emhlabeni wonke iyamangalisa. Lanxa inhlupho zibuya zelekene kungaba yikuvinjelwa ngohulumende kumbe ukuhlukuluzwa, oFakazi bakaJehova abapheli amandla. Baqhubekela phambili ngokufakaza ngokugcweleyo ngoMbuso kaNkulunkulu ebantwini bezizwe zonke.

⁹ Kodwa kungani inhlupho ezisehlelayo kanye lokuphikiswa nguSathane kungenelisi ukuvimba umsebenzi wokutshumayela ngoMbuso? Okungasinceda ukuthi siwuphendule umbuzo lo yikuhlola okwenzakala ngesikhathi samaKhristu akuqala. Phela yiwo aqalisa umsebenzi wokutshumayela owenziwa ngoFakazi bakaJehova lamuhla.

10. Yiwuphi umsebenzi uJesu ayewukhuthalele njalo kuyini ayekwazi ngawo?

¹⁰ UJesu Khristu nguye owasungula ibandla lamaKhristu. Wayekukhuthalele ukutshumayela izindaba ezinhle zoMbuso, ephilela wona umsebenzi lo. Ngelinye ilanga wathi: “Kufanele ngitshumayele izindaba ezinhle zoMbuso kaNkulunkulu lakwamanye amadolobho ngoba yikho engathunywa ukuzokwenza.” (Luk. 4:43) UJesu wayekwazi ukuthi wayengasoze awuqede eyedwa umsebenzi ayesewuqalisile. Esezakufa wathi izindaba ezinhle zoMbuso zazizatshunyayelwa “ezizweni zonke.” (Mak. 13:10) Manje wawuzakwenziwa njani umsebenzi lo futhi ngobani ababezawenza?

11. Yiwuphi umsebenzi oqakathekileyo uJesu awunika abalandeli bakhe njalo kuyini okwakuzabanceda ukuthi bawenze?

 ¹¹ UJesu wathi esevusiwe wabonakala kubafundi bakhe wabanika umlayo oqakathekileyo wathi: “Hambani liyekwenza abantu bezizwe zonke babe ngabafundi, libabhabhathize ebizweni likaBaba leleNdodana lelomoya ongcwele, libafundise ukulandela izinto zonke engilitshele zona. Hlalani likhumbula ukuthi ngizabe ngilani kuze kube yisiphetho somumo lo wezinto.” (Mat. 28:19, 20) Amazwi athi “ngizabe ngilani” atshengisa ukuthi uJesu wayezabasekela abalandeli bakhe emsebenzini wokutshumayela lowokwenza abantu babe ngabafundi. Kwakudingeka sibili ukuthi abasekele ngoba wayebatshele ukuthi ‘babezazondwa yizizwe zonke.’ (Mat. 24:9) Kodwa uJesu ayisuye yedwa owayezabasekela. Phela wathi esebuyela ezulwini wabatshela ukuthi babezakwamukela amandla nxa umoya ongcwele ufika kubo ukuze babengoFakazi “kuze kuyefika emaphethelweni omhlaba.”—Imiseb. 1:8.

12. Yiphi imibuzo esingazibuza yona futhi kungani kuqakathekile ukuthi sizazi impendulo zakhona?

¹² Abaphostoli bakaJesu lamanye amaKhristu akuqala bawuqakathekisa yini umsebenzi ababewuphiwe? Njengoba amaKhristu la ayehlukuluzwa kabuhlungu, enelisa yini ukufakaza ngokugcweleyo ngoMbuso kaNkulunkulu? UJehova loJesu bawasekela yini emsebenzini lo? Awuthola yini umoya ongcwele ayewuthenjisiwe? Imibuzo le leminye eminengi iyaphendulwa ebhukwini lemiSebenzi. Kuqakathekile ukuthi sithole izimpendulo zemibuzo le. Ngenxa yani? Ngoba uJesu wathi umsebenzi wokutshumayela wawuzaqhubeka usenziwa “kuze kube yisiphetho somumo lo wezinto.” Kuyacaca ukuthi umsebenzi lo kumele wenziwe yiwo wonke amaKhristu eqiniso kugoqela lathi esiphila kulezinsuku zokucina. Yikho kuqakathekile ukuthi silizwisise ibhuku lemiSebenzi.

13, 14. (a) Ngubani owabhala ibhuku lemiSebenzi futhi akubhalayo wakuthola njani? (b) Ibhuku lemiSebenzi likhuluma ngani?

¹³ Ngubani owabhala ibhuku lemiSebenzi? Lanxa ibhuku leli lingamqambi umlobi walo, amazwi alo okuvula enza kucace ukuthi umlobi walo nguye owabhala iVangeli likaLukha. (Luk. 1:1-4; Imiseb. 1:1, 2) Kusukela kudala bekusaziwa ukuthi ibhuku lemiSebenzi labhalwa nguLukha owayengumlobi wezembali owayeyingcitshi njalo ‘engudokotela othandekayo.’ (Kol. 4:14) Ibhuku leli lilandisa izinto ezenzakala phakathi kweminyaka engaba ngu-28, kusukela ngesikhathi uJesu ebuyela ezulwini ngomnyaka ka-33 C.E. kuze kuyefika lapho umphostoli uPhawuli evalelwa ejele eRoma ngabo-61 C.E. Indlela uLukha abhala ngayo itshengisa ukuthi laye wayekhona ngesikhathi okunengi alandisa ngakho kusenzakala. (Imiseb. 16:8-10; 20:5; 27:1) ULukha wayekuhlolisisa konke ayekubhala futhi kumele ukuthi okunye kwakhona wakuthola kuPhawuli loBhanabha loFiliphu kanye labanye okukhulunywa ngabo ebhukwini leli.

¹⁴ Limumetheni ibhuku lemiSebenzi? Ngesikhathi uLukha ebhala iVangeli lakhe walandisa izinto ezakhulunywa lezenziwa nguJesu kodwa ebhukwini lemiSebenzi  walandisa lokho okwakhulunywa lokwenziwa ngabalandeli bakaJesu. Ibhuku lemiSebenzi likhuluma ngabantu ababesenza umsebenzi omangalisayo lanxa abanengi babo babekhangelelwa phansi ngabantu abanengi emphakathini besithi ‘ngabantukazana abangafundanga.’ (Imiseb. 4:13) Ngamafitshane singathi ibhuku lemiSebenzi lisitshela ngokusungulwa kwebandla lamaKhristu kanye lokukhula kwalo. Liyasitshengisa ukuthi amaKhristu akuqala ayewubona njani umsebenzi wokutshumayela lokuthi yiziphi izindlela ayezisebenzisa. (Imiseb. 4:31; 5:42) Liphinda litshengise ukuthi umoya ongcwele wawuwancedisa njani emsebenzini wokutshumayela izindaba ezinhle. (Imiseb. 8:29, 39, 40; 13:1-3; 16:6; 18:24, 25) Ibhuku lemiSebenzi liqhubeka ngendaba eyisiqokoqela eBhayibhilini emayelana loMbuso kaNkulunkulu leNkosi yawo uKhristu. Litshengisa lendlela umsebenzi wokutshumayela owaphumelela ngayo lanxa amaKhristu akuqala ayephikiswa kabuhlungu.—Imiseb. 8:12; 19:8; 28:30, 31.

15. Ukuhlolisisa ibhuku lemiSebenzi kuzasinceda njani?

¹⁵ Asithandabuzi ukuthi sizakukholisa kakhulu ukuhlola ibhuku lemiSebenzi futhi lizasiqinisa ukholo. Ukucabangisisa ngezibonelo zamaKhristu akuqala ayelesibindi kuzasinceda ukuthi siwukhuthalele umsebenzi wokutshumayela futhi silingisele ukholo lwawo. Ukwenza njalo kuzasenza siphumelele emsebenzini esiwuphathisiweyo ‘wokuhamba siyekwenza abantu babe ngabafundi.’ Ibhuku leli lenzelwe ukusinceda ukuthi silizwisise kuhle ibhuku lemiSebenzi.

16. Inhloso yebhuku leli ngeyani?

¹⁶ Ibhuku leli (1) lizakunceda ungathandabuzi ukuthi uJehova uyasincedisa ngomoya wakhe ongcwele emsebenzini wokutshumayela ngoMbuso lokwenza abantu babe ngabafundi, (2) lizakukhuthaza ukuthi ukhuthale emsebenzini wokutshumayela futhi (3) lizakunceda uyiqakathekise kakhulu inhlanganiso kaJehova njalo uhloniphe labo abakhokhela emabandleni lasemsebenzini wokutshumayela.

17, 18. Ibhuku leli lihlelwe njani futhi kuyini okukulo okuzakunceda nxa utaditsha?

¹⁷ Lihlelwe njani ibhuku leli? Lilengxenye ezingu-8 futhi ingxenye ngayinye ikhuluma ngokuthile esikuthola ebhukwini lemiSebenzi. Izahluko ezilandelayo zebhuku leli kazisoze zilandelele ivesi ngayinye yebhuku lemiSebenzi, kodwa zizakunceda uthole izifundo kulokho okulandiswa ebhukwini leli futhi ubone lokuthi ungakusebenzisa njani okufundayo. Ekuqaliseni kwesahluko ngasinye kulamazwi achasisa isihloko kanye lombhalo otshengisa ukuthi indaba esixoxa ngayo ithethwe kuwaphi amavesi ebhukwini lemiSebenzi.

¹⁸ Kulokunye ozakuthola ebhukwini leli okuzakunceda kakhulu nxa utaditsha. Uzathola imifanekiso emihle ezakunceda ukuthi ukubone ngelihlo lengqondo okwakusenzakala endabeni oyabe uyibala futhi ucabangisise ngayo. Ezahlukweni ezinengi kuyabe kulamabhokisi achasisa izinto ezitshiyeneyo ezizakunceda. Amanye amabhokisi ayabe ekhuluma ngabantu okukhulunywa  ngabo eBhayibhilini ababelokholo oluqinileyo esingabalingisela. Amanye achasisa okunengi ngezindawo, izinto ezazisenzakala, amasiko kanye labanye abantu nje okukhulunywa ngabo ebhukwini lemiSebenzi. Indawo engabhalwanga lutho eseceleni kwezindima ngeyokubhala imicijo oyitholileyo.

19. Kuyini okumele ngamunye wethu akwenze?

¹⁹ Ibhuku leli lingakunceda ukuthi uzihlole. Kungelani lokuthi usulesikhathi esinganani ungummemezeli woMbuso, kuhle ukuthi uhlale uzihlola ukuze ubone ukuthi kuyini osukuqakathekisa kakhulu empilweni lokuthi ulokhe ukhuthele yini emsebenzini wokutshumayela. (2 Khor. 13:5) Zibuze: ‘Indlela engitshumayela ngayo iyatshengisa yini ukuthi ngiyazwisisa ukuthi isikhathi esiseleyo sesisincane? (1 Khor. 7:29-31) Ngiyatshiseka yini emsebenzini wokutshumayela njalo ngiyaqiniseka yini ukuthi engikufundisa abanye kuliqiniso? (1 Thes. 1:5, 6) Ngiyawasebenzisa yini wonke amathuba engiwatholayo ukuze ngenze umsebenzi wokutshumayela lowokwenza abantu babe ngabafundi?’—Kol. 3:23.

20, 21. Kungani kumele umsebenzi wokutshumayela wenziwe ngokuphangisa njalo kuyini okumele sizimisele ukukwenza?

²⁰ Sonke asizimiseleni ukuhlala sikhumbula ukuthi siphiwe umsebenzi oqakathekileyo wokutshumayela lowokwenza abantu babe ngabafundi. Nsuku zonke kumele sihlale sikhumbula ukuthi kufanele siwenze ngamandla umsebenzi lo. Phela ukuphela komumo lo wezinto kusondela ngesiqubu esikhulu. Impilo zabantu zilenge ngomnxeba, asikwazi ukuthi bangaki abantu abalenhliziyo eziqotho abazakwamukela izindaba ezinhle. (Imiseb. 13:48) Silomlandu wokubancedisa abantu abanjalo isikhathi singakapheli.—1 Thim. 4:16.

²¹ Ngakho kuqakatheke kakhulu ukuthi silingisele amaKhristu akuqala ayekhuthele emsebenzini wokutshumayela ngoMbuso. Sithemba ozakubala ebhukwini leli kuzakukhuthaza ukuthi uwukhuthalele umsebenzi wokutshumayela futhi ube lesibindi sokuwenza. Zimisele ukuqhubeka ‘ufakaza ngokugcweleyo ngoMbuso kaNkulunkulu.’—Imiseb. 28:23.