Eyokuqala EyemiLando 28:1-21
28 UDavida wabuthanisa zonke izikhulu zako-Israyeli eJerusalema. Kwakulabakhokheli bezizwana lezinduna zamaqembu+ ayesebenzela inkosi, lezinduna zezinkulungwane, lezinduna zamakhulu+ kanye lezinduna ezazikhangela yonke impahla lemfuyo yenkosi+ leyamadodana ayo.+ Wabiza leziphathamandla zesigodlweni lawo wonke amadoda alamandla futhi azingcitshi.+
2 INkosi uDavida yasukuma yathi:
“Zwanini bafowethu lani bantu bami. Ngangifisa kakhulu* ukwakha indlu okuzahlala kuyo ibhokisi lesivumelwano sikaJehova, njalo ezakuba yisenabelo* sikaNkulunkulu wethu+ futhi sengiwenzile amalungiselelo okwakha.+
3 Kodwa uNkulunkulu weqiniso wathi kimi, ‘Awusoze wakhe indlu ezakwenza ibizo lami lidunyiswe+ ngoba ungumuntu wezimpi futhi ubulele abantu abanengi kakhulu.’*+
4 Lanxa kunjalo uJehova uNkulunkulu ka-Israyeli wakhetha mina phakathi kwabo bonke abemuli kababa, wangibeka ukuthi ngibe yinkosi phezu kwabako-Israyeli kuze kube nini lanini.+ Wakhetha uJuda ukuthi abe ngumkhokheli+ futhi kwabendlu kaJuda wakhetha imuli kababa,+ kwathi emadodaneni kababa wakhetha mina wangenza ngaba yinkosi phezu kwabo bonke abako-Israyeli.+
5 Phakathi kwawo wonke amadodana ami, njengoba uJehova enginike amadodana amanengi,+ ukhethe indodana yami uSolomoni+ ukuthi ihlale esihlalweni sobukhosi sikaJehova ibuse phezu kwabo bonke abako-Israyeli.+
6 “Wathi kimi, ‘Indodana yakho uSolomoni yiyo ezakwakha indlu yami lamaguma ami ngoba ngiyikhethile ukuthi ibe yindodana yami, futhi mina ngizakuba nguyise.+
7 Ubukhosi bayo ngizabuqinisa kuze kube nini lanini+ nxa ingazimisela ukulalela imilayo yami lezahlulelo zami,+ njengoba isenza khathesi.’
8 Ngakho ngikhuluma phambi kwabo bonke abako-Israyeli, ibandla likaJehova, laphambi kukaNkulunkulu wethu, ngithi: Dingani yonke imilayo kaJehova uNkulunkulu wethu, liyigcine ngonanzelelo ukuze ilizwe elihle libe ngelenu+ futhi lilitshiyele amadodana enu, libe lilifa lawo kuze kube phakade.
9 “Solomoni ndodana yami, mazi uNkulunkulu kayihlo njalo umkhonze ngenhliziyo yonke*+ uthokoza,* ngoba uJehova uyazihlola zonke inhliziyo+ azwisise imicabango lenhloso zomuntu.+ Nxa ungamdinga uzamthola,*+ kodwa nxa ungamtshiya uzakulahla kokuphela.+
10 Khathesi khangela, uJehova ukhethe wena ukuthi wakhe indlu ezakuba yindawo engcwele. Woba lesibindi wenze umsebenzi.”
11 UDavida wanika indodana yakhe uSolomoni iplani+ yomphotshongo,+ leyezinye izindlu zethempelini okugoqela izindlu okwakuzagcinelwa kuzo impahla, lezindlu ezisephahleni, lezindlu ezingaphakathi, lendlu yokuhlawulela.*+
12 Wamnika leplani yakho konke ayekutshengisiwe ngomoya ongcwele. Iplani leyo yayingeyamaguma+ endlu kaJehova lazo zonke izindlu zokudlela ezaziwagombolozele, lezindlu zokugcinela inotho yendlu kaNkulunkulu weqiniso kanye lezinto eziligugu ezazenziwe zaba ngcwele.*+
13 Wamtshela langamaqembu abaphristi+ lamaLevi langayo yonke imisebenzi okwakumele yenziwe endlini kaJehova. Waphinda wamtshela langazo zonke izitsha ezazizasetshenziswa endlini kaJehova,
14 langesisindo segolide okwakumele lisetshenziswe ukwenza izitsha zemisebenzi etshiyeneyo, langesisindo sazo zonke izitsha zesiliva lazo zonke izitsha ezazizasetshenziswa emisebenzini etshiyeneyo.
15 Waphinda wamtshela lesisindo segolide okwakumele lisetshenziswe ukwenza izinti zezibane+ lezibane zazo, lesisindo sezinti zezibane ezehlukeneyo lezibane zazo kanye lesisindo sezinti zezibane zesiliva, esoluthi lwesibane ngasinye lesibane salo kusiya ngokuthi sizasetshenziswa ngaphi.
16 Wamnika lesisindo segolide lokwenza itafula ngayinye yesinkwa sokubukiswa,+ wamnika lesisindo sesiliva sokwenza amatafula esiliva,
17 lesisindo segolide elicengekileyo lokwenza amafologwe lemiganu lamajagi. Wamtshela lesisindo semiganu yegolide emincane,+ esomganu ngamunye, kanye lesisindo semiganu emincane yesiliva, esomganu ngamunye.
18 Waphinda wamnika lesisindo segolide elicengekileyo elokwenza i-alithare lokutshisela impepha+ kanye lesisindo samakherubhi+ egolide amela inqola kaNkulunkulu.+ Amakherubhi la avule amaphiko awo agubuzela ibhokisi lesivumelwano sikaJehova.
19 UDavida wathi: “Isandla sikaJehova sasiphezu kwami njalo wangipha ukuhlakanipha ukuze ngibhale+ konke okuphathelane leplani yethempeli.”+
20 UDavida wasesithi endodaneni yakhe uSolomoni: “Qina ube lesibindi wenze umsebenzi. Ungesabi futhi ungatshaywa luvalo ngoba uJehova uNkulunkulu, uNkulunkulu wami, ulawe.+ Kasoze akutshiye futhi kasoze akulahle+ kodwa uzaqhubeka elawe uze uphele wonke umsebenzi okumele wenziwe endlini kaJehova.
21 Nanka amaqembu abaphristi+ lawamaLevi+ azakwenza yonke imisebenzi endlini kaNkulunkulu weqiniso. Nanzi lezisebenzi ezizimiseleyo futhi ezilolwazi ezizakwenza yonke imisebenzi,+ kanye labakhokheli+ labantu bonke abazakwenza konke obatshela khona.”
Amabala angaphansi
^ NgesiHebheru, “Kwakuyisifiso senhliziyo yami.”
^ Isenabelo kulapho umuntu abeka khona inyawo zakhe nxa ehlezi esitulweni.
^ NgesiHebheru, “futhi uchithe igazi.”
^ Kumbe, “uzakwenza ukuthi umthole.”
^ Kumbe, “langokuzimisela.”
^ Kumbe, “ngenhliziyo ezinikele ngokupheleleyo.”
^ Kumbe, “okwakuzagcinelwa kuyo isivalo sebhokisi lesivumelwano.”
^ Kumbe, “ezazinikelwe kuNkulunkulu.”
