ISIFUNDO 43
Kuqondile Yini Ukuthi AmaKhristu Anathe Utshwala?
Abantu balemibono etshiyeneyo ngendaba yokunatha utshwala. Abanye bathi kuqondile ukuzinathela labangane ngezinye izikhathi, abanye bona bathi akumelanga sibuthinte, ikanti abanye banatha baze badakwe. IBhayibhili lona lithini ngokunatha utshwala?
1. Kubi yini ukunatha utshwala?
IBhayibhili alikwalisi ukunatha utshwala ngoba liveza ukuthi buphakathi kwezipho ezinengi uNkulunkulu asinike zona. Ngokwesibonelo, lithi ‘iwayini lithokozisa inhliziyo yomuntu.’ (IHubo 104:14, 15) IBhayibhili liphinda likhulume ngamanye amadoda labesifazana ababekhonza uNkulunkulu ababenatha utshwala ngezinye izikhathi.—1 KuThimothi 5:23.
2. Amacebo aseBhayibhilini anganceda labo abakhetha ukunatha
UJehova kafuni sinathe kakhulu kumbe sidakwe. (KwabaseGalathiya 5:21) ILizwi lakhe lithi: “Ungabi phakathi kwabantu abanatha kakhulu iwayini.” (IZaga 23:20) Ngakho nxa ungakhetha ukunatha uwedwa kumbe ulabanye abantu, kumele unanzelele ukuthi awunathi uze ucine ungasenelisi ukucabanga kuhle, ukuzibamba ekukhulumeni lasezenzweni kumbe uze ucine usiba lemikhuhlane ebangelwa yikunatha kakhulu. Nxa kukwehlula ukuzibamba, kungabangcono ukuthi ungasanathi.
3. Singatshengisa njani ukuthi siyabahlonipha abanye endabeni yokunatha utshwala?
Umuntu ngamunye uyazikhethela ukuthi uyafuna yini ukunatha utshwala kumbe hatshi. Akumelanga simahlulele umuntu okhetha ukunatha njalo akumelanga simbambe ngamandla lowo okhetha ukungabuthinti. (KwabaseRoma 14:10) Kanti njalo akumelanga sinathe utshwala nxa ukwenza njalo kuzaphambanisa abanye. (Bala uRoma 14:21.) Phela akumelanga ‘sizifunele okunceda thina kodwa okunceda abanye.’—Bala u-1 Khorinte 10:23, 24.
GEBHA UJULE
Engxenyeni le sizaxoxa ngezimiso eziseBhayibhilini ezimayelana lokunatha utshwala. Uzabona lokuthi ungenzani nxa ulohlupho lokunatha kakhulu.
4. Okungakunceda nxa sokumele ukhethe ukuthi uzanatha yini loba hatshi
UJesu wayekubona njani ukunatha utshwala? Ukuze uthole impendulo yombuzo lo, ake sihlole isimangaliso sokuqala uJesu asenzayo. Bala uJohane 2:1-11 beselixoxa ngemibuzo le:
-
Isimangaliso lesi sitshengisa ukuthi uJesu wayekubona njani ukunatha utshwala?
-
Njengoba uJesu engazange athi ukunatha utshwala kubi, kumele simsole yini umKhristu okhetha ukunatha?
Ukuba lenkululeko yokunatha akutsho ukuthi sokumele unathe ngaloba yisiphi isikhathi. Bala iZaga 22:3 beselixoxa ngokuthi kuqondile yini ukunatha nxa:
-
Uzatshayela kumbe usebenzise umtshina othile?
-
Uzithwele?
-
Udokotela ekutshele ukuthi unganathi?
-
Kuyikuthi kunzima ukuyekela ungavele ubuqalise?
-
Umthetho kahulumende ungakuvumeli ukuthi unathe?
-
Ulomuntu ongasafuni kubuthinta ngenxa yohlupho lokudakwa ayelalo kudala?
Bukelani IVIDIYO ukuze ubone ukuthi kuyini okungakunceda ukhethe kuhle nxa ufuna kube lotshwala emtshadweni wakho loba komunye nje umbuthano ozawuhlela.
Bala uRoma 13:13 lo-1 Khorinte 10:31, 32 beselixoxa ngombuzo olandelayo ngemva kokubala umbhalo ngamunye:
-
Ivesi le ingakunceda njani ukuthi ukhethe ngendlela ezathokozisa uJehova?
UmKhristu ngamunye uyazikhethela ukuthi uyafuna yini ukunatha utshwala loba hatshi. Lanxa engabe ebunatha, kwezinye izikhathi angakhetha ukunganathi
5. Kumele unathe utshwala obunganani?
Nxa ukhetha ukunatha utshwala kumele ukhumbule ukuthi uJehova kafuni sidakwe. Ngenxa yani? Bala uHoseya 4:11, 18 beselixoxa ngombuzo olandelayo:
-
Kuyini okwenzakalayo nxa umuntu anganatha kakhulu?
Kuyini okuzakunceda ukuthi unganathi kakhulu? Yikuzibamba lokuzifakela umngcele. Bala iZaga 11:2 beselixoxa ngombuzo lo:
-
Kungani kuqakathekile ukuzifakela umngcele endabeni yokunatha?
6. Ungalunqoba uhlupho lokudakwa!
Bukela ividiyo le ukuze ubone ukuthi kuyini okwanceda eyinye indoda ukuthi itshiye ukudakwa. Bukelani IVIDIYO beselixoxa ngemibuzo elandelayo.
-
UDmitry wayesenzani angadakwa?
-
Kwakulula yini ukuthi atshiye ukunatha?
-
Kuyini okwamnceda ukuthi anqobe uhlupho ayelalo?
Bala u-1 Khorinte 6:10, 11 beselixoxa ngemibuzo le:
-
IBhayibhili lithini ngokudakwa?
-
Kuyini okutshengisa ukuthi umuntu olohlupho lokudakwa angenelisa ukutshintsha?
Bala uMathewu 5:30 beselixoxa ngombuzo olandelayo:
-
UJesu wasebenzisa umzekeliso wokuquma isandla ukuze atshengise ukuthi kumele sizimisele ukulahlekelwa nxa sifuna ukuthokozisa uJehova. Kuyini okumele ukwenze nxa ukutshiya ukudakwa kukuthwalise nzima? a
Bala u-1 Khorinte 15:33 beselixoxa ngombuzo lo:
-
Kuzakwenzakalani nxa ulabangane abanatha kakhulu?
NXA OMUNYE ANGATHI: “Kubi yini ukunatha?”
-
Ungamphendula usithini umuntu otshonjalo?
ISIFINQO
Utshwala yisipho uJehova asiphe sona kodwa kafuni ukuthi labo abakhetha ukunatha banathe kakhulu kumbe badakwe.
Ufundeni?
-
IBhayibhili lithini ngotshwala?
-
Kungani kuyingozi ukunatha kakhulu?
-
Singatshengisa njani ukuthi siyabahlonipha abanye endabeni yokunatha utshwala?
THOLA OKUNENGI
Bukela ividiyo le ukuze uthole amacebo anganceda abasakhulayo endabeni yokunatha utshwala.
Bala isihloko lesi ukuze uthole amacebo angakunceda nxa ulohlupho lokunatha kakhulu.
“Amacebo Azakunceda Ukuthi Unganathi Wedlulise” (INqabayokulinda, January 1, 2010)
Kuqondile yini ukuthi amaKhristu eqiniso atshayanise ama-glass nxa enatha? Bala isihloko lesi ukuze uthole impendulo.
“Imibuzo Ebuzwa Ngabafundi” (INqabayokulinda, February 15, 2007)
Bala isihloko esithi “Ngangibukhelela Okuzwayo” ukuze ubone okwanceda eyinye indoda ukuthi itshiye ukunatha kakhulu.
“IBhayibhili Liyamntshintsha Umuntu” (INqabayokulinda, May 1, 2012)
a Labo abalohlupho lokunatha kakhulu kumele babonane labezempilakahle ukuze babancedise ukutshiya umkhuba lo. Odokotela abanengi bathi kungcono ukuthi umuntu olohlupho lolu angasabuthinti utshwala.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
