Nxa siphakathi kwabafowethu labodadewethu sizwa njengeNkosi uDavida eyathi: “Khangela ukuthi kuhle kangakanani lokuthi kumnandi njani ukuthi abazalwane bahlale ndawonye bemanyene!” (IHubo 133:1) Ngamunye wethu kukhona okumele akwenze ngoba ukumanyana lokhu akuzenzakaleli.

1. Kuyini okwenza abantu bakaNkulunkulu bamanyane?

Nxa ungangena imihlangano yethu kwelinye ilizwe awusoze uzizwe ulahlekile lanxa kukhulunywa ulimi ongaluzwayo. Lokhu kubangelwa yikuthi oFakazi bakaJehova balothando njalo bafunda izinto ezifananayo kungelani lokuthi bahlala ngaphi. Kanti njalo bonke ‘babiza ibizo likaJehova’ futhi ‘bamkhonza bemanyene.’—UZefaniya 3:9.

2. Ungenzani ukuze kuhlale kulokuthula?

“Thandanani kakhulu ngenhliziyo yonke.” (1 UPhetro 1:22) Ungayisebenzisa njani ivesi le? Kulokuthi ukhangele amaphutha abanye, zama ukubona okuhle abakwenzayo. Jayelana labafowethu labodadewethu abatshiyeneyo, hatshi labo abathanda izinto ozithandayo kuphela. Kanti njalo zama ngamandla wonke ukulwisana laloba yiluphi ubandlululo ongabe ulalo.—Bala u-1 Phetro 2:17. a

3. Kumele wenzeni nxa kulokungazwanani phakathi kwakho lomunye ebandleni?

Lanxa simanyene, sonke siyake siphambanise. Ngezinye izikhathi siyake senze izinto ezizwisa abanye ubuhlungu kumbe ezibacaphulayo. Lokhu yikho okwenza iLizwi likaNkulunkulu lithi: “Qhubekani . . . lithethelelana . . . Njengoba nje uJehova walithethelela ngenhliziyo yonke, lani kufanele lenze njalo.” (Bala uKholose 3:13.) Simphambanisela kanengi uJehova kodwa uyasithethelela. Yikho ukhangelele ukuthi lathi sibathethelele abanye. Nxa ungananzelela ukuthi okwenzileyo kuzwise omunye ubuhlungu, zama ukuyilungisa masinyane indaba yakhona.—Bala uMathewu 5:23, 24. b

 GEBHA UJULE

4. Lwisana lobandlululo

Kumele sibathande bonke abafowethu labodadewethu. Kodwa engxenye kukuthwalisa nzima ukuthanda abafowethu beminye imihlobo. Kuyini okungakunceda nxa kunjalo? Bala imiSebenzi 10:34, 35 beselixoxa ngemibuzo elandelayo:

• UJehova kakhethi kodwa wamukela bonke abantu abafuna ukuba ngoFakazi bakhe. Ubona angani kumele ubaphathe njani abantu beminye imihlobo?

• Kuyini okwenza abantu babandlululane endaweni ohlala kuyo? Kungani kungamelanga wenze njengabo?

Bala u-2 Khorinte 6:11-13 beselixoxa ngombuzo lo:

• Ubona angani ungenzani ukuze uthande abafowenu labodadewenu beminye imihlobo?

5. Zimisele ukuthethelela abanye lokwenza ukuthi kube lokuthula

UJehova uyasithethelela ngenhliziyo yonke lanxa engasoze adinge ukuthi lathi simthethelele ngelinye ilanga. Bala iHubo 86:5 beselixoxa ngemibuzo le:

• Ivesi le isifundisani ngoJehova?

• Uzwa njani ngokuthi uJehova uyakuthethelela?

• Kuyini okungaphambanisa ukuthula okusebandleni?

Singamlingisela njani uJehova ukuze siqhubeke simanyene labafowethu labodadewethu? Bala iZaga 19:11 beselixoxa ngombuzo olandelayo:

• Kumele wenzeni nxa omunye umuntu angakucaphula kumbe akuzwise ubuhlungu?

 Sonke siyake sibaphambanisele abanye. Kumele senzeni nxa kungenzakala lokhu? Bukelani IVIDIYO beselixoxa ngombuzo olandelayo.

• Kuyini okwenziwe ngudadewethu ukuze kube lokuthula?

 ISIFINQO

Nxa ungumuntu othethelelayo futhi ubathanda abafowethu labodadewethu, uzakwenza ukuthi kuhlale kulokuthula ebandleni.

Ufundeni?

• Kuyini okungakunceda ukuthi ulwisane lobandlululo?

• Kumele wenzeni nxa kulokungazwanani phakathi kwakho lomunye ebandleni?

• Kungani ufuna ukulingisela uJehova endabeni yokuthethelela abanye?