2 KwabaseKhorinte 13:1-14
13 Sengisiza kini okwesithathu. “Yonke indaba kumele iqiniswe yibufakazi obuvela kubofakazi* ababili kumbe abathathu.”
2 Lanxa khathesi ngingekho kini, kufanana lokuthi ngilani okwesibili njalo ngibaxwayisa kuseselesikhathi abake benza isono labanye bonke ukuthi nxa ngingaphinda ngifike, kangisoze ngiyekele ukubalaya,
3 njengoba lidinga ubufakazi bokuthi uKhristu ukhuluma esebenzisa mina sibili. Yena kabuthakathaka phakathi kwenu, kodwa ulamandla.
4 Lanxa wabulawa ngokubethelwa esigodweni ngenxa yobuthakathaka, uyaphila ngenxa yamandla kaNkulunkulu. Thina sibuthakathaka kanye laye sibili kodwa sizaphila laye ngenxa yamandla kaNkulunkulu akini.
5 Qhubekani lizihlola ukuthi lisekukholweni yini; qhubekani lizihlolisisa ukuthi lingabantu abanjani. Kalinanzeleli yini ukuthi uJesu Khristu umanyene lani? Ngaphandle nxa kuyikuthi kalemukelwa.
6 Ngithemba lizananzelela ukuthi thina siyemukelwa.
7 Khathesi sithandaza kuNkulunkulu ukuthi lingenzi lutho olubi, kodwa lokho kasikwenzeli ukuthi kukhanye angathi siyemukelwa. Sikwenzela ukuthi lenze okuhle lanxa kungakhanya angathi thina kasemukelwa.
8 Kasingeke senze lutho oluphikisana leqiniso, senza okuvumelana leqiniso kuphela.
9 Sihlala sithokoza kakhulu nxa sibuthakathaka lina lilamandla njalo esikuthandazelayo yikuthi lilungisiswe.
10 Yikho ngibhala izinto lezi ngingekho kini, ngisenzela ukuthi nxa sengifikile ngingabi lesihluku nxa sengisebenzisa amandla engawaphiwa yiNkosi ukuze ngilakhe, ngingalidilizi.
11 Okokucina bafowethu qhubekani lithokoza, lilungisiswa, liduduzwa, livumelana emicabangweni yenu, lihlala ngokuthula; lingenza njalo uNkulunkulu wothando lokuthula uzakuba lani.
12 Bingelelanani ngokuqabuzana okungcwele.
13 Bonke abangcwele bayalibingelela.
14 Umusa omkhulu weNkosi uJesu Khristu lothando lukaNkulunkulu kanye lomoya ongcwele olincedayo kakube lani lonke.
Amabala angaphansi
^ NgesiGrikhi, “ngumlomo wabofakazi.”
