Eyokuqala EyemiLando 11:1-47
11 Ngemva kwesikhathi bonke abako-Israyeli babuthana kuDavida eHebroni+ bathi kuye: “Thina siyizihlobo zakho.*+
2 Ngesikhathi sibuswa nguSawuli, nguwe owawukhokhela abako-Israyeli nxa besiya empini+ futhi uJehova uNkulunkulu wakho wathi kuwe: ‘Uzakwelusa abantu bami bako-Israyeli njalo uzakuba ngumkhokheli wabantu bami bako-Israyeli.’”+
3 Ngakho bonke abadala bako-Israyeli baya enkosini uDavida eHebroni. UDavida wenza labo isivumelwano eHebroni phambi kukaJehova, basebemgcoba ukuthi abe yinkosi yako-Israyeli,+ njengoba nje uJehova wayetshilo esebenzisa uSamuyeli.+
4 Ngokuhamba kwesikhathi uDavida labo bonke abako-Israyeli basuka baya eJerusalema, eJebusi,+ lapho amaJebusi+ ayehlala khona.
5 AmaJebusi eyisa uDavida athi: “Awusoze ungene lapha!”+ Kodwa uDavida wayithumba inqaba yeZiyoni.+ Khathesi isibizwa ngokuthi lidolobho likaDavida.+
6 UDavida wathi: “Loba ngubani ozaqala ukuyahlasela amaJebusi uzakuba yinduna futhi abe yisikhulu.” UJowabi+ indodana kaZeruya wahamba kuqala wasesiba yinduna.
7 Ngemva kwalokho uDavida waqalisa ukuhlala enqabeni leyo. Yikho bayibiza ngokuthi lidolobho likaDavida.
8 Waqalisa ukwakha umduli wedolobho lezinye izakhiwo kuwo wonke amacele, kusukela eqaqeni* kusiya ezindaweni eziseduze, njalo uJowabi wavuselela idolobho lonke.
9 UDavida waqhubeka esiba lamandla+ futhi uJehova wamabutho wayelaye.
10 Nampa abakhokheli bamabutho kaDavida alamandla ababesekela ubukhosi bakhe labanye bonke abako-Israyeli befuna ukumbeka ukuthi abe yinkosi, njengoba nje uJehova wayetshilo mayelana labako-Israyeli.+
11 La ngamaqhawe kaDavida alamandla: UJashobheyamu+ indodana yomHakhimoni wayengumkhokheli wabathathu.+ Wabulala abantu abangu-300 ngomkhonto ngasikhathi sinye.+
12 Wayelandelwa ngu-Eliyazari+ indodana kaDodo um-Ahohi.+ U-Eliyazari wayengomunye wamaqhawe amathathu alamandla.
13 WayeloDavida ePhasi-damimi+ lapho amaFilisti ayebuthene khona ezokulwa. Kwakulensimu eyayilinywe ibhali futhi abantu basebebalekile besesaba amaFilisti.
14 Kodwa yena wama phakathi kwayo wayivikela, waqhubeka ebulala amaFilisti, uJehova wabenza banqoba okumangalisayo.+
15 Abakhokheli abathathu kwabangu-30 baya edwaleni, ebhalwini lwase-Adulamu+ lapho uDavida ayekhona. Ngalesosikhathi amaFilisti ayemise inkamba yawo esigodini seRefayimi.+
16 UDavida wayesenqabeni njalo kwakuleqembu lebutho lamaFilisti eBhethilehema.
17 UDavida wathi: “Aluba nje benginganatha amanzi omgodi osegedini leBhethilehema!”+
18 Ngakho laba abathathu bathi besizwa lokhu, bangena ngenkani enkambeni yamaFilisti bayakukha amanzi emgodini osegedini leBhethilehema babuya lawo kuDavida. Kodwa uDavida wala ukuwanatha, wawathela phansi phambi kukaJehova,
19 wathi: “Ngeke ngenze into enjalo ngoba ayilunganga kuNkulunkulu wami! Kambe nginganatha igazi lamadoda la afake impilo zawo engozini?+ Phela afake impilo zawo engozini esiyakukha amanzi la.” Ngakho wala ukuwanatha. Lezi yizo izinto ezenziwa ngamaqhawe akhe amathathu.
20 U-Abhishayi+ umfowabo kaJowabi+ waba ngumkhokheli welinye iqembu lamaqhawe amathathu. Wabulala abantu abangu-300 ngomkhonto futhi wayelodumo njengamaqhawe amathathu akuqala.+
21 Eqenjini labo bebathathu, wayelodumo ukwedlula laba abanye ababili futhi engumkhokheli wabo. Lanxa kunjalo, kazange alingane lamaqhawe amathathu eqembu lakuqala.
22 UBhenaya+ indodana kaJehoyada wayeyindoda elesibindi* futhi watshengisa ubuqhawe bakhe kanengi eKhabhuzeli.+ Wabulala amadodana amabili ka-Ariyeli wakoMowabi njalo wangena emgodini wamanzi mhla kulongqwaqwane wabulala isilwane.+
23 Wabulala lendoda engumGibhithe eyayinkulu okwesabekayo, iyizingalo ezinhlanu* ubude.+ Lanxa umGibhithe wayethwele umkhonto onjengesigodo somaluki,+ yena wamlanda ethwele induku nje kuphela, wafika wamjwamulela umkhonto wakhe wambulala ngawo.+
24 Lezi yizo izinto ezenziwa nguBhenaya indodana kaJehoyada, njalo wayelodumo olunjengolwamaqhawe amathathu eqembu lakuqala.
25 Lanxa wayelodumo ukwedlula abakhokheli abangu-30, kazange alingane lamaqhawe amathathu eqembu lakuqala.+ Kodwa uDavida wambeka ukuthi abe yinduna yabalindi bakhe.
26 Amaqhawe alamandla ayesebuthweni likaDavida kwakungu-Asaheli+ umfowabo kaJowabi, lo-Elihanani indodana kaDodo weBhethilehema,+
27 loShamothi umHarori, loHelezi umPheloni,
28 lo-Ira+ indodana ka-Ikheshi weThekhowa, lo-Abhiyezeri+ we-Anathothi,
29 loSibhekhayi+ umHusha, lo-Ilayi um-Ahohi,
30 loMaharayi+ weNethofa, loHeledi+ indodana kaBhahana weNethofa,
31 lo-Ithayi indodana kaRibhayi weGibheya yakoBhenjamini,+ loBhenaya umPhirathoni,
32 loHurayi owezihotsheni* zeGahashi,+ lo-Abhiyeli um-Aribhathi,
33 lo-Azimavethi weBhahurimi, lo-Eliyaba umShalabhimi,
34 lamadodana kaHashemi umGizoni, loJonathani indodana kaShage umHarari,
35 lo-Ahiyamu indodana kaSakhari umHarari, lo-Elifali indodana ka-Uri,
36 loHeferi umMekherathi, lo-Ahija umPheloni,
37 loHeziro umKhameli, loNarayi indodana ka-Ezibhayi,
38 loJoweli umfowabo kaNathani, loMibhari indodana kaHagiri,
39 loZelekhi um-Amoni, loNaharayi umBherothi, owayethwala izikhali zikaJowabi indodana kaZeruya,
40 lo-Ira um-Ithiri, loGarebhi um-Ithiri,
41 lo-Uriya+ umHithi, loZabhadi indodana ka-Ahilayi,
42 lo-Adina indodana kaShiza wakoRubheni, owayengumkhokheli wabakoRubheni, kanye labangu-30 ababelaye,
43 loHanana indodana kaMahakha, loJoshafathi umMithini,
44 lo-Uziya um-Ashitherathi, loShama loJeyiyeli amadodana kaHothamu um-Aroweri,
45 loJediyeli indodana kaShimiri, loJoha umfowabo owayengumThizi,
46 lo-Eliyeli umMahavi, loJeribhayi loJoshaviya amadodana ka-Elinahamu, lo-Ithima umMowabi,
47 lo-Eliyeli, lo-Obhedi kanye loJahasiyeli umMezobha.
Amabala angaphansi
^ NgesiHebheru, “silithambo lakho lenyama yakho.”
^ Kumbe, “eMilo.” Ibala lesiHebheru elisetshenziswe lapha litsho ukuthi, “gcwalisa.”
^ NgesiHebheru, “wayeyindodana yeqhawe.”
^ Wayengaba ngamamitha angu-2,23 ubude. Khangela iSengezo ku-B14.
^ Khangela iNgcazelo Yamabala.
