ISIFUNDO 28
Tshengisa Ukuthi Uyabonga Ngalokho Okwenzelwe NguJehova LoJesu
Uzwa njani nxa umngane wakho angakunika isipho esihle? Akuthandabuzwa ukuthi uyathokoza futhi utshengise ukuthi uyasiqakathekisa isipho leso. UJehova loJesu basinika isipho esiligugu kakhulu. Isipho lesi yinhlawulo. Manje singatshengisa njani ukuthi siyayiqakathekisa inhlawulo?
1. Singatshengisa njani ukuthi siyakuqakathekisa esikwenzelwe nguNkulunkulu loKhristu?
IBhayibhili lithi “wonke umuntu otshengisa ukuthi uyakholwa [kuJesu]” uzaphila kuze kube nini lanini. (UJohane 3:16) Singatshengisa njani ukuthi silokholo kuJesu? Akumelanga siphonguvuma ukuthi siyakholwa kuye, kodwa kufanele kukhanye ngalokho esikwenzayo lesikukhulumayo. (UJakhobe 2:17) Singenza njalo sizakuba ngabangane bakaJesu loYise uJehova.—Bala uJohane 14:21.
2. Yiwuphi umbuthano osinceda sitshengise ukuthi siyakuqakathekisa esikwenzelwe nguJehova loJesu?
UJesu wathi esezabulawa watshela abalandeli bakhe okwakumele bakwenze ukuze batshengise ukuthi bayakuqakathekisa ukufa kwakhe. Wabatshela ukuthi babe ‘leSidlo SeNkosi Sakusihlwa’ esibizwa langokuthi yiSikhumbuzo Sokufa KukaKhristu. (1 KwabaseKhorinte 11:20) UJesu waqalisa umbuthano lo ukuze abaphostoli bakhe kanye lawo wonke amaKhristu eqiniso bahlale bekhumbula ukuqakatheka kokufa kwakhe. Wathi: “Qhubekani likwenza lokhu lingikhumbula.” (ULukha 22:19) Ukubakhona kwakho eSikhumbuzweni kutshengisa ukuthi uyambonga kakhulu uJehova loJesu ngothando abasitshengise lona.
GEBHA UJULE
Engxenyeni le uzabona ezinye indlela ongatshengisa ngazo ukuthi uyakuqakathekisa okwenzelwe nguJehova loJesu. Uzafunda langokuqakatheka kweSikhumbuzo Sokufa KukaKhristu.
3. Ungenzani ukuze kukhanye ukuthi uyabonga?
Ake sithi kulomuntu okukhiphe emanzini usugalula. Kambe ukuthi ungakukhohlwa yini lokho akwenzele khona? Ubungeke utshengise yini ukuthi uyambonga?
Sesilethemba lokuphila kuze kube nini lanini ngenxa yalokho esikwenzelwe nguJehova. Bala u-1 Johane 4:8-10 beselixoxa ngemibuzo le:
-
Kungani inhlawulo iyisipho esiligugu?
-
Uzwa njani ngalokho okwenzelwe nguJehova loJesu?
Singatshengisa njani ukuthi siyakuqakathekisa esikwenzelwe nguJehova loJesu? Bala u-2 Khorinte 5:15 lo-1 Johane 4:11 lo–5:3. Xoxani ngombuzo olandelayo ngemva kokubala umbhalo ngamunye:
-
Singatshengisa njani ukuthi siyabonga ngenhlawulo?
4. Lingisela uJesu
Eyinye indlela esitshengisa ngayo ukuthi siyayiqakathekisa inhlawulo yikulingisela uJesu. Bala u-1 Phetro 2:21 beselixoxa ngombuzo lo:
-
Ubona angani ungamlingisela njani uJesu?
UJesu wayelithanda iLizwi likaNkulunkulu, ethanda ukutshumayela izindaba ezinhle kanye lokunceda abanye
5. Woba khona eSikhumbuzweni Sokufa KukaKhristu
Bala uLukha 22:14, 19, 20 ukuze ubone okwenzakala eSidlweni SeNkosi Sakusihlwa esenziwa nguJesu. Ngemva kwalokho xoxani ngemibuzo elandelayo:
-
UJesu wasenza njani iSidlo SeNkosi Sakusihlwa?
-
Isinkwa lewayini kumelani?—Khangela amavesi 19 lo-20.
UJesu wayefuna abalandeli bakhe babe leSidlo SeNkosi Sakusihlwa kanye ngomnyaka ngelanga eliqondana lalelo afa ngalo. OFakazi bakaJehova bayakwenza lokhu futhi balandela indlela uJesu athi iSikhumbuzo sokufa kwakhe senziwe ngayo. Ukuze uthole okunengi ngombuthano lo oqakathekileyo, bukelani IVIDIYO beselixoxa ngombuzo olandelayo.
-
Kwenzakalani eSikhumbuzweni?
Isinkwa esisetshenziswa eSikhumbuzweni simela umzimba kaJesu ongelasono awunikela ngenxa yethu. Iwayini limela igazi lakhe
ABANYE BATHI: “Ukukholwa kuJesu yikho kodwa okufunekayo ukuze usindiswe.”
-
Ungamsebenzisa njani uJohane 3:16 loJakhobe 2:17 ukuze uncedise umuntu otshonjalo abone ukuthi kulokunye okumele akwenze?
ISIFINQO
Siyabe sitshengisa ukuthi siyambonga uJesu ngalokho asenzela khona nxa silokholo olukhanya ngezenzo futhi sibekhona eSikhumbuzweni sokufa kwakhe.
Ufundeni?
-
Singatshengisa njani ukuthi silokholo kuJesu?
-
Ubona angani ungenzani ukuze utshengise ukuthi uyakuqakathekisa okwenzelwe nguJehova loJesu?
-
Kungani kuqakathekile ukuthi ubekhona eSikhumbuzweni Sokufa KukaKhristu?
THOLA OKUNENGI
Bukela ividiyo le ubone ukuthi kumele senzeni nxa siyiqakathekisa inhlawulo.
Bala isihloko lesi uzwe ukuthi kutshoni ukuba lokholo lokuthi ungatshengisa njani ukuthi ulalo.
“Tshengisa Ukuthi Ulokholo Ezithembisweni ZikaJehova” (INqabayokulinda, October 2016)
Bala isihloko esithi “Khathesi Sengihlanzekile Futhi Sengiyikholisa Impilo,” ukuze ubone ukuthi ukufunda ngenhlawulo kwamnceda njani omunye umama.
“IBhayibhili Liyamntshintsha Umuntu” (INqabayokulinda, August 1, 2011)
Bala isihloko lesi uzwe ukuthi kungani bebalutshwane abadla isinkwa njalo banathe lewayini eSikhumbuzweni.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
