Eyesibili EyamaKhosi 13:1-25
13 Ngomnyaka wesi-23 wokubusa kukaJehowashi+ indodana ka-Ahaziya+ inkosi yakoJuda, uJehowahazi indodana kaJehu+ waba yinkosi yako-Israyeli eSamariya njalo wabusa okweminyaka engu-17.
2 Waqhubeka esenza okubi phambi kukaJehova futhi wenza izono ezazenziwe nguJerobhowami indodana kaNebhathi, lezo abangela abako-Israyeli ukuthi bazenze,+ kazange azitshiye.
3 Ngakho uJehova wabathukuthelela+ kakhulu abako-Israyeli+ wabanikela esandleni sikaHazayeli+ inkosi yeSiriya lasesandleni sikaBheni-hadadi+ indodana kaHazayeli zonke izinsuku zabo.
4 Ngokuhamba kwesikhathi uJehowahazi wancenga uJehova ukuthi abe lomusa kubo futhi uJehova wamlalela ngoba wayekubonile ukuthi inkosi yeSiriya yayibacindezela abako-Israyeli.+
5 Yikho uJehova wanika abako-Israyeli umuntu owabakhulula+ esandleni samaSiriya futhi abako-Israyeli baqalisa ukuhlala emizini yabo njengakuqala.*
6 (Lanxa kunjalo, abazange bayekele ukwenza izono zabendlu kaJerobhowami, lezo uJerobhowami abangela abako-Israyeli ukuthi bazenze.+ Baqhubeka besenza izono lezi njalo isithombe sika-Ashera*+ saqhubeka sikhona eSamariya.)
7 UJehowahazi wasala lamabutho angu-10 000, labagadi bamabhiza abangu-50 lezinqola zempi ezilitshumi kuphela ngoba inkosi yeSiriya yayibatshaye yababhuqa+ basala bengathi luthuli esizeni* ngesikhathi sokubhula amabele.+
8 Yonke imbali kaJehowahazi lakho konke akwenzayo kanye lobuqhawe bakhe kubhaliwe ebhukwini lembali yamakhosi ako-Israyeli.
9 UJehowahazi wafa wangcwatshwa emangcwabeni abokhokho bakhe eSamariya.+ Indodana yakhe uJehowashi yaba yinkosi esikhundleni sakhe.
10 Ngomnyaka wesi-37 wokubusa kukaJehowashi+ inkosi yakoJuda, uJehowashi indodana kaJehowahazi waba yinkosi yako-Israyeli eSamariya futhi wabusa okweminyaka engu-16.
11 Waqhubeka esenza okubi phambi kukaJehova, kazange azitshiye zonke izono uJerobhowami indodana kaNebhathi abangela ukuthi abako-Israyeli bazenze.+ Waqhubeka esenza izono lezo.
12 Yonke imbali kaJehowashi lakho konke akwenzayo, lobuqhawe bakhe kanye lokulwa kwakhe lo-Amaziya inkosi yakoJuda+ kubhaliwe ebhukwini lembali yamakhosi ako-Israyeli.
13 UJehowashi wafa, uJerobhowami*+ wasehlala esihlalweni sakhe sobukhosi. UJehowashi wangcwatshwa eSamariya emangcwabeni amakhosi ako-Israyeli.+
14 Ngesikhathi u-Elisha+ egula ephethwe ngumkhuhlane owacina umbulele, uJehowashi inkosi yako-Israyeli waya kuye wafika wakhala wathi: “Baba, baba! Inqola yempi yako-Israyeli labagadi bamabhiza!”+
15 U-Elisha wathi kuye: “Thatha idandili* lemitshoko.” UJehowashi wasethatha idandili lemitshoko.
16 U-Elisha wathi enkosini yako-Israyeli: “Bamba idandili lakho.” Inkosi yabamba idandili, u-Elisha wasebeka izandla zakhe phezu kwezandla zenkosi.
17 Wasesithi kuyo: “Vula iwindi elingasempumalanga.” Inkosi yalivula, u-Elisha wasesithi: “Tshoka umtshoko!” Yikho inkosi yatshoka umtshoko. U-Elisha wathi: “Umtshoko kaJehova wokunqoba, umtshoko wokunqoba amaSiriya! Uzawehlula amaSiriya e-Afekhi+ uwabulale uwaqede wonke.”
18 U-Elisha waqhubeka wathi enkosini: “Thatha imitshoko,” inkosi yasithatha imitshoko. U-Elisha wasesithi kuyo: “Tshoka phansi emhlabathini.” Inkosi yatshoka phansi kathathu yama.
19 Umuntu kaNkulunkulu weqiniso wazonda wathi: “Bekumele utshoke phansi kahlanu loba kasithupha! Aluba wenze njalo ubuzawatshaya uwabhuqe amaSiriya uwaqede wonke kodwa khathesi usuzawanqoba kathathu kuphela.”+
20 Ngemva kwalokho u-Elisha wafa wangcwatshwa. Kwakulamaqembu amabutho akoMowabi+ ayejayele ukuzohlasela elizweni umnyaka uqalisa.
21 Amanye amadoda athi engcwaba enye indoda abona iqembu lamabutho ayezohlasela, ahle aphosela isidumbu sendoda leyo lapho okwakungcwatshwe khona u-Elisha abaleka. Indoda eyayifile yathi ithinta amathambo ka-Elisha yavuka+ yama ngenyawo.
22 INkosi uHazayeli+ yacindezela abako-Israyeli+ zonke izinsuku zikaJehowahazi.
23 Kodwa uJehova waba lomusa lesihawu kubo+ futhi watshengisa ukuthi ulendaba labo ngenxa yesivumelwano asenza lo-Abrahama+ lo-Isaka+ loJakhobe.+ Wayengafuni ukubatshabalalisa, njalo kuze kube lamuhla kazange abaxotshe phambi kwakhe.
24 UHazayeli inkosi yeSiriya wathi esefile, indodana yakhe uBheni-hadadi yaba yinkosi esikhundleni sakhe.
25 UJehowashi indodana kaJehowahazi wathathela uBheni-hadadi indodana kaHazayeli amadolobho uHazayeli ayewathathele uJehowahazi ngesikhathi besilwa. UJehowashi wanqoba uBheni-hadadi kathathu+ njalo wathatha amadolobho ako-Israyeli.
Amabala angaphansi
^ Lapha kutshiwo ukuthi kwasekulokuthula njalo basebevikelekile.
^ Khangela iNgcazelo Yamabala.
^ Khangela iNgcazelo Yamabala.
^ Lapha kutshiwo uJerobhowami wesibili.
^ Khangela iNgcazelo Yamabala.
