Ithempeli elabonwa nguHezekheli laliphezu ‘kwentaba ende kakhulu’ (1). Ukukhonza kweqiniso siyakuqakathekisa yini ukwedlula loba yini?

Kwakulomduli owawugombolozele indawo yonke yethempeli (2), lendawo enkulu eyayigombolozele ithempeli (3). Lokhu kusifundisa ukuthi akumelanga sivumele lutho lusiphambanise ekukhonzeni kweqiniso. Nxa izinto ‘ezingangcwele’ zazingafuneki eduze lethempeli, pho kuthiwani ngezilihlazo? Wonke umuntu okhonza uJehova kumele aziphathe kuhle ngaso sonke isikhathi!—Hez. 42:20.

Kugeleza amanzi esuka endaweni engcwele, aqhubeke esiba manengi kube ngumfula (4) ovuselela izinto eziphilayo wenze lelizwe livunde. Sizaxoxa ngezibusiso lezi eSahlukweni 19.

Amagedi okungena egumeni elingaphandle (5) lamagedi okungena egumeni elingaphakathi (9) asikhumbuza ukuthi uJehova ufuna bonke abantu abamkhonzayo balandele izimiso zakhe zokuziphatha. Wonke amagedi ayalingana futhi ayafanana. Lokhu kutshengisa ukuthi uJehova ufuna bonke abantu bakhe balandele imithetho efananayo kungelani lokuthi bangobani lokuthi benza msebenzi bani ebandleni.

Izindlu zokudlela (8) zisikhumbuza ukuthi abantu bakaJehova babesidla enye inyama yemihlatshelo ababeyiletha ethempelini. Kwakungathi badla loJehova. Kodwa ethempelini likaJehova elikhulu amaKhristu akhonza kulo lamuhla, kwanikelwa ‘ngomhlatshelo owodwa. (Heb. 10:12) Lanxa kunjalo siyanikela ‘imihlatshelo yokudumisa.’—Heb. 13:15.

Izilinganiso ezisembonweni kaHezekheli zinengi kakhulu okokuthi kungaba nzima ukuzilandelela zonke. Kodwa zisifundisa isifundo esiqakathekileyo. Zisiqinisekisa ukuthi inhloso kaJehova yokuvuselela ukukhonza kweqiniso iyagcwaliseka loba sekutheni, akukho lokukodwa okuzasala. Lanxa uHezekheli engasitsheli ukuthi kulabantu ababonayo yini embonweni, wabhala amazwi kaJehova elaya abaphristi, labakhokheli kanye labantu. Zonke izinceku zikaJehova kumele zilandele izimiso zakhe eziphakemeyo.