ISIFUNDO 49
Kuyini Okungenza Imuli Ithokoze?—Ingxenye 1
Abantu abatshadayo bafisa ukuthi intokozo ababalayo mhla betshada ihlale ikhona. Okuhle yikuthi lokhu kungenzakala sibili. AmaKhristu aselesikhathi eside etshadile futhi esebenzisa amacebo aseBhayibhilini ayakuvuma lokhu.
1. IBhayibhili lithi indoda kumele yenzeni?
UJehova unike indoda umsebenzi wokuba yinhloko yemuli. (Bala u-Efesu 5:23.) Ukhangelele ukuthi yenze izinqumo ezinceda imuli yayo. IBhayibhili lithi: “Madoda qhubekani lithanda omkenu.” (Kwabase-Efesu 5:25) Amazwi la atsho ukuthi indoda kumele imphathe kuhle umkayo kungelani lokuthi bangekhaya kumbe baphakathi kwabantu. Kumele imvikele kuloba yini engamlimaza, imthande njalo isebenze nzima ukuze imnakekele. (1 KuThimothi 5:8) Okuqakatheke kakhulu okumele ikwenze yikuncedisa umkayo ekukhonzeni. (UMathewu 4:4) Ngokwesibonelo, kufanele ikhuleke laye futhi babale iBhayibhili ndawonye. Nxa indoda imthanda umkayo izahlala ingumngane kaJehova.—Bala u-1 Phetro 3:7.
2. IBhayibhili lithi inkosikazi kumele yenzeni?
ILizwi likaNkulunkulu lithi inkosikazi “kumele iyihloniphe kakhulu indoda yayo.” (Kwabase-Efesu 5:33) Okungayinceda ukuthi ikwenze lokhu yikucabangisisa ngokuhle okwenziwa ngumkayo ukuze anakekele imuli. Eyinye indlela engatshengisa ngayo ukuthi iyamhlonipha umkayo yikusekela izinqumo ayabe ezenza, ukukhuluma laye kuhle langokungameyisi ebantwini. Lokhu kumele ikwenze kungelani lokuthi umkayo nguFakazi yini loba hatshi.
3. Indoda lomkayo kumele benzeni ukuze bahlale bethandana?
IBhayibhili lithi indoda lomkayo abatshadileyo ‘banyamanye.’ (UMathewu 19:5) Lokhu kutsho ukuthi akumelanga bavumele loba yini iphambanise uthando lwabo. Uthando lolu bangaluqinisa ngokuba lesikhathi sokuba ndawonye futhi bakhululeke ukuxoxa ngalokho abakucabangayo lendlela abazizwa ngayo. Ngamunye wabo kumele ananzelele ukuthi kathandi omunye umuntu kumbe olunye ulutho ukwedlula umkakhe. UJehova nguye yedwa okumele bamthande kakhulu ukwedlula loba ngubani.
GEBHA UJULE
Engxenyeni le sizaxoxa ngamacebo aseBhayibhilini azakunceda ukuthi uthokoze emulini yakho.
4. Madoda, thandani omkenu futhi libanakekele
IBhayibhili lithi amadoda “kumele athande omkawo ngendlela athanda ngayo imizimba yawo.” (Kwabase-Efesu 5:28, 29) Kutshoni lokhu? Bukelani IVIDIYO beselixoxa ngombuzo olandelayo.
-
Indoda ingamtshengisa njani umkayo ukuthi iyamthanda lokuthi ilendaba laye?
Bala uKholose 3:12 beselixoxa ngombuzo lo:
-
Ivesi le ithi indoda kumele imphathe njani umkayo?
5. Makhosikazi, thandani omkenu futhi libahloniphe
IBhayibhili lithi inkosikazi kumele ihloniphe umkayo kungelani lokuthi uyakhonza yini loba hatshi. Bala u-1 Phetro 3:1, 2 beselixoxa ngemibuzo le:
-
Nxa umkakho engasoFakazi, akuthandabuzwa ukuthi ulesifiso sokuthi acine ekhonza uJehova njengawe. Kodwa ubona angani yiphi indlela engcono ongamnceda ngayo? Yikuhlala umtshumayeza yini kumbe yikuzehlisa kuye lokuziphatha kuhle? Kungani usitsho njalo?
Indoda lomkayo kumele benze izinqumo bendawonye. Kodwa ngezinye izikhathi inkosikazi ingabe ingavumelani lesinqumo esenziwe ngumkayo. Nxa kungaba lesimo esinjalo, inkosikazi kumele iveze umbono wayo ngomusa langenhlonipho kodwa ikhumbule ukuthi uJehova unike umkayo umsebenzi wokwenza izinqumo ezizanceda imuli. Kufanele izame ngamandla wonke ukusekela isinqumo esenziweyo. Nxa inkosikazi ingakwenza lokhu, kuzaba lentokozo lokuzwanana emulini. Bala u-1 Phetro 3:3-5 beselixoxa ngombuzo olandelayo:
-
UJehova uzwa njani nxa inkosikazi ihlonipha umkayo?
6. Lingenelisa ukulungisa inhlupho ezibakhona emulini
Akulamuli engakaze yehlelwe zinhlupho. Ngakho kuqakathekile ukuthi indoda lomkayo babambisane ekulungiseni inhlupho ezibakhona. Bukelani IVIDIYO beselixoxa ngemibuzo elandelayo.
-
Kuyini okutshengisa ukuthi indoda lomkayo obabone kuvidiyo babengasathandani njengakuqala?
-
Kuyini abakwenzayo ukuze bavuselele uthando lwabo?
Bala u-1 Khorinte 10:24 loKholose 3:13 beselixoxa ngombuzo olandelayo ngemva kokubala umbhalo ngamunye:
-
Ukusebenzisa okutshiwo ngamavesi la kungayinceda njani imuli yakho?
IBhayibhili lithi kumele sihloniphane. Ukuhlonipha abanye kutsho ukubaphatha ngomusa langendlela ebenza babe lesithunzi. Bala uRoma 12:10 beselixoxa ngemibuzo le:
-
Ngubani okumele akhokhele ekuhlonipheni omunye emulini? Kungani usitsho njalo?
ABANYE BATHI: “Mina lomkami asisathandani ngendlela esasithandana ngayo kuqala.”
-
Ungabancedisa njani usebenzisa iBhayibhili?
ISIFINQO
Indoda lomkayo bazathokoza nxa bethandana, behloniphana futhi besebenzisa izimiso eziseBhayibhilini.
Ufundeni?
-
Kuyini okumele kwenziwe yindoda ukuze imuli yayo ithokoze?
-
Kuyini okumele kwenziwe yinkosikazi ukuze imuli yayo ithokoze?
-
Yisiphi isimiso esiseBhayibhilini esinganceda indoda lomkayo ukuthi bathokoze?
THOLA OKUNENGI
Bala ibhukwana leli ukuze uthole amacebo angakunceda ukuthi uthokoze emulini yakho.
Bukela ividiyo yengoma le ubone ukuthi ukusebenzisa esikutshelwa nguNkulunkulu kungakunceda njani ukuthi uthokoze emulini yakho.
Bala isihloko lesi uzwe ukuthi kungani kumele inkosikazi izehlise kumkayo.
“Kungani Kumele Amakhosikazi Azehlise Kubomkawo?” (INqabayokulinda, May 15, 2010)
Bukela ividiyo le ubone ukuthi kuyini okwanceda indoda lomkayo abake badivosa ukuthi baphinde babe ndawonye.
UNkulunkulu Wasincedisa Ukuthi Silungisise Umtshado Wethu (5:14)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
