Okucaciswe Kutsha
Eminyakeni edlulileyo iNqabayokulinda ibisicacisela indlela entsha esesizwisisa ngayo ezinye iziphrofetho ezisebhukwini likaHezekheli. Lebhuku leli elithi UJehova Uvuselela Ukukhonza Kweqiniso! lilokunye osekucacisiwe okungasinceda sizizwisise ngcono iziphrofetho zikaHezekheli. Akubone ukuthi ungenelisa yini ukuphendula imibuzo elandelayo.
Ubuso obune bezidalwa eziphilayo bumelani?
Indlela esasizwisisa ngayo: Ubuso ngabunye bezidalwa eziphilayo kumbe bamakherubhi bumela uphawu olulodwa lobuntu bukaJehova obukhanya kakhulu. Impawu lezo luthando, amandla, ukuhlakanipha kanye lokwahlulela kuhle.
Indlela esesizwisisa ngayo khathesi: Lanxa ubuso ngabunye bezidalwa eziphilayo bumela uphawu olulodwa lobuntu bukaJehova, ubuso obune nxa sebukhangelwa bubonke bumela bonke ubuntu bukaJehova hatshi impawu ezine kuphela. Phezu kwalokho ubuso obune bamakherubhi benza sibone ukuthi uJehova ulamandla amakhulu lenkazimulo emangalisayo.
Isizatho esenze satshintsha: Ikherubhi ngalinye lalilobuso obune. Izikhathi ezinengi eLizwini likaNkulunkulu inani lelo lisetshenziswa nxa kukhulunywa ngokuphelela loba nxa kubalwa zonke izinto. Ngakho ubuso obune bamakherubhi bumela bonke ubuntu bukaJehova, hatshi uthando lamandla lokuhlakanipha kanye lokwahlulela kuhle kuphela. Ubuso ngabunye ngobesidalwa esilamandla futhi esilesithunzi. Lanxa kunjalo, uHezekheli wabona ukuthi zonke izidalwa ezine eziphilayo ezimela konke okudalwe nguJehova zazingaphansi kwesihlalo sobukhosi sikaJehova. Lokho kutshengisa ukuthi uJehova uphezu kwakho konke.
Indoda eyayilezinto zokubhala imela bani?
Indlela esasizwisisa ngayo: Indoda eyayilezinto zokubhala imela amaKhristu agcotshiweyo asasemhlabeni. Abagcotshiweyo bafaka uphawu emabunzini alabo ababumba “ixuku elikhulu.” Lokho bakwenza ngomsebenzi wokutshumayela lowokwenza abafundi.—Isam. 7:9.
Indlela esesizwisisa ngayo khathesi: Indoda eyayilezinto zokubhala imela uJesu Khristu. Ngesikhathi ‘sokuhlupheka okukhulu’ uzafaka labo ababumba ixuku elikhulu uphawu lokuthi bazasinda.—Mat. 24:21.
Isizatho esenze satshintsha: UJehova unike iNdodana yakhe umsebenzi wokwahlulela. (Joh. 5:22, 23) KuMathewu 25:31-33 sithola ukuthi uJesu nguye ozakwahlulela abantu atsho ukuthi ‘bayizimvu’ kumbe ‘bazimbuzi.’
Izelamani eziyizifebe, u-Ohola lo-Oholibha, zimela amasonto amanga azithi ngawesiKhristu yini?
Indlela esasizwisisa ngayo: U-Ohola (iSamariya isigodlo sako-Israyeli) umela isonto yamaKatolika, besekusithi u-Oholibha (iJerusalema isigodlo sakoJuda) amele amasonto abhazuka esontweni yamaKatolika.
Indlela esesizwisisa ngayo khathesi: Izelamani lezi eziyizifebe kazimeli amasonto azithi ngawesiKhristu. Kodwa isiphrofetho lesi sisinceda sizwisise ukuthi uJehova uzwa ubuhlungu kakhulu nxa abantu bakhe betshiya ukukhonza kweqiniso belandela imikhuba yenkolo yamanga. UJehova uyazenyanya zonke inkolo zamanga.
Isizatho esenze satshintsha: Akulalutho eMibhalweni olutshengisa ukuthi u-Ohola lo-Oholibha bamela amasonto amanga. Abantu bako-Israyeli labakoJuda bake baba ngabantu bakaNkulunkulu kodwa amasonto amanga wona awakaze abe ngakaJehova. Kanti njalo kwakulethemba lokuthi abantu bakaNkulunkulu abafaniswa lezifebe kuHezekheli isahluko 16 lo-23 babengatshintsha baphenduke kuJehova. Kodwa amasonto azithi ngawesiKhristu kanye layo yonke iBhabhiloni Enkulu kawasoze atshintshe.
Abantu beJerusalema ababehlamuka bamela amasonto amanga azithi ngawesiKhristu yini?
Indlela esasizwisisa ngayo: Abantu beJerusalema ababehlamukela uJehova bamela amasonto amanga azithi ngawesiKhristu. Ngakho ukubhujiswa kweJerusalema kumela ukutshabalaliswa kwamasonto la.
Indlela esesizwisisa ngayo khathesi: Kuliqiniso sibili ukuthi izinto ezazisenziwa ngabantu beJerusalema ezinjengokukhonza izithombe lobuqili yizo ezenzakala emasontweni amanga. Lanxa kunjalo kasisatsho ukuthi abantu beJerusalema ababehlamuka bamela amasonto amanga azithi ngawesiKhristu.
Isizatho esenze satshintsha: EMibhalweni akulabufakazi bokuthi abantu beJerusalema ababehlamuka bamela amasonto amanga. Abantu beJerusalema bake bakhonza uJehova ngendlela ayamukelayo kodwa amasonto amanga wona awakaze. Kanti njalo uJehova wake wabaxolela abantu beJerusalema kodwa kasoze awaxolele amasonto amanga.
Umbono wesigodi esilamathambo awomileyo wagcwaliseka njani?
Indlela esasizwisisa ngayo: Ngo-1918 amaKhristu agcotshiweyo athunjwa yiBhabhiloni Enkulu. Kwasekungathi afile ngoba imisebenzi eminengi ephathelane lokukhonza ayengasayenzi. Kodwa ngemva kwesikhatshana nje akhululwa lapho uJehova ewavuselela, aseqalisa ukutshumayela ngoMbuso. Lokhu kwenzakala ngo-1919.
Indlela esesizwisisa ngayo khathesi: AmaKhristu agcotshiweyo athunjwa yiBhabhiloni Enkulu kudala u-1918 engakafiki futhi ahlala isikhathi eside ethunjiwe. Athunjwa ngemva kuka-100 C.E., akhululwa ngo-1919 C.E. Isikhathi eside asihlala ethunjiwe sihambelana lesikhathi sokukhula ndawonye kwengqoloyi lokhula uJesu akhuluma ngaso emzekelisweni wakhe.
Isizatho esenze satshintsha: Isizwe sako-Israyeli sathunjwa okwesikhathi eside. Sathunjwa ngo-740 B.C.E., sakhululwa ngo-537 B.C.E. Isiphrofetho sikaHezekheli sathi amathambo “ayewome kakhulu” okutshengisa ukuthi kwasekulesikhathi eside abantu labo bafa. Kanti njalo isiphrofetho siveza ukuthi kwakuzathatha isikhathi ukuthi abantu labo baphile ngoba amathambo ayezavuselelwa kancane kancane.
Kutshoni ukuhlanganiswa kwezigodo ezimbili?
Indlela esasizwisisa ngayo: AmaKhristu agcotshiweyo ehlukana okwesikhatshana ngesikhathi seMpi Yomhlaba Yokuqala, kwasekusithi ngo-1919 amanyana.
Indlela esesizwisisa ngayo khathesi: Isiphrofetho lesi siveza ukuthi uJehova wayezakwenza abantu bakhe bamkhonze bemanyene. Ngemva kuka-1919 amaKhristu ayelethemba lokuphila emhlabeni aqalisa ukuhlangana lamaKhristu agcotshiweyo akhonza ndawonye. Lalamuhla amaqembu la womabili akhonza uJehova emanyene.
Isizatho esenze satshintsha: Isiphrofetho lesi asikhulumi ngesigodo esiqala sicazwe besesihlanganiswa sibe yisigodo esisodwa. Ngakho kasitsho iqembu elilodwa eliqala lehlukane besekusithi ngokuhamba kwesikhathi liphinde limanyane. Kodwa isiphrofetho lesi siveza indlela amaqembu amabili ayezamanyana ngayo.
Ngubani uGogi waseMagogi?
Indlela esasizwisisa ngayo: UGogi waseMagogi nguSathane. Ibizo leli waliphiwa esexotshiwe ezulwini.
Indlela esesizwisisa ngayo khathesi: UGogi waseMagogi yizizwe ezizamanyana ukuze zihlasele abantu bakaNkulunkulu ngesikhathi sokuhlupheka okukhulu.
Isizatho esenze satshintsha: Indlela uGogi achasiswe ngayo esiphrofethweni sikaHezekheli itshengisa ukuthi uGogi kayisiso sidalwa somoya. Ngokwesibonelo, sithi uGogi uzakuba yikudla kwenyoni ezidla inyama futhi uzangcwatshwa emhlabeni. Kanti njalo ukuhlasela kukaGogi okukhulunywa ngakho kuHezekheli kuhambelana lalokho ibhuku likaDanyeli leleSambulo elithi kuzakwenziwa yizizwe nxa sezihlasela abantu bakaNkulunkulu.—Dan. 11:40, 44, 45; Isam. 17:14; 19:19.
Ithempeli elabonwa nguHezekheli yilo yini ithempeli likaJehova elikhulu elachasiswa ngumphostoli uPhawuli?
Indlela esasizwisisa ngayo: Ithempeli elabonwa nguHezekheli embonweni yilo ithempeli likaJehova elikhulu elachasiswa ngumphostoli uPhawuli.
Indlela esesizwisisa ngayo khathesi: UHezekheli kazange abone ithempeli likaJehova elikhulu elaba khona ngo-29 C.E. Kodwa wabona indlela ukukhonza kweqiniso okwakuchasiswe eMthethweni kaMosi okwakuzavuselelwa ngayo nxa amaJuda esephendukile ekuthunjweni. Ngesikhathi uPhawuli echasisa ithempeli likaJehova elikhulu, wakhuluma kakhulu ngomsebenzi uJesu uMphristi Omkhulu awenzayo kusukela ngo-29 C.E. kusiya ku-33 C.E. Embonweni kaHezekheli wethempeli khona akukhulunywa ngomphristi omkhulu kodwa kuvezwa indlela ukukhonza kweqiniso okwakuzavuselelwa ngayo kusukela ngo-1919. Ngakho asizihluphi ngokudinga ukuthi izinto ezinengi ezabonwa nguHezekheli embonweni wethempeli zimelani. Okuqakatheke kakhulu okumele sikudinge yizifundo ezimayelana lezimiso zikaJehova eziphathelane lokukhonza kweqiniso.
Isizatho esenze satshintsha: Okwakusenzakala ethempeli elabonwa nguHezekheli embonweni kutshiyene kakhulu lokwenzakala ethempeli likaJehova elikhulu. Ngokwesibonelo, ethempelini elabonwa nguHezekheli kwakusenziwa imihlatshelo eminengi yezinyamazana, kodwa ethempelini elikhulu likaJehova kwanikelwa ngomhlatshelo owodwa “kwaba kanye kuphela.” (Heb. 9:11, 12) Kanti njalo uKhristu engakabuyi emhlabeni, kwakungakabi yisikhathi sokuthi uJehova aveze iqiniso elijulileyo elimayelana lethempeli lakhe elikhulu.
