Eyokuqala EyemiLando 14:1-17
14 UHiramu+ inkosi yeThire wathuma izithunywa kuDavida. Wathumela lezigodo zomsedari, labantu abakwazi ukwakha ngamatshe,* lababazi ukuze bayekwakhela uDavida indlu.*+
2 UDavida wayekwazi ukuthi uJehova wayesebumise baqina ubukhosi bakhe ko-Israyeli,+ ngoba wayebuphakamisile ubukhosi bakhe ngenxa yabantu bakhe bako-Israyeli.+
3 UDavida wathatha abanye abafazi+ eJerusalema, wazala amanye amadodana lamadodakazi.+
4 Nanka amabizo abantwana abazala esehlala eJerusalema:+ UShamuwa, loShobhabhi, loNathani,+ loSolomoni,+
5 lo-Ibhari, lo-Elishuwa, lo-Eliphelethi,
6 loNoga, loNefegi, loJafiya,
7 lo-Elishama, loBheyeliyada, lo-Elifelethi.
8 AmaFilisti athi esizwa ukuthi uDavida usegcotshwe ukuthi abe yinkosi yabo bonke abako-Israyeli,+ aphuma wonke esiyamdinga.+ UDavida wathi ekuzwa lokho waphuma wayakulwa lawo.
9 AmaFilisti afika aqalisa ukuhlasela labo ababehlala esigodini seRefayimi.+
10 UDavida wasebuza uNkulunkulu wathi: “Ngihambe yini ngiyekulwa lamaFilisti? Uzawanikela yini esandleni sami?” UJehova wasesithi kuye: “Hamba, ngizawanikela esandleni sakho.”+
11 Ngakho uDavida wasuka waya eBhali-pherazimi+ wafika wawabulala amaFilisti wasesithi: “UNkulunkulu weqiniso uhambe phambi kwami wazehlula izitha zami, kwaba angathi ngamanzi ediliza umduli.” Yikho babiza indawo leyo ngokuthi yiBhali-pherazimi.*
12 AmaFilisti alahlela onkulunkulu bawo khonapho, uDavida wasesithi kabatshiswe ngomlilo.+
13 Ngemva kwesikhathi amaFilisti aphinda ahlasela esigodini seRefayimi.+
14 UDavida waphinda wabuza kuNkulunkulu weqiniso, yena wamphendula wathi: “Ungathutshi phambi kwawo kodwa bhoda uye ngemva kwawo, ubusuwahlasela phambi kwezihlahla zamabhakha.+
15 Nxa ungezwa izisinde ezingathi ngezamabutho ahambayo zizwakalela phezu kwezihlahla zamabhakha, uhle uwahlasele amaFilisti ngoba uNkulunkulu weqiniso uyabe ehamba phambi kwakho ewabulala.”+
16 UDavida wenza khona kanye ayekutshelwe nguNkulunkulu weqiniso.+ Ngakho bawabulala amaFilisti kusukela eGibhiyoni kwaze kwayafika eGezeri.+
17 Udumo lukaDavida lwafika kuwo wonke amazwe njalo uJehova wenza ukuthi zonke izizwe zimesabe.+
Amabala angaphansi
^ Kumbe, “labakhi bemiduli.”
^ Kumbe, “isigodlo.”
^ Ibizo leli litsho ukuthi, “Ingcitshi yokudiliza.”