Eyesibili EyamaKhosi 10:1-36
10 U-Ahabi+ wayelamadodana angu-70 ayehlala eSamariya. Ngakho uJehu wabhala izincwadi wazithumela eSamariya. Wabhalela iziphathamandla zeJeziriyeli labadala+ ababelapho lalabo ababegcine abantwana baka-Ahabi, wathi:
2 “Ngesikhathi incwadi le ifika kini amadodana enkosi yenu azabe elani. Kanti njalo lilezinqola zempi, lamabhiza, lezikhali kanye ledolobho elivikelwe ngemiduli.
3 Phakathi kwamadodana enkosi yenu khethani engcono kulawo wonke futhi eliyibona ifanele, liyibeke esihlalweni sobukhosi sikayise, beselilwela indlu yenkosi yenu.”
4 Kodwa besaba bathi: “Nxa amakhosi amabili ehlulekile ukumelana laye,+ thina singamelana laye njani?”
5 Yikho umphathi wesigodlo,* lomphathi* wedolobho, labadala kanye lalabo ababegcina abantwana benkosi bathumela ilizwi kuJehu besithi: “Thina sizinceku zakho futhi sizakwenza konke ositshela khona. Akulamuntu esizamenza abe yinkosi, yikho yenza loba yini oyibona ilungile.”
6 UJehu wasebabhalela incwadi yesibili wathi: “Nxa lingisekela njalo lizimisele ukungilalela, lethani amakhanda amadodana enkosi yenu, lifike kimi eJeziriyeli kusasa ngasonalesi isikhathi.”
Amadodana enkosi angu-70 ayehlala lamadoda ayehlonitshwa edolobheni.
7 Incwadi le yathi ifika kubo, bahle bathatha wonke amadodana enkosi angu-70 bawabulala+ basebefaka amakhanda awo emabhasikitini bawathumela kuJehu eJeziriyeli.
8 Isithunywa saya kuJehu samtshela sathi: “Sebewalethile amakhanda amadodana enkosi.” UJehu wasesithi: “Abutheleleni abe zinqumbi ezimbili egedini ledolobho, liwatshiye enjalo kuze kuse.”
9 Ekuseni waphuma wayakuma phambi kwabantu bonke wathi: “Lina alilacala.* Mina yimi engivukele inkosi yami ngayibulala,+ kodwa ngubani obulele bonke laba?
10 Yikho kumele lazi ukuthi alikho lelilodwa ilizwi likaJehova elakhulunywa nguJehova mayelana labendlu ka-Ahabi elingasoze ligcwaliseke.*+ UJehova usekwenzile lokho akukhuluma esebenzisa inceku yakhe u-Elija.”+
11 Phezu kwalokho uJehu wabulala bonke abendlu ka-Ahabi ababesele eJeziriyeli lazo zonke izikhulu zika-Ahabi, labangane bakhe kanye labaphristi bakhe,+ kazange atshiye ngitsho loyedwa wabo ephila.+
12 Ngemva kwalokho uJehu wasuka waya eSamariya. Endleleni kwakulendlu* yabelusi, lapho okwakugelwa khona izimvu.
13 Yikho lapho uJehu ahlangana khona labafowabo baka-Ahaziya+ inkosi yakoJuda. UJehu wababuza wathi: “Lingobani?” Bona baphendula bathi: “Singabafowabo baka-Ahaziya futhi sifuna ukuyabuza ukuthi amadodana enkosi lamadodana endlovukazi anjani.”
14 UJehu wahle wathi: “Babambeni!” Yikho bababamba bonke bengu-42 bababulalela emgodini wendlu yabelusi, kazange atshiye loyedwa wabo ephila.+
15 Wathi esesukile lapho wahlangana loJehonadabi+ indodana kaRekhabi+ owayezomhlangabeza. Wambingelela wathi kuye: “Inhliziyo yakho iqotho kimi yini njengoba lami ngiqotho kuwe?”
UJehonadabi waphendula wathi: “Ye iqotho.”
UJehu wasesithi: “Nxa kunjalo qhuba isandla.”
UJehonadabi waqhuba isandla sakhe, uJehu wambamba wamgadisa enqoleni yakhe
16 wasesithi kuye: “Asihambe sonke uyezibonela ukuthi angifuni muntu ophikisana loJehova.”*+ Ngakho uJehu wahamba laye ngenqola yakhe yempi.
17 Wathi efika eSamariya wabulala bonke abendlu ka-Ahabi ababesele eSamariya wabaqeda du,+ njengoba nje uJehova wayetshilo ku-Elija.+
18 Ngemva kwalokho uJehu wabuthanisa bonke abantu wathi: “U-Ahabi wamkhonza kancane uBhali+ kodwa uJehu uzamkhonza kakhulu.
19 Yikho ngibizelani bonke abaphrofethi bakaBhali+ labo bonke abantu abamkhonzayo kanye labaphristi bakhe bonke.+ Kungabi loyedwa wabo ozayekela ukubuya ngoba ngifuna ukwenzela uBhali umhlatshelo omkhulu. Loba ngubani ongasoze abuye uzabulawa.” Kodwa uJehu wayebaqila ngoba wayefuna ukubulala abantu ababekhonza uBhali.
20 UJehu waqhubeka wathi: “Yenzelani uBhali umhlangano ongcwele.” Basebewumemezela umhlangano.
21 Ngemva kwalokho uJehu wathumela ilizwi kulo lonke elako-Israyeli njalo bonke ababekhonza uBhali babuya, akula ngitsho loyedwa ongazange abuye. Bangena endlini kaBhali*+ bagcwala phakathi. Kwakuminyene indawo yonke kusukela emnyango kusiyafika emsamo.
22 UJehu wakhuluma lomuntu owayekhangela indlu okugcinelwa kuyo izembatho wathi: “Letha izembatho zabantu bonke abakhonza uBhali.” Yikho wabanika izembatho.
23 UJehu loJehonadabi+ indodana kaRekhabi bangena endlini kaBhali. UJehu wasesithi ebantwini abakhonza uBhali: “Khangelisisani ukuthi akulamuntu okhonza uJehova yini lapha, kumele kusale abakhonza uBhali kuphela.”
24 Ekucineni bangena bayakwenza imihlatshelo leminikelo yokutshiswa. UJehu wayetshiye amadoda angu-80 phandle futhi wayewatshele wathi: “Nxa kungaphunyuka oyedwa phakathi kwabantu laba engibanikele ezandleni zenu, yini elizakufa esikhundleni sakhe.”
25 Bathi beqeda nje ukwenza umnikelo wokutshiswa, uJehu wathi kubalindi lezinceku zakhe: “Ngenani phakathi libabulale, lingavumeli ngitsho loyedwa wabo aphunyuke!”+ Ngakho abalindi lezinceku zakhe bababulala ngenkemba baphosela izidumbu zabo phandle. Baqhubeka bebabulala baze bayafika endaweni engcwele yendlu kaBhali.
26 Bakhiphela phandle insika ezazikhonzwa+ endlini kaBhali bazitshisa zonke,+
27 badiliza insika+ kaBhali kanye lendlu yakhe+ bayenza yaba yisambuzi, futhi ilokhu injalo kuze kube lamuhla.
28 UJehu wakuqeda njalo ukukhonzwa kukaBhali ko-Israyeli.
29 Lanxa kunjalo uJehu kazange awasuse amathole egolide ayeseBhetheli lakoDani,+ walandela okwakwenziwe nguJerobhowami indodana kaNebhathi owabangela ukuthi abako-Israyeli bone.
30 UJehova wathi kuJehu: “Ngenxa yokuthi wenze okuhle lokulungileyo phambi kwami, wenza konke engangifuna ukwenze kwabendlu ka-Ahabi,+ abendlu yakho bazahlala esihlalweni sobukhosi sako-Israyeli+ kuze kube yisizukulwane sakho sesine.”
31 Kodwa uJehu kazange azihluphe ngokulandela uMthetho kaJehova uNkulunkulu ka-Israyeli ngenhliziyo yonke.+ Walandela okwakwenziwe nguJerobhowami owabangela ukuthi abako-Israyeli bone.+
32 Ngalezonsuku uJehova waqalisa ukuthathela abako-Israyeli ilizwe labo kancane kancane. UHazayeli waqhubeka ebahlasela kulo lonke elako-Israyeli,+
33 kusukela eJodani ngasempumalanga, lakulo lonke ilizwe leGiliyadi, koGadi, koRubheni lakoManase.+ Wayebahlasela kusukela e-Aroweri eseduze lesigodi se-Arinoni kusiyafika eGiliyadi leBhashani.+
34 Yonke imbali kaJehu lakho konke akwenzayo kanye lobuqhawe bakhe kubhaliwe ebhukwini lembali yamakhosi ako-Israyeli.
35 UJehu wafa bamngcwaba eSamariya. Indodana yakhe uJehowahazi+ yaba yinkosi esikhundleni sakhe.
36 UJehu wabusa abako-Israyeli eSamariya okweminyaka engu-28.
Amabala angaphansi
^ NgesiHebheru, “wendlu.”
^ Kumbe, “logavena.”
^ Kumbe, “lilungile.”
^ NgesiHebheru, “elizawela phansi.”
^ Kukhanya angani le kwakuyindawo lapho abelusi ababebophela khona izimvu okwakumele zigelwe uboya.
^ Kumbe, “ngimtshisekela njani uJehova.”
^ Kumbe, “ethempelini likaBhali.”
