Kuwe Wena Othanda UJehova

Ngo-1971 kwaba lomhlangano owawulesihloko esithi, “Ibizo LikaNkulunkulu.” Ababesemhlanganweni lo bathokoza kakhulu lapho besamukela amabhuku amatsha. Babengakulindelanga ukuthola amabhuku amahle kangaka. Omunye umfowethu wakhuluma ngelinye ibhuku ababelitholile wathi, “Asikaze sithole ibhuku elikuchasisa kuhle kangaka okuzakwenzakala ngesikhathi esizayo.” Yiliphi ibhuku ayekhuluma ngalo? Ngelithi “The Nations Shall Know That I am Jehovah”—How? (“Izizwe Zizakwazi Ukuthi NginguJehova”—Njani?) Ibhuku leli lalikhuluma ngani okwenza abafowethu labodadewethu balithanda kangaka? Lalichasisa iziphrofetho ezisebhukwini likaHezekheli ezikhuluma ngalokho okuzakwenzakala ngesikhathi esizayo.

Ibhuku leli lathi liphuma, oFakazi bakaJehova babengaba yi-1,5 miliyoni kodwa khathesi sebesedlula 8 miliyoni. (Isaya. 60:22) Bakhuluma izindimi ezedlula 1 000. (Zak. 8:23) Abanengi babo abazange bathole ithuba lokubala ibhuku elichasisa iziphrofetho ezabhalwa ngumphrofethi uHezekheli.

Kanti njalo ukukhanya bekulokhu kuqhubeka kukhanya. Kusukela ngo-1971 indlela ebesizwisisa ngayo okunye okuseBhayibhilini iqhubeke itshintsha. (Zaga. 4:18) Ngo-1985 sacaciselwa ukuthi kuyini okwenza uNkulunkulu athi ‘abezinye izimvu’ balungile futhi abavumele ukuthi babe ngabangane bakhe. (Joh. 10:16; Rom. 5:18; Jak. 2:23) Ngo-1995 sacaciselwa ukuthi ukwahlulelwa kokucina ‘kwezimvu lembuzi’ kuzakwenzakala ngesikhathi ‘sokuhlupheka okukhulu.’ (Mat. 24:21; 25:31, 32) Konke lokhu kutshintshe indlela ebesilizwisisa ngayo ibhuku likaHezekheli.

Lakhathesi ukukhanya kuqhubeka kukhanya kakhulu. Sesizizwisisa ngcono izifundo esizithola emizekelisweni kaJesu. Imizekeliso yakhe eminengi ikhuluma ngezinto ezizakwenzakala ngesikhathi sokuhlupheka okukhulu osekuseduze. Lendlela ebesizwisisa ngayo iziphrofetho ezisebhukwini likaHezekheli isitshintshile. Ngokwesibonelo sesisizwisisa ngcono isiphrofetho sikaGogi waselizweni laseMagogi (isahluko 38 lo-39), lesendoda eyayihamba ifaka abantu uphawu (isahluko 9) lesesigodi esilamathambo awomileyo kanye lesokuhlanganiswa kwezigodo ezimbili (isahluko 37). Indlela esesizizwisisa ngayo iziphrofetho lezi isitshiyene lendlela ezazichasiswe ngayo ebhukwini elithi “Izizwe Zizakwazi Ukuthi NginguJehova.”

Lokhu kwenze ukuthi abantu bakaJehova abanengi babuze ukuthi sizalithola nini ibhuku elichasisa iziphrofetho ezisebhukwini likaHezekheli ngendlela esesizizwisisa ngayo khathesi. Sesilitholile! Yilo leli elilesihloko esithi UJehova Uvuselela Ukukhonza Kweqiniso! Lilezahluko ezingu-22. Ngesikhathi ulibala cabangisisa ngemifanekiso emihle ekulo. Uzananzelela ukuthi abafowethu bachwayisisa okuzwayo ngesikhathi belibhala. Bathandaza futhi bacabangisisa ngokuthi kungani uJehova waphefumulela uHezekheli ukuthi abhale iziphrofetho lezo. Bacabanga ngemibuzo enjengokuthi: Yiziphi izifundo ezisebhukwini likaHezekheli okwakumele zisetshenziswe ngabantu abaphila ngesikhathi sakhe futhi thina zisinceda njani? Yiziphi iziphrofetho ezikhuluma ngalokho okuzakwenzakala ngesikhathi esizayo? Kumele sizihluphe yini ngokuthi zonke izinto uHezekheli akhuluma ngazo zimelani? Izimpendulo  zemibuzo le zizasinceda ukuthi sikuzwisise kuhle lokho esizakubala ebhukwini likaHezekheli.

Asithandabuzi ukuthi indlela inhlanganiso kaJehova yasezulwini echasiswe ngayo ebhukwini leli izakutshiya ubambe owangaphansi. Uzamangaliswa layizimiso zikaJehova eziphakemeyo afuna zilandelwe zingilosi langabantu abamkhonza ngendlela ayifunayo lapha emhlabeni. Ibhuku leli lizakunceda uqakathekise lokho uJehova asekwenzele abantu bakhe lalokho azabenzela khona esikhathini esizayo. Uzananzelela lokuthi ebhukwini leli kugcizelelwa izinto ezimbili. Okokuqala yikuthi nxa sifuna ukuthokozisa uJehova kumele simazi kuhle futhi sivume ukuthi unguMbusi Wendawo Yonke. Okwesibili yikuthi kumele sikhonze uJehova ngendlela ayamukelayo futhi silandele izimiso zakhe.

Esikufisayo yikuthi ibhuku leli likwenze uzimisele ukukhonza uJehova ngendlela ezakwenza ibizo lakhe eliphakemeyo futhi elingcwele lidunyiswe. Kwangathi lingakunceda ukuthi uhlale usilindele isikhathi lapho zonke izizwe ezizamazi khona uJehova uNkulunkulu wethu.—Hez. 36:23; 38:23.

Kwangathi uBaba wethu osithandayo uJehova angakuncedisa ukuthi ulizwisise ibhuku aphefumulela uHezekheli ukuthi alibhale.