ISIFUNDO 58
Hlala Uthembekile KuJehova
AmaKhristu eqiniso azimisele ukungavumeli loba yini iphambanise ubungane bawo loJehova. Akuthandabuzwa ukuthi lawe uyafuna ukuhlala uthembekile kuJehova futhi nxa ungenza njalo yena uzaqhubeka ekuthanda. (Bala u-1 ImiLando 28:9.) Kodwa kuyini okungenza kube nzima ukuthi uhlale uthembekile? Ungalwisana njani lobunzima lobo?
1. Ngobani abangasiphambanisa ekukhonzeni?
Abanye abantu bangazama ukusiyekelisa ukukhonza uJehova. Ngobani? Abanye bakhona yilabo asebatshiya ukuba ngoFakazi baqalisa ukuqamba amanga ngenhlanganiso kaNkulunkulu ukuze basiphambule ekukholweni. Babizwa ngokuthi ngabahlamuki. Abanye abaqamba amanga ngathi ngabakhokheli bamasonto futhi abanye abantu bayawakholwa amanga lawo besebetshiya iqiniso. Kuyingozi ukuzama ukuxoxisana labantu abaphikisana lathi kumbe ukubukela amavidiyo abo, ukubala izinto abazibhala ku-inthanethi loba emabhukwini abo. UJesu wakhuluma ngalabo abazama ukuyekelisa abanye ukukhonza uJehova wathi: “Batshiyeni benjalo, bangabakhokheli abayiziphofu. Manje nxa isiphofu sikhokhela esinye isiphofu, zombili zizawela egodini.”—UMathewu 15:14.
2. Kuyini okungamelanga sikwenze ukuze sitshengise ukuthi sithembekile kuJehova?
Ukuthanda uJehova kumele kusenze sizimisele ukungazihlanganisi laloba yini ephathelane lamasonto amanga. Ngokwesibonelo, kasamukeli imisebenzi, sijoyine izinhlanganiso kumbe senze loba yini esekela amasonto amanga. UJehova uthi: “Phumani kuyo [iBhabhiloni Enkulu] bantu bami.”—ISambulo 18:2, 4.
GEBHA UJULE
Engxenyeni le uzabona okungakunceda ukuthi uhlale uthembekile kuJehova. Uzabona lokuthi ungenzani ukuze uphume uphele eBhabhiloni Enkulu.
3. Qaphela abantu abafundisa amanga
Kumele senzeni nxa singezwa izinto ezingamanga mayelana lenhlanganiso kaJehova? Bala iZaga 14:15 beselixoxa ngombuzo lo:
-
Kungani kungamelanga sikholwe yonke into esiyizwayo?
Bala u-2 Johane 9-11 beselixoxa ngemibuzo elandelayo:
-
Kumele senzeni ukuze singayengwa ngabahlamuki?
-
Lanxa singeke sikhulume labahlamuki mathupha, yiziphi izindlela ezicatshileyo abangazisebenzisa ukuthintana lathi?
-
Ubona angani uJehova angezwa njani nxa singalalela amanga akhulunywa ngabantu ngaye kumbe ngenhlanganiso yakhe?
4. Thembeka kuNkulunkulu nxa omunye ebandleni angenza isono
Kumele wenzeni nxa ungabakwazi ukuthi omunye ebandleni wenze isono esikhulu? Ake sixoxe ngomthetho uNkulunkulu awunika abako-Israyeli. Bala uLevi 5:1.
Ivesi le isikhuthaza ukuthi sitshele abadala bebandla nxa singabakwazi ukuthi omunye umuntu ebandleni wenze isono esikhulu. Kodwa kumele siqale simkhuthaze ukuthi aye ebadaleni abatshele ngesono asenzileyo. Nxa angayekela ukuyabatshela, kuyabe sokumele sitshengise ukuthi sithembekile kuJehova ngokuyabatshela. Ukwenza njalo kutshengisa njani ukuthi . . .
-
siyamthanda uJehova uNkulunkulu?
-
siyamthanda lowo owenze isono?
-
siyabathanda abanye ebandleni?
Nxa umfowenu engenza isono esikhulu kumele umncede
5. Phuma uphele eBhabhiloni Enkulu
Bala uLukha 4:8 loSambulo 18:4, 5 beselixoxa ngemibuzo elandelayo:
-
Usuvalelisile yini kuloba yiphi isonto owawuyingena futhi wabachasisela ukuthi awuseyikuba lilunga layo?
-
Ikhona yini inhlanganiso okuyo esekela isonto ethile?
-
Umsebenzi owenzayo usekela amasonto amanga yini?
-
Zikhona yini izinto ezikuhlanganisa lamasonto amanga okumele utshiyane lazo?
-
Nxa ukhona umbuzo owuphendule ngo-yebo, ubona angani kumele ulungisise yini?
Okhetha ukukwenza kumele kukutshiye ulomzwangedwa ohlanzekileyo njalo kutshengise ukuthi uthembekile kuJehova.
Uzakwenzani nxa ungacelwa imali ezasetshenziswa ukusekela inhlelo zesonto ethile?
ABANYE BATHI: “Kumele ngizizwele ukuthi abahlamuki bathini ngoFakazi bakaJehova ukuze ngilwele iqiniso.”
-
Kuyingozi yini ukwenza njalo? Kungani usitsho njalo?
ISIFINQO
Ukuze sihlale sithembekile kuJehova, akumelanga sibe lobudlelwano labantu abazama ukusidukisa.
Ufundeni?
-
Kungani kungamelanga silalele abahlamuki?
-
Kumele wenzeni nxa ungabakwazi ukuthi omunye ebandleni wenze isono esikhulu?
-
Singenzani ukuze siphume siphele emasontweni amanga?
THOLA OKUNENGI
Bala isihloko lesi uzwe ukuthi kumele wenzeni nxa ungezwa amanga aqanjelwa oFakazi bakaJehova.
Bala isihloko lesi uzwe ukuthi ungazibona njani inhlanganiso ezisekela iBhabhiloni Enkulu.
Bukela ividiyo le ukuze ubone ukuthi abanye abantu abaphikisana lathi bazama njani ukuxegisa ukholo lwethu.
Bala isihloko esithi “Ngangifisa Ukwazi UNkulunkulu Kusukela Ngimncane” uzwe ukuthi kuyini okwenza omunye umphristi watshiya isonto ayeyingena.
“IBhayibhili Liyamntshintsha Umuntu” (INqabayokulinda, July 1, 2011)
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
