1 KwabaseKhorinte 13:1-13
-
Uthando—indlela engcono kulazo zonke (1-13)
13 Nxa ngikhuluma ngezindimi zabantu lezezingilosi kodwa ngingelathando, ngiyinsimbi elomsindo loba ekhencezayo.
2 Nxa ngilesipho sokuphrofetha futhi ngizwisisa zonke imfihlo ezingcwele lalo lonke ulwazi, njalo ngilalo lonke ukholo olungasusa izintaba kodwa ngingelathando, kangisilutho.*
3 Nxa nginganikela ngempahla yami ukuze ngisuthise abanye, nginikele langomzimba wami ukuze ngizigqaje kodwa ngingelathando, kangitholi lutho ngitsho.
4 Uthando luyabekezela njalo lulomusa. Uthando kalulamhawu. Kaluzitshayi isifuba, kaluzikhukhumezi,
5 kaluziphathi ngendlela engafanelanga,* kaluzifuneli okwalo, kalucaphuki. Kalugcini izikhwili.
6 Kaluthokoziswa ngokungalunganga kodwa luthokoziswa liqiniso.
7 Lubekezelela zonke izinto, lukholwa zonke izinto, luthemba zonke izinto, luqinisela ezintweni zonke.
8 Uthando kalupheli. Kodwa nxa kulezipho zokuphrofetha, zizaqedwa; nxa kulezindimi,* zizaphela; nxa kulolwazi, luzaqedwa
9 ngoba ulwazi esilalo kaluphelelanga lesikuphrofethayo kakuphelelanga.
10 Kodwa nxa okupheleleyo kungafika, okungaphelelanga kuzaqedwa.
11 Ngisesengumntwana ngangikhuluma njengomntwana, ngicabanga njengomntwana, nginakana njengomntwana; kodwa khathesi njengoba sengingumuntu omdala, sengiyitshiyile imikhuba yobuntwana.
12 Khathesi kasiboni kuhle* ngesibuko sensimbi, kodwa ngemva kwalokho sizabona kuhle njengabantu ababonana ubuso ngobuso. Khathesi ulwazi engilalo kalwenelanga kodwa ngizakuba lolwazi oluqondileyo,* njengoba nje ngisaziwa kuhle.
13 Loba kunjalo kuzasala izinto lezi ezintathu: ukholo, lethemba, lothando; kodwa okukhulu kulakho konke luthando.
Amabala angaphansi
^ Kumbe, “kangilancedo.”
^ Kumbe, “kalusisosiqholo.”
^ Lapha kutshiwo ukukhuluma ezinye izindimi ngendlela eyisimangaliso.
^ Kumbe, “sibona buvilibana.”
^ Kumbe, “olugcweleyo.”
