Eyokuqala EyemiLando 20:1-8
20 Ekuqaliseni komnyaka,* ngesikhathi amakhosi ahamba ngaso ukuyahlasela, uJowabi+ wakhokhela ibutho wayatshabalalisa ilizwe lama-Amoni. Bafika eRabha+ bayivimbezela, kodwa uDavida yena wayesele eJerusalema.+ UJowabi wahlasela iRabha wayidiliza.+
2 UDavida wathatha umqhele owawusekhanda lesithombe sikaMalikhamu, wathola ukuthi wawulesisindo esilithalenta* legolide njalo wawuceciswe ngamatshe aligugu. Umqhele lo wagqokiswa uDavida. UDavida wathumba lempahla enengi edolobheni leli.+
3 Wathatha abantu ababelapho, abanye wabanika umsebenzi+ wokubaza amatshe. Abanye babesebenzisa amahloka lamanye amathuluzi ensimbi abukhali. Lokhu yikho ayekwenza kuwo wonke amadolobho ama-Amoni. Ngemva kwalokho uDavida lamabutho akhe babuyela eJerusalema.
4 Kwavuka impi eGezeri, ama-Israyeli esilwa lamaFilisti. Empini leyo uSibhekhayi+ umHusha wabulala uSiphayi owayeyisizukulwane samaRefayimi,+ kwaba yikunqotshwa kwamaFilisti.
5 Kwaphinda kwavuka enye impi lamaFilisti. U-Elihanani indodana kaJayiri wabulala uLahimi umfowabo kaGoliyathi+ umGithi, owayelomkhonto owawuloluthi olwalungani yisigodo somaluki.+
6 Kwavuka enye impi eGathi.+ Kwakulendoda eyayinkulu kakhulu+ eyayileminwe eyisithupha esandleni ngasinye, lamazwane ayisithupha enyaweni ngalunye. Sekukonke kwakungu-24. Layo yayiyisizukulwane samaRefayimi.+
7 Yayilokhu ichothoza+ abako-Israyeli. Yikho uJonathani indodana kaShimeya+ umfowabo kaDavida wayibulala.
8 Amadoda la ayeyizizukulwane zamaRefayimi+ aseGathi+ njalo abulawa nguDavida lezinceku zakhe.
Amabala angaphansi
^ Lapha kutshiwo isikhathi sentwasa. Intwasa yako-Israyeli iqalisa ngoMarch loba ngo-April.
^ Ithalenta lalingamakhilogremu angu-34,2. Khangela iSengezo ku-B14.
