1, 2. Izinhlupho ezehlela abatshadileyo zitsho ukuthi sebeyehlulekile yini? Chasisa.

UMTSHADO wasungulwa nguJehova njalo ungenza abantu bathokoze. Lanxa kunjalo, abantu abatshadileyo behlelwa zinhlupho futhi kwezinye izikhathi kungakhanya angani kazipheli. Lokhu kungenza abatshadileyo bengasathandani ngendlela ababethandana ngayo.

² Abatshadileyo akumelanga bamangale nxa besehlelwa zinhlupho. Inhlupho lezo kazitsho ukuthi sebeyehlulekile emtshadweni wabo. Lokhu kungenxa yokuthi bakhona abatshadileyo abake baba lenhlupho ezinkulu kakhulu kodwa bazilungisa njalo baqinisa lobuhlobo babo. Kuyini okungakusiza ukuthi uqinise umtshado wakho?

3, 4. Kuyini okungenzakala ebantwini abatshadileyo?

³ Umtshado uhlanganisa abantu ababili abatshiyeneyo, abathanda izinto ezehlukeneyo njalo  abenza izinto ngendlela engafananiyo. Bangabe bekhuliswe ngendlela etshiyeneyo futhi belamasiko angafananiyo. Kuthatha isikhathi ukuthi abantu laba bazwisisane.

⁴ Kwezinye izikhathi bangakhathazeka kakhulu ngenhlupho abalazo baze bacine bengasazwanani. Kodwa kuyini okungabasiza ukuthi basondelelane?

5. (a) Ngubani ongasiza abatshadileyo ukuthi basondelelane? (b) UHebheru 13:4 uthini ngomtshado?

⁵ UJehova uyabasiza abatshadileyo ukuthi basondelelane njalo bamthande. (IHubo 25:4; U-Isaya 48:17, 18) IBhayibhili lithi: “Ukuthathana kumele kuhlonitshwe ngumuntu wonke.” (KumaHebheru  13:4) UJehova ufuna siwuhloniphe umtshado njalo siwuqakathekise ngoba uligugu.

6. UMathewu 19:4-6 usitshela ukuthi uJehova wayehloseni ngomtshado?

⁶ UJesu wathi: “Kalikubalanga yini ukuthi ekuqaleni uMdali ‘wabenza baba yisilisa lesifazana,’ wathi, ‘Ngalesi isizatho indoda izatshiya uyise lonina ihlanganiswe lomkayo kuthi laba ababili bazakuba yinyamanye?’ Ngakho kabasebabili, kodwa sebemunye. Ngakho lokho uNkulunkulu asekuhlanganisile akungehlukaniswa muntu.” (UMathewu 19:4-6) UJehova wayefuna abantu abatshadileyo bahlale ndawonye, basondelelane, bathokoze njalo bangehlukani.

7. Kuyini okungasiza abatshadileyo ukuthi baqinise umtshado wabo?

⁷ Namuhla zinengi izinhlupho ezihlasela abatshadileyo. Kwezinye izikhathi bacina belahla ithemba ngoba bebona angani umtshado wabo ngeke usalungiseka. Kodwa iBhayibhili lingabasiza abatshadileyo.​—1 UJohane 5:3.

8, 9. (a) Kunini lapho okumele silalele khona uJehova? (b) Abatshadileyo bangatshengisa njani ukuthi umtshado wabo uligugu?

⁸ Konke uJehova asitshela khona kuyasinceda. Ngokwesibonelo, uthi: “Ukuthathana kumele kuhlonitshwe ngumuntu wonke.” (KumaHebheru 13:4; UmTshumayeli 5:4) Sizasizakala nxa singalalela uJehova ikakhulu nxa singaba phakathi kobunzima.​—1 KwabaseThesalonika 1:3; KumaHebheru 6:10.

 ⁹ Umtshado uligugu kakhulu, yikho labo abatshadileyo akumelanga benze loba yini ezawuphambanisa. Kumele bagcine umtshado wabo uqinile. Kodwa bangakwenza njani lokho?

10, 11. (a) Abanye abatshadileyo baba laziphi izinhlupho? (b) Kungani indlela abantu abatshadileyo abakhulumisana ngayo iqakathekile?

¹⁰ Zinengi izinto ezingazwisa lowo otshade laye ubuhlungu. AmaKhristu akumelanga atshaye omkabo kumbe abazwise ubuhlungu ngamazwi ngoba ayalimaza. Omunye owesifazana uthi: “Umkami ujayele ukungigwaza ngamazwi. Ngingabe ngingelamanxeba emzimbeni kodwa amazwi akhe anjengokuthi ‘Uyahlupha!’ kumbe ‘Awulancedo!’ aseyilimazile inhliziyo yami.” Eyinye indoda ithi umkayo wayejayele ukuyizwisa ubuhlungu ngamazwi akhe futhi embiza ngamabizo okumeyisa. Ithi: “Ngeke ngikhulume phakathi kwabantu izinto ajayele ukuzitsho. Yikho okwenza ngingakhulumi laye futhi ngiphuze ukufika endlini. Kungcono ukuhlala emsebenzini kulokuya endlini.” Abantu abanengi lamuhla bajayele ukukhuluma amazwi ahlabayo futhi azwisa abanye ubuhlungu.

¹¹ Amazwi anjalo athatha isikhathi ukuthi aphume enhliziyweni. UJehova kafuni ukuthi abantu abatshadileyo batshelane amazwi anjalo. Kodwa  kungenzakala ukuthi uzwise umkakho ubuhlungu ungananzeleli. Ungacabanga ukuthi umphatha kuhle umkakho kodwa umbuzo yikuthi yena ubona njalo yini? Uzimisele yini ukuntshintsha nxa kuyikuthi okuthile okukhulumileyo kuzwise umkakho ubuhlungu?​—UGalathiya 5:15; bala u-Efesu 4:31.

12. Kuyini okungenza umuntu otshadileyo angabi lobuhlobo obuhle loJehova?

¹² UJehova ulendaba lokuthi ukhuluma njani lomkakho kungelani lokuthi lisebantwini kumbe lilodwa. (Bala u-1 Phetro 3:7.) UJakhobe 1:26 uthi: “Uma umuntu ecabanga ukuthi  uyakholwa kodwa engabambi ulimi lwakhe okuqinileyo, uyazikhohlisa njalo lokholo lwakhe luyize.”

13. Yiphi eyinye indlela umuntu otshadileyo angazwisa ngayo umkakhe ubuhlungu?

¹³ Kulokunye njalo okumele kunanzelelwe ngabantu abatshadileyo. Ngokwesibonelo, ungezwa njani nxa umkakho angaqalisa ukuba lesikhathi esinengi lomunye umuntu? Kungakuzwisa ubuhlungu lanxa kuyikuthi bayabe bephuma bonke ekutshumayeleni kumbe emncedisa ngohlupho oluthile. Omunye udade uthi: “Kungizwisa ubuhlungu ukubona umkami eqeda isikhathi esinengi lomunye udade ebandleni. Kungenza ngizibone ngingaqakathekanga.”

14. (a) Sifundani kuGenesisi 2:24? (b) Kuyini okumele uzibuze khona?

¹⁴ Silomlandu wokunakekela abazali bethu kanye lalabo esikhonza labo. Kodwa nxa usutshadile, umuntu okumele umnakekele kakhulu ngotshade laye. UJehova wathi indoda ‘izamanyana lomkayo.’ (UGenesisi 2:24) Kumele uyiqakathekise indlela umkakho azizwa ngayo. Zibuze: ‘Ngiyasithola yini isikhathi sokuba lomkami? Ngiyamlalela yini?

15. Kungani kungamelanga usondelelane lomuntu ongatshadanga laye?

¹⁵ Umtshado wakho uzakuba lezinhlupho nxa ungasondelelana lomuntu ongatshadanga laye ngoba kungenza ucine usumthanda. (UMathewu 5:28) Lokho kungaba lesiphetho esibi.

16. IBhayibhili lithini ngomtshado?

¹⁶ IBhayibhili lithi “ukuthathana kumele kuhlonitshwe.” Liqhubeka lisithi ‘umbheda wokuthathana uhlale ungangcoliswanga, ngoba uNkulunkulu uzakwahlulela isifebe labo bonke abayiziphingi.’ (KumaHebheru 13:4) Evesini le ‘umbheda womtshado’ yikuhlangana emacansini kwendoda lomkayo. (IZaga 5:18) Kuyini esingakwenza ukuze singangcolisi umbheda womtshado?

17. (a) Abantu abanengi lamuhla bacabangani? (b) Uyini umbono wamaKhristu ngobufebe?

¹⁷ Abanye abantu bacabanga ukuthi akukubi ukungathembeki emuntwini otshade laye. Kodwa thina akumelanga sicabange njengabo. UJehova ukwenza kucace ukuthi uyakuzonda ukuxhwala kobufebe. (Bala uRoma 12:9; uHebheru 10:31; 12:29) Nxa singaya emacansini lomuntu esingatshadanga laye, siyabe singcolisa umbheda womtshado. Siyabe sitshengisa ukuthi asizihloniphi izimiso zikaJehova futhi lokhu kuzakwenza singabi lobuhlobo obuhle laye. Kumele sixwaye loba yini engenza siziphathe kubi kwezemacansini. Lokhu kugoqela ukucabanga ngokuya emacansini lomunye umuntu.​—UJobe 31:1.

18. (a) Ukufeba kufanana njani lokukhonza izithombe? (b) Uyini umbono kaJehova ngokufeba?

¹⁸ EMthethweni awunika uMosi uJehova waveza ukuthi ukufeba yisono njalo kubi njengokukhonza onkulunkulu bamanga. Umuntu owayesenza  izono lezi wayebulawa. (ULevi 20:2, 10) Ukufeba kwakufanana njani lokukhonza onkulunkulu bamanga? Nxa um-Israyeli wayengakhonza izithombe wayeyabe eyephule isithembiso sakhe sokuthembeka kuNkulunkulu. Kanti nxa wayengafeba wayeyabe eyephule isithembiso sokuthembeka kumkakhe. (U-Eksodusi 19:5, 6; UDutheronomi 5:9; bala uMalaki 2:14.) Kuyacaca-ke ukuthi ngesikhathi sama-Israyeli uJehova wayekubona kuyisono esikhulu ukufeba.

19. UJehova ufuna abatshadileyo benzeni?

¹⁹ Lanxa singasekho ngaphansi koMthetho kaMosi, uJehova ulokhe ekuzonda ukufeba. Ufuna labo abatshadileyo bahlale bethembekile kubomkabo. (IHubo 51:1,4; KwabaseKholose 3:5) Nxa umuntu otshadileyo angafeba uyabe engcolisa umtshado wakhe futhi ephambanisa ubuhlobo bakhe loJehova.​—Khangela Amabala Asekucineni 26.

20. Ukuhlakanipha kunceda njani emtshadweni?

²⁰ Kuyini okungenza umtshado wakho uqine? ILizwi likaNkulunkulu lithi: “Indlu yakhiwa ngokuhlakanipha, imiswe ngokuzwisisa.” (IZaga 24:3) Umuntu ohlakaniphileyo uyawuvikela umtshado wakhe njalo azame ukuwenza uthokozise.

21. Ukuba lolwazi kungalinceda njani emtshadweni?

²¹ IBhayibhili liqhubeka lisithi: “Amakamelo ayo agcwaliswe ngolwazi, agcwaliswe ngemiceciso yakude eligugu.” (IZaga 24:4) Ukulalela lokho okutshiwo  liBhayibhili kuzakwenza likholise emtshadweni. (KwabaseRoma 12:2; KwabaseFiliphi 1:9) Kumele libale ndawonye iBhayibhili kanye lamabhuku esiwanikwa yinhlanganiso futhi lixoxe ngokuthi lingakusebenzisa njani lokho elikufundayo. Kumele litshengise ukuthi liyathandana futhi liyahloniphana. Cela uJehova akuncedise ukuthi ube lobuntu obuhle obuzakwenza umkakho akuthande.​—IZaga 15:16, 17; 1 UPhetro 1:7.

22. Kungani kumele uthande futhi uhloniphe umkakho?

²² Kumele wenze konke okusemandleni akho ukuthi umthande futhi umhloniphe umkakho. Ungenza njalo umtshado wenu uzaqina futhi lizakwenza uJehova athokoze.​—IHubo 147:11; KwabaseRoma 12:10.