Iziphrofetho eziseBhayibhilini kanye lalokho obekusenzakala kutshengisa ukuthi uJesu waqalisa ukubusa ezulwini ngo-1914, njalo lokho kwakuyikuqala kwensuku zokucina zomhlaba kaSathane. UJesu wenzani esebekwe ukuthi abe yiNkosi? Wahle wakhulula abantu bakhe yini eBhabhiloni Enkulu? Wayibeka ngalesosikhathi yini “inceku ethembekileyo lehlakaniphileyo” waseqalisa umsebenzi omkhulu wokuvuna?—Mat. 24:45.

Hatshi, ubufakazi butshengisa ukuthi lokho kakwenzanga ngo-1914. Khumbula ukuthi umphostoli uPhetro wabhala ukuthi ukwahlulela ‘kwakuzaqalisa endlini kaNkulunkulu.’ (1 Phet. 4:17) Umphrofethi uMalakhi laye wathi uJehova wayezafika ethempelini lakhe ‘elesithunywa sesivumelwano,’ iNdodana yakhe uJesu Khristu. (Mal. 3:1-5) Ngesikhathi leso wayezahlola abantu bakhe futhi abahlambulule. Isiphrofetho lesi sagcwaliseka yini?

Ye sagcwaliseka. Kusukela ngomnyaka ka-1914 kusiya ekuqaliseni kuka-1919 abantu bakaNkulunkulu behlelwa yibunzima ngesikhathi behlolwa futhi behlanjululwa. Ngalesosikhathi babebizwa  ngokuthi ngaBafundi beBhayibhili. Ngo-1914 abanengi babo badana ngoba babecabanga ukuthi ukuphela komhlaba kaSathane kwakuzafika ngalowomnyaka kodwa ayisikho okwenzakalayo. Izinto zaba zimbi kakhulu ngo-1916 lapho uCharles T. Russell owayebakhokhela ngalesosikhathi esifa. Abanye ababemthanda kakhulu futhi ababebona angathi nguye yedwa ongakhokhela abantu bakaNkulunkulu abazange babambisane lalokho okwakusenziwa nguJoseph F. Rutherford owayesebekwe esikhundleni sikaRussell. Lokhu kwenza ukuthi kungabi lokumanyana phakathi kwabantu bakaNkulunkulu njalo kwaphosa kwabangela ukuthi inhlanganiso idabukane phakathi ngo-1917. Kwasekusithi ngo-1918 umfowethu uRutherford labanye abazalwane abangu-7 babotshwa futhi betheswa amacala abangawenzanga, basebevalelwa ejele. Kukhanya iziphathamandla ezenza lokhu zazitshotshozelwa ngabakhokheli bamasonto. Amawofisi ethu amakhulu ayeseBrooklyn avalwa. Kuyazikhanyela ukuthi ngalesosikhathi abantu bakaNkulunkulu babengakakhululwa eBhabhiloni Enkulu.

Kodwa kwenzakalani ngo-1919? Izinto zaphongutshintsha ngesikhatshana! Ekuqaliseni komnyaka lo uRutherford labanye bakhe bakhululwa ejele. Bephuma nje bahle baqalisa umsebenzi, abazange bapholise amaseko! Masinyane nje kwahle kwalungiselelwa umhlangano omkhulu futhi kwaqaliswa ukudindwa imagazini entsha eyayithiwa yi-Golden Age, khathesi esibizwa ngokuthi yi-Vukani! Imagazini le yayenzelwe ukuthi isetshenziswe ekutshumayeleni. Kanti njalo ebandleni ngalinye kwabekwa umzalwane owayezahlela umsebenzi wokutshumayela futhi akhuthaze labanye ukuthi bahlale bewukhuthalele. Ngalowomnyaka kwaphinda kwadindwa elinye ibhukwana okwakuthiwa yi-Bulletin elalizancedisa ekuhleleni umsebenzi wokutshumayela. Khathesi sesilibiza ngokuthi lu-Gwalo Lwempilo Lenkonzo YamaKhristu.

Kuyini okwabangela ukuthi kube lotshintsho lolu? Kuyacaca ukuthi uKhristu wayesebakhululile abantu bakhe ababethunjwe yiBhabhiloni Enkulu. Wayeseyibekile inceku ethembekileyo lehlakaniphileyo ukuthi ikhokhele abantu bakhe njalo umsebenzi wokuvuna wawusuqalisile. Kusukela ngomnyaka ka-1919 lapho okwaba lotshintsho lolu olukhulu, umsebenzi wokutshumayela ubulokhu uhamba ngesiqubu esikhulu.