Eyesibili EyamaKhosi 11:1-21
11 U-Athaliya+ unina ka-Ahaziya wathi ebona ukuthi indodana yakhe isifile,+ wabulala bonke abosendo lwesikhosini.+
2 Kodwa uJehoshebha indodakazi yeNkosi uJehoramu, udadewabo ka-Ahaziya, wamthatha ngudlu* uJehowashi+ indodana ka-Ahaziya emadodaneni enkosi ayezabulawa, wamfihla endlini yokulala engaphakathi. Wamgcina lapho elomuntu owayemnakekela. Baqhubeka bemfihlile njalo u-Athaliya kazange ambone. Yikho uJehowashi kazange abulawe.
3 Waqhubeka ehlala lapho efihliwe endlini kaJehova okweminyaka eyisithupha. Ngalesosikhathi u-Athaliya nguye owayebusa elizweni.
4 Ngomnyaka wesikhombisa uJehoyada wabiza izinduna zamakhulu ezazilinda abesikhosini* lezinduna zabalindi besigodlo,+ wathi zibuye kuye endlini kaJehova. Wenza lazo isivumelwano endlini kaJehova futhi wazifungisa ukuthi zizasigcina, wasezitshengisa indodana yenkosi.+
5 Watshela izinduna wathi: “Nanku okumele likwenze: Ingxenye eyodwa yeqembu lenu izabe isebenza ngeSabatha futhi kumele ilinde indlu yenkosi* ngonanzelelo.+
6 Enye ingxenye izalinda egedini lesisekelo, enye ilinde egedini elingemuva kwabalindi besigodlo. Lizabe litshintshana ukulinda indlu.
7 Amaqembu enu amabili obekumele ukuthi angalindi ngeSabatha, kumele alinde indlu kaJehova ngonanzelelo ukuze avikele inkosi.
8 Kumele liyigombolozele inkosi, ngamunye wenu ethwele izikhali zakhe. Loba ngubani ofika lapho abalindi abakhona kumele abulawe. Hambani lenkosi loba ngaphi lapho eya khona.”*
9 Izinduna zamakhulu+ zenza khona kanye ezazikutshelwe nguJehoyada umphristi. Ngamunye wazo wathatha amadoda ayewakhokhela okwakumele alinde ngeSabatha kanye lalawo okwakungamelanga alinde ngeSabatha, baya kuJehoyada umphristi.+
10 Umphristi wanika izinduna zamakhulu imikhonto lamahawu ayisigombolozi ayengaweNkosi uDavida, ayesendlini kaJehova.
11 Abalindi besigodlo+ bama ezindaweni zabo eduze kwe-alithare+ kanye lethempeli, kusukela kwesokudla kusiya kwesenxele. Bonke babegombolozele inkosi, ngamunye wabo ethwele izikhali zakhe.
12 UJehoyada waphuma lendodana yenkosi,+ wabeka umqhele ekhanda layo kanye lencwadimgoqwa yoMthetho.+ Bagcoba indodana yenkosi bayibeka ukuthi ibe yinkosi, basebeqalisa ukuqakeza besithi: “Kayibe lempilo ende inkosi!”+
13 U-Athaliya wathi esizwa umsindo wabantu begijima, wahle wasuka waya endlini kaJehova lapho okwakulabantu khona.+
14 Wabona inkosi imi eceleni kwensika, njengoba nje babesenza nxa kubekwa inkosi.+ Izinduna lababetshaya amacilongo+ babemi lenkosi futhi bonke abantu babethokoza betshaya amacilongo. U-Athaliya wathi ebona lokho wadabula izigqoko zakhe wamemeza wathi: “Bayahlamuka! Bayahlamuka!”
15 UJehoyada umphristi watshela izinduna zamakhulu+ ezazikhokhela ibutho wathi: “Msuseni phakathi kwabalindi. Loba ngubani ozamlandela limbulale ngenkemba.” Umphristi uJehoyada wayevele wabatshela wathi: “Lingambulaleli endlini kaJehova.”
16 Yikho bambamba bahamba laye. Bathi befika lapho okwakungena khona amabhiza esigodlweni senkosi*+ bambulala.
17 UJehoyada wenza isivumelwano phakathi kukaJehova lenkosi kanye labantu,+ esokuthi bazaqhubeka bengabantu bakaJehova. Waphinda wenza esinye isivumelwano phakathi kwenkosi labantu.+
18 Ngemva kwalokho bonke abantu baya endlini kaBhali* bafika badiliza ama-alithare akhe,+ bachoboza izithombe zakhe+ babulala loMathani umphristi kaBhali+ phambi kwama-alithare lawo.
Umphristi wabeka abaphathi ababezakhangela indlu kaJehova.+
19 Waphinda wathi izinduna zamakhulu,+ lalabo ababelinda abesikhosini,* labalindi besigodlo+ kanye labantu bonke, baphelekezele inkosi isuka endlini kaJehova. Bahamba ngendlela eyayidlula egedini labalindi besigodlo bayafika esigodlweni senkosi.* Ngemva kwalokho uJehowashi wahlala esihlalweni samakhosi.+
20 Ngakho bonke abantu bathokoza futhi kwaba lokuthula edolobheni ngoba u-Athaliya basebembulele ngenkemba endlini yenkosi.
21 UJehowashi+ wayeleminyaka eyisikhombisa ngesikhathi esiba yinkosi.+
Amabala angaphansi
^ NgesiHebheru, “wamtshontsha.”
^ NgesiHebheru, “ezingamaKhariya.”
^ Kumbe, “isigodlo senkosi.”
^ NgesiHebheru, “lapho iphuma lalapho ingena.”
^ Kumbe, “endlini yenkosi.”
^ Kumbe, “ethempelini likaBhali.”
^ NgesiHebheru, “lamaKhariya.”
^ Kumbe, “endlini yenkosi.”
