Eyokuqala EyemiLando 10:1-14
-
USawuli lamadodana akhe bayafa (1-14)
10 Ngalesosikhathi amaFilisti ayesilwa labako-Israyeli. Amadoda ako-Israyeli abaleka, kwabulawa amabutho awo amanengi entabeni iGilibhowa.+
2 AmaFilisti amhlala izithende uSawuli lamadodana akhe, abulala amadodana akhe uJonathani lo-Abhinadabi loMalikhi-shuwa.+
3 Impi yatshisa kwaba nzima kuSawuli, abatshoka imitshoko bamthola bamlimaza.+
4 USawuli wasetshela inceku yakhe eyayimthwalela izikhali wathi: “Hwatsha inkemba yakho ungigwaze ukuze amadoda la angasokanga angangifici abesengenza isihluku.”+ Kodwa inceku yakhe yayingafuni ngoba yayisesaba kakhulu. Ngakho uSawuli wathatha inkemba yakhe wawela phezu kwayo.+
5 Inceku eyayimthwalela izikhali yathi ibona ukuthi uSawuli usefile, layo yathatha inkemba yayo yawela phezu kwayo yafa.
6 Ngakho uSawuli lamadodana akhe amathathu labo bonke abendlu yakhe bafa ndawonye.+
7 Bonke abako-Israyeli ababesesigodini bathi benanzelela ukuthi wonke amabutho abalekile empini lokuthi uSawuli lamadodana akhe basebefile, baphuma emadolobheni abo babaleka, amaFilisti afika azihlalela kuwo.
8 Ngelanga elilandelayo amaFilisti athi esezothatha impahla yalabo ababebulewe, athola uSawuli lamadodana akhe befile entabeni iGilibhowa.+
9 Yikho amkhipha izigqoko njalo amquma ikhanda aselithatha, athatha lezigqoko zakhe zempi. AmaFilisti athumela ilizwi kulo lonke ilizwe lawo ukuze kubikwe ezithombeni zawo+ lasebantwini.
10 Afaka izigqoko zakhe zempi endlini kankulunkulu* wawo, abethela ukhakhayi lwakhe endlini kaDagoni.+
11 Bonke abantu beJabheshi+ eseGiliyadi bezwa ngakho konke amaFilisti ayekwenze kuSawuli.+
12 Ngakho wonke amaqhawe asuka ayathwala isidumbu sikaSawuli lezidumbu zamadodana akhe abuya lazo eJabheshi. Angcwaba amathambo abo ngaphansi kwesihlahla esikhulu eJabheshi,+ asezila ukudla okwamalanga ayisikhombisa.
13 Ngakho-ke uSawuli wafa ngenxa yokuthi kazange athembeke kuJehova. Kalilalelanga ilizwi likaJehova+ njalo wabuza esangomeni+
14 kulokuthi abuze kuJehova. Yikho uNkulunkulu wambulala, ubukhosi wasebunika uDavida indodana kaJese.+
Amabala angaphansi
^ Kumbe, “ethempelini likankulunkulu.”
