Kuwe Mmemezeli WoMbuso:

Akuzicabange lawe ungomunye wabaphostoli limi entabeni yama-oliva. Thutshu uJesu phambi kwenu futhi sekuseduze ukuthi aye ezulwini, abesesithi: “Lizakwamukela amandla nxa umoya ongcwele ufika kini njalo lizakuba ngofakazi bami eJerusalema lakulo lonke elaseJudiya leSamariya kuze kuyefika emaphethelweni omhlaba.” (Imiseb. 1:8) Ubuzakwenzani usizwa amazwi la?

Engxenye ubungazizwa uphela amandla ngoba lo akusimsebenzi wokudlala. Ubusuzibuza lokuthi, ‘Kambe singawenelisa yini umsebenzi wokufakaza “kuze kuyefika emaphethelweni omhlaba” thina sibalutshwana kangaka?’ Mhlawumbe usukhumbula lamazwi uJesu awakhuluma esezabulawa athi: “Inceku kayinkulu kulenkosi yayo. Nxa bengihlukuluzile lani bazalihlukuluza, nxa belalele ilizwi lami bazalilalela lelenu. Bazalenza zonke izinto lezi ngenxa yebizo lami ngoba abamazi lowo ongithumileyo.” (Joh. 15:20, 21) Uthi usacabanga ngamazwi la ubusifikelwa ngumbuzo othi, ‘Pho ngingenelisa yini ukufakaza ngokugcweleyo ngapha ngiphikiswa futhi ngihlukuluzwa?’

Lathi oFakazi bakaJehova siyazibuza imibuzo efananayo. Siphathiswe umsebenzi wokufakaza ngokugcweleyo “kuze kuyefika emaphethelweni omhlaba,” ‘ebantwini bezizwe zonke.’ (Mat. 28:19, 20) Manje singawenza njani umsebenzi lo thina siphikiswa?

Ibhuku lemiSebenzi lilandisa indaba evusa usinga etshengisa indlela uJehova ancedisa ngayo abaphostoli labazalwane ababekhona ngalesosikhathi ukuthi bawenze kuhle umsebenzi wokutshumayela. Ibhuku leli olibalayo khathesi lizakunceda uzwisise okusebhukwini lemiSebenzi futhi ukholise ukuzwa indaba ezilotshwe kulo. Ukubona ukuhambelana okukhona phakathi kwalokho esikwenzayo lamuhla lalokho okwakusenziwa ngamaKhristu akuqala kuzakutshiya ubambe owangaphansi. Ukuhambelana lokhu akupheleli emsebenzini esiwenzayo kuphela kodwa kutshengisa lendlela esihlela ngayo izinto ukuze siwenze lumsebenzi. Ukucabangisisa ngakho konke lokhu kuzakutshiya ungathandabuzi ukuthi uJehova uNkulunkulu ulokhu eyiqondisa ingxenye esemhlabeni yenhlanganiso yakhe.

Sithandazela ukuthi indaba ozazibala ebhukwini lemiSebenzi zikuncede ukholwe sibili ukuthi uJehova uzakuncedisa futhi akusekele ngomoya ongcwele. Kwangathi ungazimisela ukuqhubeka ‘ufakaza ngokugcweleyo’ ngoMbuso kaNkulunkulu njalo uncedisa abanye ukuthi bangene endleleni yokuphila ezabenza basindiswe.—Imiseb. 28:23; 1 Thim. 4:16.