Eyokuqala EyemiLando 13:1-14
13 UDavida wacebisana lezinduna zezinkulungwane lezinduna zamakhulu kanye labo bonke abakhokheli,+
2 wasesithi kubo bonke abako-Israyeli: “Nxa likubona kukuhle futhi kusamukeleka kuJehova uNkulunkulu wethu, asithumeleni ilizwi kubafowethu abaseleyo kuzo zonke izabelo zako-Israyeli, lakubaphristi, lakumaLevi asemadolobheni+ awo alamadlelo ukuthi babuye bazomanyana lathi,
3 besesiletha ibhokisi+ likaNkulunkulu wethu.” Phela ngensuku zikaSawuli babengasazihluphi ngalo.+
4 Bonke abantu bavumelana lakho lokho ngoba kwakukhanya kukuhle kubo.
5 Ngakho uDavida wabuthanisa bonke abako-Israyeli kusukela emfuleni weGibhithe* kwaze kwayafika eLebho-hamathi,*+ ukuze bayethatha ibhokisi likaNkulunkulu weqiniso eKhiriyathi-jeyarimi.+
6 UDavida labo bonke abako-Israyeli baya eBhahala,+ eKhiriyathi-jeyarimi yakoJuda, besiyathatha ibhokisi likaNkulunkulu weqiniso ohlezi esihlalweni sobukhosi phezu* kwamakherubhi.+ Abantu babiza ibizo likaJehova bephambi kwebhokisi lelo.
7 Balithatha ibhokisi likaNkulunkulu weqiniso balifaka enqoleni entsha,+ basuka lalo endlini ka-Abhinadabi. U-Uza lo-Ahiyo yibo ababekhokhela inqola.+
8 UDavida labo bonke abako-Israyeli babethokoza phambi kukaNkulunkulu weqiniso ngenhliziyo yonke, behlabela izingoma futhi betshaya amahabhu,* lamathamborini,+ lamasimbali,*+ lamacilongo+ kanye lezinye iziginci.
9 Kodwa bathi befika esizeni* sikaKhidoni, inkomo zaphosa zawisa ibhokisi likaNkulunkulu, u-Uza waseselula isandla walibamba.
10 UJehova wamthukuthelela kakhulu u-Uza, wahle wamtshaya wafa ngenxa yokuthi welula isandla sakhe wabamba ibhokisi.+ Ngakho u-Uza wafela khonapho phambi kukaNkulunkulu.+
11 Kodwa uDavida wazonda* ngenxa yokuthi ulaka lukaJehova lwalwehlele phezu kuka-Uza. Kuze kube lamuhla indawo leyo ibizwa ngokuthi yiPherezi-uza.*
12 UDavida wamesaba uNkulunkulu weqiniso ngalelolanga, wathi: “Manje ibhokisi likaNkulunkulu weqiniso ngingahamba lalo njani lapho engihlala khona?”+
13 UDavida kasazange ahambe lebhokisi likaNkulunkulu edolobheni lakhe* lapho ayehlala khona, kodwa wathi lihanjiswe endlini ka-Obhedi-edomi umGithi.
14 Ibhokisi likaNkulunkulu weqiniso lahlala endlini ka-Obhedi-edomi okwenyanga ezintathu. UJehova wayelokhu ebabusisa abendlu ka-Obhedi-edomi kanye lakho konke ayelakho.+
Amabala angaphansi
^ Kumbe, “eShihori yeGibhithe.”
^ Kumbe, “egedini leHamathi.”
^ Ezinye inguqulo zithi, “phakathi.”
^ Ihabhu lichacho elilentambo ezifanana lezekatali.
^ Isimbali lichacho elichayileyo elenziwe ngensimbi. Likhaliswa ngokulitshayanisa lelinye.
^ Khangela iNgcazelo Yamabala.
^ Kumbe, “wacaphuka.”
^ Ibizo leli litsho ukuthi, “Ukujeziswa kuka-Uza.”
^ NgesiHebheru, “edolobheni likaDavida.”