KumaHebheru 1:1-14
1 Endulo uNkulunkulu wakhuluma labokhokho bethu kanengi langezindlela ezinengi esebenzisa abaphrofethi.
2 Kodwa ekucineni kwensuku lezi ukhulume lathi esebenzisa iNdodana, leyo ayibeka ukuthi ibe yindlalifa yezinto zonke futhi ayisebenzisa ukwenza umumo wezinto.*
3 Ibonakalisa inkazimulo kaNkulunkulu njalo iyiwo kanye umfanekiso wakhe uqobo futhi iphethe izinto zonke ngelizwi lamandla ayo. Yathi isihlambulule izono zethu yahlala esandleni sokudla sikaNkulunkulu Omkhulu, khonale phezulu.
4 Ngakho isibe ngcono kakhulu kulezingilosi okokuthi isize yathola ilifa, elilibizo elihle kakhulu kulelazo.
5 Ngokwesibonelo yiphi ingilosi uNkulunkulu ake wathi kuyo: “Wena uyindodana yami; lamuhla sengibe nguyihlo”? Waphinda wathi: “Ngizakuba nguyise, yena uzakuba yindodana yami”?
6 Kodwa lapho esephinde waletha iZibulo lakhe emhlabeni, uthi: “Zonke izingilosi zikaNkulunkulu kazimkhothamele.”
7 Kanti njalo, mayelana lezingilosi uthi: “Izingilosi zakhe uzenza zibe yizidalwa zomoya, lezikhonzi zakhe* zibe lilangabi lomlilo.”
8 Kodwa mayelana leNdodana uthi: “UNkulunkulu uyisihlalo sakho sobukhosi kuze kube nini lanini, lentonga yoMbuso wakho iyintonga yokulunga.*
9 Wena ukuthandile ukulunga, wazonda ukungabi lamthetho. Yikho uNkulunkulu, uNkulunkulu wakho, wakugcoba ngamafutha entokozo eyedlula eyabanye bakho.”
10 Kuphinda kuthiwe: “Ekuqaleni, wena Nkosi, wabeka izisekelo zomhlaba njalo amazulu ayimisebenzi yezandla zakho.
11 Bazatshabalala kodwa wena uzasala; bonke bazaguga njengesembatho,
12 uzabagoqa njengejazi, ubagoqe njengesembatho futhi bazantshintshwa. Kodwa wena kawuntshintshi njalo iminyaka yakho kayisoze iphele.”
13 Lanxa kunjalo, yiphi ingilosi ake athi kuyo: “Hlala esandleni sami sokudla ngize ngenze izitha zakho zibe yisenabelo* senyawo zakho”?
14 Kanti izingilosi zonke kazisimimoya eyenza inkonzo engcwele* yini, ethunywa ukuthi iyencedisa labo abazathola ilifa lensindiso?
Amabala angaphansi
^ Ibala lesiGrikhi elisetshenziswe lapha ngelithi “umumo wezinto” njalo lisebunengini. Khangela iNgcazelo Yamabala.
^ Kumbe, “lezinceku zomphakathi.”
^ Kumbe, “yokwahlulela okuhle.”
^ Lapha kutshiwo ibhentshi elincane umuntu abeka kulo inyawo nxa ehlezi esitulweni.
^ Kumbe, “inkonzo yomphakathi.”