Eyokuqala KwabaseThesalonika 4:1-18
4 Okokucina bafowethu, njengoba salipha umlayo wokuthi kumele liphile* njani ukuze lithokozise uNkulunkulu,+ okuyikho elikwenzayo khathesi, siyalicela futhi siyalincenga ngeNkosi uJesu ukuthi liqhubeke likwenza ngokupheleleyo
2 ngoba liyayazi imilayo esalipha yona ngeNkosi uJesu.
3 Intando kaNkulunkulu yikuthi libe ngcwele+ njalo lixwaye ubufebe.*+
4 Ngamunye wenu kumele akwazi ukuthi angawukhuza njani umzimba wakhe*+ ukuze uhlale ungcwele+ njalo usamukeleka,
5 angabuswa zinkanuko zemacansini ezilobuhwaba,+ njengabantu abangamaziyo uNkulunkulu.+
6 Kakho okufanele adlulele ngale kwemingcele efaneleyo futhi aphambanise umfowabo endabeni le ngoba uJehova* uyabajezisa abenza zonke izinto lezi, njengoba nje sake salitshela njalo salixwayisa kakhulu.
7 UNkulunkulu wasibizela ukuthi sibe ngcwele,+ hatshi ukuthi sibe ngabangcolileyo.
8 Ngakho okwalayo lokhu kayali muntu, kodwa wala uNkulunkulu+ olipha umoya wakhe ongcwele.+
9 Kodwa alidingi ukuthi silibhalele mayelana lothando lobuzalwane+ ngoba lina ngokwenu lifundiswa nguNkulunkulu ukuthi lithandane.+
10 Yikho elikwenza kubo bonke abafowethu abakulo lonke elaseMakhedoniya. Loba kunjalo, siyalincenga bafowethu ukuthi liqhubeke likwenza kakhulu lokho.
11 Zamani ngamandla wonke ukuphila ngokuthula+ lokungangeneli indaba zabantu,+ lisebenze ngezandla zenu+ njengoba nje salitshela,
12 ukuze liziphathe ngendlela efaneleyo phambi kwabantu abangayisiwo malunga ebandla+ futhi lingasweli lutho.
13 Bafowethu, sifuna ukuthi libe lolwazi mayelana labafileyo*+ ukuze lingadabuki njengabanye bonke abangelathemba+
14 ngoba nxa sikholwa ukuthi uJesu wafa waphinda wavuka,+ kutsho ukuthi loNkulunkulu uzabapha ukuphila abafileyo ukuze babe loJesu labo abafa bemanyene laye.+
15 Esilitshela khona ngelizwi likaJehova* yikuthi thina esizabe sisaphila ngesikhathi sokuba khona kweNkosi asisoze sibaqalele asebafayo loba sekutheni,
16 ngoba iNkosi izakwehla ivela ezulwini ikhipha imilayo ngelizwi lengilosi enkulu+ futhi ilecilongo likaNkulunkulu, besekusithi abafileyo abamanyene loKhristu bavuke kuqala.+
17 Ngemva kwalokho, thina esiphilayo esisesekhona sizathathwa kanye labo emayezini+ ukuze sihlangabeze iNkosi+ emoyeni. Yikho-ke sizakuba leNkosi kuze kube nini lanini.+
18 Ngakho qhubekani liduduzana ngamazwi la.
Amabala angaphansi
^ NgesiGrikhi, “lihambe.”
^ NgesiGrikhi, por·nei′a. Khangela iNgcazelo Yamabala.
^ NgesiGrikhi, “isitsha sakhe.”
^ Khangela iSengezo ku-A5.
^ NgesiGrikhi, “labaleleyo.”
^ Khangela iSengezo ku-A5.
