Eyokuqala EyemiLando 29:1-30
29 INkosi uDavida yathi kubo bonke abantu: “USolomoni indodana yami ekhethwe nguNkulunkulu+ usesengumfana futhi kalalwazi+ kodwa umsebenzi mkhulu, ngoba leli lithempeli likaJehova* uNkulunkulu,+ ayisilo lomuntu.
2 Sengenze konke okusemandleni ami ngilungiselela indlu kaNkulunkulu wami. Ngiqoqe igolide elizasetshenziswa ukwenza izinto zegolide, lesiliva esizasetshenziswa ukwenza izinto zesiliva, lekhopha ezasetshenziswa ukwenza izinto zekhopha, lensimbi ezasetshenziswa ukwenza izinto zensimbi,+ lamapulanka+ okwenza izinto zamapulanka, lamatshe e-onekisi, lamatshe aligugu azananyathiselwa ngodaka, lamatshe amancane okucecisa amibalabala, layo yonke imihlobo yamatshe aligugu kanye lamatshe e-alabhasta amanengi.
3 Ngenxa yokuthi ngiyayithanda indlu kaNkulunkulu wami,+ nginikela ngempahla yami eligugu+ eyegolide lesiliva, ukuthi isetshenziswe endlini kaNkulunkulu wami ngingezelela phezu kwalokho ebesengikulungiselele indlu engcwele.
4 Nginikela langamathalenta* egolide lase-Ofiri+ angu-3 000 lamathalenta esiliva esicengekileyo angu-7 000 ukuthi asetshenziswe ukugudula izindlu zethempeli.
5 Igolide lizasetshenziswa ukwenza izinto zegolide, isiliva sona sisetshenziswe ukwenza izinto zesiliva kanye lakho konke okumele kwenziwe zingcitshi zomsebenzi. Ngubani phakathi kwenu ozinikelayo lamuhla ukuthi aphe uJehova isipho?”+
6 Abakhokheli bezindlu zaboyise, labakhokheli bezizwana zako-Israyeli, lezinduna zezinkulungwane, lezamakhulu,+ lezinduna ezazikhangela imisebenzi yenkosi,+ beza ngokuthanda kwabo.
7 Banikela emsebenzini wokwakhiwa kwendlu kaNkulunkulu weqiniso ngamathalenta egolide angu-5 000, lamadarikhi* angu-10 000, lamathalenta esiliva angu-10 000, lamathalenta ekhopha angu-18 000 langamathalenta ensimbi angu-100 000.
8 Loba ngubani owayelamatshe aligugu wawaletha ukuze afakwe enothweni yendlu kaJehova eyayikhangelwa nguJehiyela+ umGeshoni.+
9 Kwabathokozisa abantu ukuletha iminikelo yokuzithandela ngoba babenikela kuJehova ngenhliziyo yonke.+ INkosi uDavida layo yathokoza kakhulu.
10 Ngemva kwalokho uDavida wadumisa uJehova phambi kwabantu bonke wathi: “Kwangathi ungadunyiswa kuze kube nini lanini* Jehova Nkulunkulu kababa wethu u-Israyeli.
11 Awu Jehova, ngobakho ubukhulu+ lamandla+ lobuhle lenkazimulo kanye lobukhosi*+ ngoba konke okusemazulwini lokusemhlabeni ngokwakho.+ Ngowakho umbuso awu Jehova.+ Wena uphakeme waba phezu kwakho konke.
12 Inotho lenkazimulo kuvela kuwe+ futhi wena ubusa phezu kwakho konke.+ Isandla sakho silamandla amakhulu+ njalo siyenelisa ukwenza ukuthi abantu bonke babe bakhulu+ futhi babe lamandla.+
13 Khathesi-ke awu Nkulunkulu wethu, siyakubonga futhi siyalidumisa ibizo lakho elihle.
14 “Kodwa mina ngiyini futhi labantu bami bayini ukuthi sesingaze senze iminikelo yonke le ngokuzithandela? Phela konke kuvela kuwe, sikuphe lokho okuvela esandleni sakho.
15 Phambi kwakho singabantu bezizweni futhi siyizihambi njengoba nje babenjalo bonke okhokho bethu,+ ngoba insuku zethu emhlabeni zinjengesithunzi,+ ziphanga zedlule.
16 Awu Jehova Nkulunkulu wethu, yonke inotho le esiyibutheleleyo ukuze sakhe indlu ezadumisa ibizo lakho elingcwele ivela esandleni sakho, yonke ngeyakho.
17 Ngikwazi kuhle Nkulunkulu wami ukuthi wena uhlola inhliziyo+ njalo uthokoziswa ngumuntu oqotho.*+ Nginikele konke lokhu ngenhliziyo eqotho njalo kuyangithokozisa ukubona abantu bakho abalapha benikela kuwe ngokuzithandela.
18 Awu Jehova Nkulunkulu wabokhokho bethu u-Abrahama lo-Isaka lo-Israyeli, yenza abantu bakho bahlale belemicabango lenhloso lezi enhliziyweni zabo kuze kube nini lanini futhi uqondise izinhliziyo zabo kuwe.+
19 Nika indodana yami uSolomoni inhliziyo epheleleyo*+ ukuze ilalele imilayo yakho+ lezikhumbuzo zakho kanye lemithetho yakho, ikulandele konke lokhu, yakhe ithempeli leli* engenze amalungiselelo okuthi lakhiwe.”+
20 UDavida wasesithi kubo bonke abantu: “Khathesi dumisani uJehova uNkulunkulu wenu.” Ngakho bonke abantu bamdumisa uJehova uNkulunkulu wabokhokho babo, bathi mbo phansi ngobuso phambi kukaJehova laphambi kwenkosi.
21 Ngelanga elilandelayo baqhubeka benikela imihlatshelo kuJehova njalo besenza iminikelo yokutshiswa+ phambi kukaJehova. Banikela ngamajongosi angu-1 000, langenqama ezingu-1 000, langemvana ezinduna ezingu-1 000, benza leminikelo yokunathwayo.+ Banikela imihlatshelo eminengi kakhulu, besenzela bonke abako-Israyeli.+
22 Baqhubeka besidla futhi benatha phambi kukaJehova ngalelolanga, bethokoza kakhulu.+ Bambeka okwesibili uSolomoni indodana kaDavida ukuthi abe yinkosi futhi bamgcoba phambi kukaJehova ukuthi abe ngumkhokheli.+ Bagcoba loZadokhi ukuthi abe ngumphristi.+
23 Ngakho uSolomoni wahlala esihlalweni sobukhosi sikaJehova,+ waba yinkosi esikhundleni sikayise uDavida. Waphumelela njalo bonke abako-Israyeli babemlalela.
24 Bonke abakhokheli+ lamaqhawe alamandla+ lawo wonke amadodana eNkosi uDavida+ bazehlisa enkosini uSolomoni.
25 UJehova wenza uSolomoni waba mkhulu kakhulu phambi kwabo bonke abantu bako-Israyeli njalo wamnika ubukhosi lesithunzi okwakusedlula okwamakhosi wonke ako-Israyeli ayebuse ngaphambi kwakhe.+
26 UDavida indodana kaJese wabusa phezu kwabo bonke abako-Israyeli.
27 Wabusa iminyaka engu-40 ko-Israyeli. EHebroni wabusa iminyaka eyisikhombisa,+ eJerusalema wabusa iminyaka engu-33.+
28 Wafa eseluphele+ futhi esuthisekile ngempilo, elenotho kanye lodumo. Indodana yakhe uSolomoni yaba yinkosi esikhundleni sakhe.+
29 Imbali yeNkosi uDavida kusukela ekuqaleni kuze kuyefika ekucineni ibhaliwe emibhalweni kaSamuyeli umboni* lekaNathani+ umphrofethi lekaGadi+ umboni.
30 Kwabhalwa mayelana lobukhosi bakhe, lamandla akhe, lezinto ezenzakala ngesikhathi sakhe eziphathelane laye labako-Israyeli layo yonke imibuso eyayibagombolozele.
Amabala angaphansi
^ Kumbe, “lesi yisigodlo sikaJehova.”
^ Ithalenta lalingamakhilogremu angu 34,2. Khangela iSengezo ku-B14.
^ Idarikhi kwakuyimali yePhesiya eyenziwe ngegolide. Khangela iSengezo ku-B14.
^ Kumbe, “kusukela phakade kuze kube phakade.”
^ Kumbe, “njalo ulesithunzi.”
^ Kumbe, “olungileyo.”
^ Kumbe, “ezinikele ngokupheleleyo.”
^ Kumbe, “isigodlo lesi.”
^ Khangela iNgcazelo Yamabala.
