1, 2. Kungani ngezinye izikhathi uJehova wayetshengisa abantu bakhe imibono?

 AKUCABANGE ngemuli elabantwana abancane ihlezi itaditsha iBhayibhili. Ubaba usebenzisa amapikitsha ukuze ancedise abantwabakhe bazwisise lokho abakufunda eBhayibhilini. Indlela abantwana ababobotheka ngayo labaphendula ngayo itshengisa ukuthi amapikitsha asebancedile bazwisisa abakufundayo. Sebezizwisisa izinto ezijulileyo eziphathelane loJehova obekungaba nzima ukuthi bazizwisise njengoba bebancane.

² UJehova laye wenza njalo nxa efundisa abantu bakhe ngezinto ezingabonakaliyo okungaba nzima ukuzizwisisa. Kabafundisi ngamazwi nje kuphela kodwa uyabatshengisa lezinye izinto ezibanceda ukuthi bazwisise akutshoyo. Ngokwesibonelo wathi efundisa uHezekheli ukuthi yena unguNkulunkulu onjani, wamtshengisa umbono omangalisayo. Esahlukweni esisanda kwedlula sixoxe ngalokho uHezekheli akubona embonweni lowo. Khathesi asixoxeni ngokunye futhi uHezekheli akubonayo okuzasinceda sisondele kakhulu kuJehova.

3. (a) UHezekheli 1:4, 5 uthi kuyini uHezekheli akubonayo? (Khangela umfanekiso osekuqaliseni.) (b) Yiwaphi amabala uHezekheli awasebenzisa ukuchasisa ayekubona futhi kungani wasebenzisa wona?

³ Bala uHezekheli 1:4, 5. UHezekheli wabona ‘okwakungathi yizidalwa ezine eziphilayo.’ Izidalwa lezi zazinjengezingilosi kodwa zilezinye izitho ezinjengezabantu lezinjengezezinyamazana. Nanzelela ukuthi uHezekheli wayewakhetha ngonanzelelo amabala ayewasebenzisa ukuze achasise ayekubona. Wabhala ukuthi wabona ‘okwakungathi’ yizidalwa eziphilayo. Nxa ungabala wonke umbono okuHezekheli isahluko 1, uzananzelela ukuthi uHezekheli wasebenzisa kanengi amabala athi “zazingathi,” ‘angathi’ lelithi “wayengathi.” (Hez. 1:13, 24, 26) Kuyacaca ukuthi uHezekheli wayenanzelela ukuthi wayengaboni khona kanye okusezulwini kunjengoba kunjalo kodwa wayebona imifanekiso eyayimnceda azwisise izinto lezo.

4. (a) Umbono uHezekheli awubonayo wamtshiya enjani? (b) Kuyini uHezekheli ayengabe ekwazi ngamakherubhi?

⁴ Kumele ukuthi lokho uHezekheli akubonayo lakuzwayo kwamtshiya engelankani. Izidalwa eziphilayo zazingathi “ngamalahle avuthayo.” Zazisithi nxa zihamba kube angathi “ngumbane ophazimayo” ngoba zazihamba ngesiqubu esikhulu kakhulu. Umsindo wempiko zazo “wawungathi ngamanzi ahubayo,” futhi zazisithi nxa zihamba kube “angathi libutho elihlokomayo.” (Hez. 1:13, 14, 24-28; khangela ibhokisi elithi “‘Ngakhangela Izidalwa Eziphilayo.’”) Komunye umbono uHezekheli awubonayo wathi izidalwa ezine eziphilayo ‘ngamakherubhi,’ okutsho izingilosi ezilamandla. (Hez. 10:2) Njengoba uyise wayengumphristi, kumele ukuthi uHezekheli wayekwazi ukuthi amakherubhi zingilosi ezisebenza duzane kakhulu loNkulunkulu futhi ezihlala zilapho akhona.—1 Imilan. 28:18; Hubo. 18:10.

5. (a) Amakherubhi lobuso bawo akuveza njani ukuthi uJehova ulamandla lenkazimulo? (b) Umbono kaHezekheli usikhumbuzani ngebizo likaJehova? (Khangela amabala angaphansi.)

⁵ Bala uHezekheli 1:6, 10. Okunye okwabonwa nguHezekheli yikuthi ikherubhi ngalinye lalilobuso obune. Lalilobuso bomuntu, lobesilwane, lobenkunzi kanye lobokhozi. Kufanele ukuthi ukubona lokhu kwenza uHezekheli wananzelela ukuthi uJehova ulamandla amakhulu lokuthi inkazimulo yakhe inkulu. Kungani sisitsho njalo? Phela ubuso ngabunye babungobesidalwa esilamandla futhi esilesithunzi. Isilwane yinkosi yeganga, inkunzi yisifuyo esikhulu esilamandla, njalo ukhozi lona yinyoni elamandla. Umuntu yena waba ngowokucina ukudalwa futhi waphiwa udumo lenkazimulo kanye lelungelo lokubusa zonke izinto ezisemhlabeni. (Hubo. 8:4-6) Lanxa kunjalo, embonweni wakhe uHezekheli wabona ukuthi izidalwa ezine ezilobuso besilwane, lobenkunzi, lobokhozi, lobomuntu zazingaphansi kwesihlalo sobukhosi sikaJehova uMbusi wendawo yonke. Lokhu kutshengisa ukuthi uJehova angasebenzisa lokho akudalayo ukuze agcwalise inhloso yakhe. a Yikho umhubi  wabhala wathi: “Inkazimulo yakhe ingaphezu kwamazulu lomhlaba.”—Hubo. 148:13.

6. Kuyini okungabe kwanceda uHezekheli ukuthi azwisise ukuthi ubuso bamakherubhi bumelani?

⁶ Kungenzakala ukuthi uHezekheli wathi esecabangisisa ngalokho ayekubonile wakhumbula ukuthi izinceku zikaJehova zakudala zazike zifanise abantu lezinyamazana. Ngokwesibonelo, uJakhobe wafanisa indodana yakhe uJuda lesilwane, uBhenjamini yena wamfanisa leganyana. (Gen. 49:9, 27) Kungani wabafanisa lenyamazana lezi? Kungenxa yokuthi amadoda la ayelobuntu obabuhambelana lokunye okwakusenziwa zinyamazana lezi. Ukukhumbula izibonelo lezi ezisemibhalweni eyabhalwa nguMosi kungabe kwanceda uHezekheli wananzelela ukuthi ubuso ngabunye bamakherubhi la babungabe bumela ubuntu obuthile. Khathesi asixoxeni ngokuthi yibuphi ubuntu lobo.

7, 8. Chasisa ukuthi ubuso besilwane, lobokhozi, lobenkunzi kanye lobomuntu bumelani.

⁷ Abalobi beBhayibhili abaphila uHezekheli engakabi khona bathi isilwane lokhozi lenkunzi zinyamazana ezinjani? Nanku okunye abakutshoyo: ‘Indoda elesibindi sesilwane.’ (2 Sam. 17:10; Zaga. 28:1) ‘Ukhozi luphapha luyephezulu’ futhi ‘amehlo alo abona okukhonale khatshana.’ (Jobe. 39:27, 29; amabala angaphansi) “Amandla enkunzi aletha isivuno esinengi.” (Zaga. 14:4) Amavesi la enza siphethe ngokuthi ubuso besilwane bumela isibindi sokwahlulela kuhle. Ubuso bokhozi bona bumela inhlakanipho ejulileyo futhi ubuso benkunzi bumela amandla amakhulu. Lokhu yikho okujayele ukutshiwo ngamabhuku ethu.

⁸ Manje ‘ubuso bomuntu’ bona bumelani? (Hez. 10:14) Kufanele ukuthi bumela into engeke yenziwe zinyamazana kodwa etholakala ebantwini kuphela ngoba bona badalwa ngomfanekiso kaNkulunkulu. (Gen. 1:27) UNkulunkulu watshela abantu bakhe wathi: “Kumele umthande uJehova uNkulunkulu wakho ngenhliziyo yakho yonke.” Waphinda wathi: “Kumele uthande umakhelwane wakho ngendlela ozithanda ngayo.” (Dute. 6:5; Levi. 19:18) Nxa sisenza okutshiwo yimilayo le, siyabe silingisela uJehova uNkulunkulu wethu olothando. Umphostoli uJohane wabhala wathi: “Siyathanda ngoba yena wasithanda kuqala.” (1 Joh. 4:8, 19) Ngakho ‘ubuso bomuntu’ bumela uthando.

9. Ubuso obune bumela ubuntu bamakherubhi kuphela yini? Chasisa.

⁹ Ubuso bamakherubhi bumela ubuntu bamakherubhi kuphela yini? Hatshi. Khumbula ukuthi amakherubhi amela zonke izingilosi ezibumba imuli kaJehova esezulwini. Yikho ubuso lobu bumela ubuntu bazo zonke izingilosi zikaJehova ezithembekileyo. (Isam. 5:11) Kanti njalo njengoba uJehova kunguye owadala amakherubhi, kutsho ukuthi nguye owawanika ubuntu lobu. (Hubo. 36:9)  Ngakho ubuso bamakherubhi bumela lobuntu bukaJehova. (Jobe. 37:23; Hubo. 99:4; Zaga. 2:6; Mik. 7:18) Khathesi asixoxeni kancane ngendlela uJehova atshengisa ngayo ukuthi wahlulela kuhle, uhlakaniphile, ulamandla futhi ulothando.

10, 11. Ubuntu bukaJehova businceda njani?

¹⁰ Okokuqala, wahlulela kuhle. UJehova “uthanda ukwahlulela okuhle” futhi “kabandlululi muntu.” (Hubo. 37:28; Dute. 10:17) Ngakho sonke usinike ithuba lokuthi sibe zinceku zakhe futhi sithole izibusiso ezizahlala kuze kube phakade kungelani lokuthi sivela ngaphi kumbe ukuthi sinothile loba singabayanga. Okwesibili, uJehova “uhlakaniphile” yikho esinike ibhuku ‘elilokuhlakanipha okuncedayo.’ (Jobe. 9:4; Zaga. 2:7) Nxa singakusebenzisa lokho esikutshelwa liBhayibhili, sizaphila impilo ethokozisayo futhi sizenelisa ukulwisana lenhlupho esihlangana lazo nsuku zonke. Okwesithathu, ulamandla. UJehova “ulamandla amakhulu” futhi usebenzisa umoya wakhe ongcwele ukuze asinike “amandla amakhulu futhi angajayelekanga.” Lokhu kwenza sibe lamandla okubekezelela inhlupho ezinkulu lobunzima obungasehlela.—Nahu. 1:3; 2 Khor. 4:7; Hubo. 46:1.

¹¹ Okwesine, ulothando. UJehova ngeke abalahle labo abathembekileyo kuye ngoba “ugcwele uthando oluqotho.” (Hubo. 103:8; 2 Sam. 22:26) Ngakho nxa kuyikuthi khathesi asisenelisi ukwenzela uJehova okunengi njengakuqala, mhlawumbe ngenxa yokuthi siyagula loba sesigugile, kuyasiduduza ukwazi ukuthi uJehova uyakukhumbula esasimenzela khona sifuqwa yikuthi siyamthanda. (Heb. 6:10) Kuyacaca ukuthi ukwahlulela kuhle kukaJehova, lokuhlakanipha kwakhe, lamandla kanye lothando lwakhe kuyasinceda kakhulu lamuhla futhi kuzaqhubeka kusinceda kuze kube nini lanini.

12. Kuyini okumele sikukhumbule nxa sifunda ngobuntu bukaJehova?

¹² Kodwa kumele sikhumbule ukuthi ‘kulutshwana’ esingakuzwisisa ngobuntu bukaJehova. (Jobe. 26:14) IBhayibhili lithi “ngeke senelise ukuzwisisa konke ngoSomandla” ngoba “kakho ongazwisisa ukuthi mkhulu kangakanani.” (Jobe. 37:23; Hubo. 145:3) Ngakho ngeke sibuchasise bonke ubuntu bukaJehova. (Bala uRoma 11:33, 34.) Umbono kaHezekheli utshengisa ukuthi ubuntu bukaNkulunkulu bugoqela izinto ezinengi kakhulu esingeke siziqambe siziqede. (Hubo. 139:17, 18) Ake sibone ukuthi ukuveza njani lokho.

13, 14. Ubuso obune bamakherubhi bumelani futhi kungani sisitsho njalo?

¹³ Embonweni uHezekheli wabona ikherubhi ngalinye lilobuso obune. Lokhu kutshoni? Khumbula ukuthi eLizwini likaNkulunkulu inani leli lisetshenziswa nxa kukhulunywa ngokuphelela loba ngento egoqela konke. (Isaya. 11:12; Mat. 24:31; Isam. 7:1) UHezekheli wathi esebhala ayekubone embonweni wasebenzisa inani leli  izikhathi ezedlula ezingu-11. (Hez. 1:5-18) Manje singaphetha ngokuthini? Njengoba amakherubhi amane emela zonke izingilosi ezithembekileyo, kutsho ukuthi lobuso bamakherubhi obune nxa sebukhangelwa bubonke bumela bonke ubuntu bukaJehova. b

¹⁴ Okunye okungasinceda sizwisise ukuthi ubuso bamakherubhi obune bumela bonke ubuntu bukaJehova, yikuhlola indlela amaviri enqola asebenza ngayo. Iviri ngalinye lenqola liyamangalisa kodwa nxa usuwakhangele wonke womane uyawubona umsebenzi omkhulu awenzayo ngoba yiwo athwele yonke inqola. Kunjalo langobuso bamakherubhi obune. Ubuso ngabunye bumela ubuntu obubodwa nje kuphela kodwa nxa ubuso bamakherubhi obune sebukhangelwa bubonke, bumela bonke ubuntu bukaJehova.

15. Kuyini okunye okuqakathekileyo uHezekheli akufundayo embonweni wakhe wokuqala?

¹⁵ Embonweni lo uHezekheli wafunda elinye iqiniso eliqakathekileyo. Iqiniso lelo silithola emavesini akuqala ebhuku lakhe. UHezekheli 1:3 uqala ngokusitshela ukuthi uHezekheli ‘wayeselizweni lamaKhaledi,’ abesesitshela ukuthi kuyini okwenzakala kuye. Uthi: “Elapho isandla sikaJehova saba phezu kwakhe.” Ivesi le isitshengisa  ukuthi uHezekheli wathola umbono eseBhabhiloni hatshi eJerusalema. c Lokho kungabe kwamfundisani uHezekheli? Kumele ukuthi kwamfundisa ukuthi lanxa wayethunjiwe futhi ekhatshana leJerusalema lethempeli, wayengekho khatshana loJehova. Wayengenelisa ukumkhonza ngendlela ayamukelayo kungelani lokuthi ungaphi kumbe ukuthi kwenzakalani empilweni yakhe. Okwakuqakathekile yikuthi azimisele ukukhonza uJehova ngenhliziyo yonke.

16. (a) Umbono kaHezekheli wenza siqiniseke ngani? (b) Kuyini okwenza ukhonze uJehova ngenhliziyo yakho yonke?

¹⁶ Ukwazi lokhu kusinceda njani lamuhla? Kuyasiqinisekisa ukuthi nxa singakhonza uJehova ngenhliziyo yonke, uzahlala eseduze kwethu kungelani lokuthi sihlala ngaphi loba ukuthi silenhlupho ezinkulu kangakanani. Lanxa singehlelwa yibunzima obungatshintsha impilo yethu, uJehova uzaqhubeka esithanda. (Hubo. 25:14; Imiseb. 17:27) UJehova ugcwele uthando oluqotho ngakho uyababekezelela bonke abantu bakhe. (Eks. 34:6) Sileqiniso lokuthi uJehova uzaqhubeka esithanda lanxa kungaze kwenzakaleni kithi. (Hubo. 100:5; Rom. 8:35-39) Umbono kaHezekheli waveza ukuthi uJehova ungcwele lokuthi ulamandla amangalisayo, yikho kunguye yedwa okumele akhonzwe. (Isam. 4:9-11) Siyambonga kakhulu uJehova ngokuthi wasebenzisa umbono lo ukuze asincede sizwisise ukuthi yena unguNkulunkulu onjani. Nxa singafunda ngobuntu bukaJehova sibuzwisise, sizasondela kakhulu duze kwakhe. Lokhu kuzasinceda ukuthi simkhonze ngenhliziyo yonke langamandla ethu wonke.—Luk. 10:27.

17. Yiphi imibuzo ezaphendulwa ezahlukweni ezilandelayo?

¹⁷ Okudanisayo yikuthi ngezinsuku zikaHezekheli abantu babengasakhonzi uNkulunkulu ngendlela ayamukelayo. Kuyini okwabangela lokho? UJehova wathini ngakho? Kanti njalo okwenzakala ngesikhathi leso kusifundisani lamuhla? Imibuzo le izaphendulwa ezahlukweni ezilandelayo.