Izindaba ezinhle ezikhuluma ngokuthi abantu bazaphila emhlabeni kuze kube nini lanini zibhalwe eBhayibhilini. (IHubo 37:29) IBhayibhili lakhiwe ngamabhuku amancane angu-66. UNkulunkulu wasebenzisa amadoda aphose abe ngu-40 ukuthi abhale amabhuku la. Awokuqala amahlanu abhalwa nguMosi eminyakeni engaba ngu-3 500 eyadlulayo. Elokucina labhalwa ngumphostoli uJohane eminyakeni ephezu kwengu-1 900 eyadlulayo. Abalobi beBhayibhili babhala imicabango kabani? UNkulunkulu wayekhulumisana labo esebenzisa umoya wakhe ongcwele. (2 Samuyeli 23:2) Babhala imicabango kaNkulunkulu hatshi eyabo. Yikho-ke uJehova nguye uMlobi weBhayibhili.​—Bala u-2 Thimothi 3:16; u-2 Phetro 1:20, 21.

Bukela ividiyo ethi Ngubani UMlobi WeBhayibhili?

Siyakwazi ukuthi iBhayibhili livela kuNkulunkulu ngenxa yokuthi lisitshela okuliqiniso ngekusasa ngendlela ecacileyo. Akula muntu ongakwenza lokho. (Joshuwa 23:14) NguNkulunkulu uSomandla kuphela okwaziyo ukuthi ikusasa lisiphatheleni.​—Bala u-Isaya 42:9; 46:10.

Kumele singakhangelele ukuthi ibhuku elivela kuNkulunkulu lingafanani lamanye. Linjalo-ke iBhayibhili. Kuphrintwe amakhophi eBhayibhili ayizigidi zezigidi ngezindimi ezingamakhulu. Lanxa iBhayibhili lilidala, livumelana lesayensi. Abalobi balo abangu-40 babhala okuvumelanayo. * Okunye yikuthi iBhayibhili lilokhu lilamandla okuntshintsha impilo zabantu zibe ngcono futhi lisitshengisa ukuthi uNkulunkulu uyasithanda . Konke lokhu kwenza izigidi zabantu zivume ukuthi iBhayibhili yiLizwi likaNkulunkulu.​—Bala u-1 Thesalonika 2:13.

Bukela ividiyo ethi Singakwazi Njani Ukuthi IBhayibhili Lileqiniso?

IBhayibhili likhuluma kakhulu ngezindaba ezinhle eziphathelane lokuthi uNkulunkulu ulenjongo enhle ngabantu. IMibhalo ichasisa ngokuthi abantu balahla njani ithuba lokuphila epharadayisi elisemhlabeni ekuqaliseni kwembali yabantu lokuthi ipharadayisi lizabuyiselwa njani.​—Bala iSambulo 21:4, 5.

ILizwi likaNkulunkulu lilemithetho, izimiso lezeluleko. Okunye njalo okubhaliweyo eBhayibhilini yimbali emayelana lendlela uNkulunkulu aphatha ngayo abantu. Imbali le itshengisa ubuntu bukaNkulunkulu. Yikho-ke iBhayibhili lingakunceda ukuthi ubemazi uNkulunkulu. Lichasisa ukuthi ungaba njani ngumngane wakhe.​—Bala iHubo 19:7, 11; uJakhobe 2:22, 23; 4:8.

Ibhuku leli lizakunceda ukuthi ulizwisise iBhayibhili ngendlela efanana laleyo eyasetshenziswa nguJesu. Wayekhuluma ngemibhalo yeBhayibhili ilandelana njalo wayichasisa ‘ukuze abantu bayizwisise iMibhalo.’​—Bala uLukha 24:27, 45.

Zilutshwana izinto ezimangalisa njengezindaba ezinhle ezivela kuNkulunkulu. Loba kunjalo abanye abantu kabalandaba lazo, njalo abanye baze bacatshulwe yizo. Ungabuyeli emuva. Ukwazi uNkulunkulu yikho kuphela okungenza ube lokuphila okungapheliyo.​—Bala uJohane 17:3.