1 KwabaseThesalonika 1:1-10
1 Mina Phawuli loSilivanu* loThimothi, kini lina elisebandleni leThesalonika elimanyene loNkulunkulu uBaba kanye leNkosi uJesu Khristu:
Umusa omkhulu lokuthula kakube kini.
2 Sihlala simbonga uNkulunkulu nxa siliqamba lonke emithandazweni yethu,
3 ngoba umsebenzi elawenza ngenxa yokholo lwenu siqhubeka siwukhumbula phambi kukaNkulunkulu wethu uBaba. Siyakukhumbula lokusebenza kwenu ngenxa yothando, kanye lokuqinisela kwenu ngenxa yethemba elilalo eNkosini yethu uJesu Khristu.
4 Bafowethu abathandwa nguNkulunkulu, siyakwazi ukuthi yena walikhetha
5 ngoba izindaba ezinhle esizitshumayelayo kazifikanga kini ngelizwi kuphela kodwa langamandla kanye lomoya ongcwele, njalo labona ukuthi sasingathandabuzi ukuthi esasilitshela khona kuliqiniso, njengoba likwazi ukuthi sasingabantu abanjani phakathi kwenu sisenzela ukulinceda.
6 Kanti njalo lasilingisela thina lalingisela leNkosi, njengoba lemukela ilizwi ngentokozo evela emoyeni ongcwele lanxa lahlupheka kakhulu,
7 futhi lokhu kwenza laba yisibonelo kubo bonke abakholwayo abaseMakhedoniya lase-Akhaya.
8 Ilizwi likaJehova elivela kini kalizwakalanga eMakhedoniya lase-Akhaya kuphela, kodwa lasezindaweni zonke abantu sebezwile ngokholo lwenu kuNkulunkulu okokuthi akusadingeki ukuthi thina sikhulume.
9 Bona ngokwabo baqhubeka besitshela ngokubonana kwethu lani okokuqala, langendlela elaphendukela ngayo kuNkulunkulu litshiya izithombe zenu ukuze libe yizigqili zikaNkulunkulu ophilayo loweqiniso,
10 lilindele iNdodana yakhe evela emazulwini ayivusa kwabafileyo, uJesu osihlenga elakeni oluzayo.
Amabala angaphansi
^ Obizwa langokuthi nguSila.
