Eyesibili EyamaKhosi 1:1-18
-
U-Elija uphrofetha ngokufa kuka-Ahaziya (1-18)
1 Kwathi u-Ahabi esefile abakoMowabi+ bahlamukela abako-Israyeli.
2 Kungalesosikhathi lapho u-Ahaziya awa khona ephahleni lwendlu yakhe eyayiseSamariya walimala. Ngakho wathuma izithunywa wathi kuzo: “Hambani liyengibuzela kuBhali-zebhubhi unkulunkulu we-Ekhroni+ ukuthi ngizasila yini.”+
3 Kodwa ingilosi kaJehova yathi ku-Elija*+ umThishibi: “Hamba uyehlangabeza izithunywa zenkosi yeSamariya uthi kuzo, ‘Kanti akulaNkulunkulu yini ko-Israyeli ukuthi selingaze liyebuza kuBhali-zebhubhi unkulunkulu we-Ekhroni?+
4 Ngakho nanku okutshiwo nguJehova: “Awusoze uvuke embhedeni olele kuwo, uzakufa loba sekutheni.”’” Ngemva kwalokho u-Elija wasuka wahamba.
5 Izithunywa zathi zifika enkosini, inkosi yathi kuzo: “Kanti seliphendukeleni?”
6 Zayiphendula zathi: “Kulendoda esihlangabezileyo yathi kithi, ‘Buyelani enkosini elithumileyo lifike lithi kuyo, “Nanku okutshiwo nguJehova: ‘Kanti akulaNkulunkulu yini ko-Israyeli ukuthi usungaze uthume abantu ukuthi bayebuza kuBhali-zebhubhi unkulunkulu we-Ekhroni? Yikho awusoze uvuke embhedeni olele kuwo, uzakufa loba sekutheni.’”’”+
7 Inkosi yasisithi kuzo: “Indoda elihlangabezileyo yalitshela lokhu ibinjani?”
8 Zaphendula zathi: “Ibigqoke isembatho esiloboya+ futhi ibophe ibhanti lesikhumba ekhalweni.”+ Inkosi yahle yathi: “Ngu-Elija umThishibi.”
9 Inkosi yasithuma induna yamabutho angu-50 ukuthi iye ku-Elija lamabutho ayo angu-50. Bamthola ehlezi esiqongweni sentaba, induna yamabutho yathi kuye: “Muntu kaNkulunkulu weqiniso,+ inkosi ithi yehla uze ngapha.”
10 U-Elija waphendula induna yamabutho angu-50 wathi: “Nxa ngingumuntu kaNkulunkulu, akwehle umlilo uvela ezulwini+ ukutshise lamabutho akho angu-50.” Lakanye umlilo wehla uvela ezulwini watshisa induna lamabutho ayo angu-50.
11 Ngakho inkosi yaphinda yathuma enye induna yamabutho angu-50 ukuthi iye ku-Elija lamabutho ayo angu-50. Yahamba yafika yathi kuye: “Muntu kaNkulunkulu weqiniso, inkosi ithi yehla masinyane uze ngapha.”
12 Kodwa u-Elija waphendula wathi: “Nxa ngingumuntu kaNkulunkulu weqiniso, akwehle umlilo uvela ezulwini ukutshise lamabutho akho angu-50.” Lakanye umlilo kaNkulunkulu wehla uvela ezulwini watshisa induna lamabutho ayo angu-50.
13 Ngakho inkosi yathuma enye induna yesithathu lamabutho ayo angu-50. Kodwa induna le yesithathu yafika yaguqa ngamadolo phambi kuka-Elija yakhothamisa ikhanda imncenga ukuthi abe lomusa kuyo, yathi: “Muntu kaNkulunkulu weqiniso, kwangathi impilo yami lempilo yezinceku zakho ezingu-50 ingaba ligugu phambi kwakho.
14 Umlilo wehle uvela ezulwini watshisa izinduna ezimbili lamaqembu azo, ngalinye belilamabutho angu-50. Kodwa mina ngicela ukuthi ube lesihawu kimi ngiqhubeke ngiphila.”
15 Ingilosi kaJehova yatshela u-Elija yathi: “Yehla uhambe laye, ungamesabi.” Yikho u-Elija wasukuma wahamba lenduna yamabutho enkosini.
16 U-Elija wasesithi enkosini, “Nanku okutshiwo nguJehova: ‘Uthume izithunywa ukuthi ziyebuza kuBhali-zebhubhi unkulunkulu we-Ekhroni.+ Kanti akulaNkulunkulu yini ko-Israyeli?+ Pho kungani ungabuzanga kuye? Yikho awusoze uvuke embhedeni olele kuwo, uzakufa loba sekutheni.’”
17 U-Ahaziya wafa njengoba nje u-Elija wayetshilo ethunywe nguJehova. UJehoramu*+ waba yinkosi esikhundleni sakhe ngoba u-Ahaziya wayengelandodana. Kwakungumnyaka wesibili wokubusa kukaJehoramu+ indodana kaJehoshafathi inkosi yakoJuda.
18 Yonke imbali ka-Ahaziya+ lalokho akwenzayo kubhaliwe ebhukwini lembali yamakhosi ako-Israyeli.
Amabala angaphansi
^ Ibizo leli litsho ukuthi, “UNkulunkulu wami nguJehova.”
^ UJehoramu wayengumfowabo ka-Ahaziya.