KwabaseGalathiya 6:1-18
6 Bafowethu, nxa umuntu esephambuka engananzeleli, lina elikhokhelwa ngumoya zamani ukumlungisisa umuntu onjalo, likwenze lokhu ngomoya omnene. Loba kunjalo zinanzeleleni ukuze lani lingacini selilingwa.
2 Qhubekani lithwalisana imithwalo yenu esindayo. Nxa lisenza njalo lizawugcwalisa umthetho kaKhristu.
3 Loba ngubani ocabanga ukuthi uqakathekile yena engasilutho uyaziyenga.
4 Kodwa umuntu ngamunye kahlole ezakhe izenzo, lapho-ke uzakuba lesizatho sokuthokoza ngalokho yena akwenzayo, hatshi ngokuziqathanisa lomunye,
5 ngoba umuntu ngamunye uzazithwalela umthwalo* wakhe.
6 Kanti njalo lowo ofundiswa ilizwi* kabelane zonke izinto ezinhle lalowo omfundisayo.
7 Lingayengwa: UNkulunkulu ngeke aqilwe. Loba yini umuntu ayihlanyelayo uzavuna yona futhi,
8 ngoba lowo ohlanyela ehlose ukuthokozisa inyama yakhe uzavuna ukonakala enyameni yakhe, kodwa ohlanyela efuna ukuthokozisa umoya uzavuna ukuphila okungapheliyo kulowomoya.
9 Yikho-ke kasingayekeli ukwenza okuhle ngoba ngesikhathi esifaneleyo sizavuna nxa kuyikuthi kasidinwa.*
10 Ngakho nxa nje siseselethuba, kasenzeni okuhle kubo bonke, kodwa ikakhulu kulabo abangabemuli yethu yabakholwayo.*
11 Khangelani ukuthi ngibhale ngamabala amakhulu njani, ngilibhalela ngesami isandla.
12 Bonke abafuna ukubukwa ngabantu yibo abazama ukulicindezela ukuthi lisokwe, njalo lokho bakwenzela nje ukuthi babalekele ukuhlukuluzwa ngenxa yesigodo sokuhlutshwa* sikaKhristu.
13 Phela lalabo abasokwayo kabawugcini uMthetho, kodwa bafuna ukuthi lisokwe ukuze babe lesizatho sokuzigqaja ngenyama yenu.
14 Kodwa mina kangisoze ngizigqaje ngalutho ngaphandle kwesigodo sokuhlutshwa* seNkosi yethu uJesu Khristu. Kimi umhlaba usufile* ngenxa yakhe, njalo emhlabeni mina ngifile ngenxa yakhe.
15 Ukusoka loba ukungasoki akuqakathekanga, okuqakathekileyo yisidalwa esitsha.
16 Bonke abaphila kuhle belandela isimiso lesi, labo abangu-Israyeli kaNkulunkulu, kababe lokuthula lesihawu.
17 Kusukela lamuhla kakungabi lomuntu ongihluphayo ngoba emzimbeni wami ngilezimpawu zokuba* yisigqili sikaJesu.
18 Umusa omkhulu weNkosi yethu uJesu Khristu kawube lomoya wenu* bafowethu. Ameni.
Amabala angaphansi
^ Kumbe, “umlandu.”
^ Kumbe, “ofundiswa ilizwi ngomlomo.”
^ Kumbe, “kasikhalali.”
^ Kumbe, “esimanyene labo ekukholweni.”
^ Khangela iNgcazelo Yamabala.
^ Khangela iNgcazelo Yamabala.
^ Kumbe, “usubethelwe esigodweni.”
^ Kumbe, “ngilemitshiso yokuba.”
^ Kumbe, “lendlela elicabanga ngayo.”
