Eyesibili EyamaKhosi 14:1-29
14 Ngomnyaka wesibili wokubusa kukaJehowashi+ indodana kaJehowahazi inkosi yako-Israyeli, u-Amaziya indodana kaJehowashi inkosi yakoJuda waba yinkosi.
2 Wayeleminyaka engu-25 ngesikhathi esiba yinkosi njalo wabusa eJerusalema okweminyaka engu-29. Unina kwakunguJehoyadini njalo wayengoweJerusalema.+
3 U-Amaziya waqhubeka esenza okulungileyo phambi kukaJehova kodwa hatshi njengoDavida+ ukhokho wakhe. Walandela konke okwakusenziwa nguJehowashi uyise.+
4 Kodwa izindawo eziphakemeyo* azizange zidilizwe+ futhi abantu babelokhu betshisa imihlatshelo njalo benikela ezindaweni eziphakemeyo.+
5 U-Amaziya wathi esewumise waqina umbuso wakhe, wahle wabulala izinceku zakhe ezazibulele uyise ngesikhathi eyinkosi.+
6 Kodwa kazange awabulale amadodana ezinceku lezo ezazibulele uyise ngoba wayelandela umlayo kaJehova obhalwe ebhukwini loMthetho kaMosi othi: “Obaba akumelanga babulawe ngenxa yezono zamadodana abo, lamadodana akumelanga abulawe ngenxa yezono zaboyise. Umuntu kumele abulawelwe isono sakhe kuphela.”+
7 UJehowashi wabulala amadoda ako-Edomi+ angu-10 000 esigodini sesawudo+ njalo walwa leSela wayithumba.+ Ngemva kwalokho yabizwa ngokuthi yiJokhitheyeli futhi ilokhu ibizwa njalo kuze kube lamuhla.
8 U-Amaziya wathuma izithunywa kuJehowashi indodana kaJehowahazi indodana kaJehu inkosi yako-Israyeli esithi: “Buya sidibane empini.”*+
9 UJehowashi inkosi yako-Israyeli wasethumela ilizwi ku-Amaziya inkosi yakoJuda wathi: “Isihlahlakazana sameva seLebhanoni sathumela ilizwi kumsedari weLebhanoni sisithi, ‘Yendisela indodakazi yakho endodaneni yami.’ Kodwa kwadlula inyamazana yeganga yaseLebhanoni yasinyathela isihlahlakazana sameva.
10 Ubanqobile sibili abako-Edomi+ yikho usuzigqaja. Kholisa udumo lwakho usendlini yakho.* Kungani usufuna ukuzidalela umonakalo ozakubulalisa wena labantu bakoJuda?”
11 Kodwa u-Amaziya kazange alalele.+
Ngakho uJehowashi inkosi yako-Israyeli wasuka wayadibana lo-Amaziya inkosi yakoJuda empini eBhethi-shemeshi+ yakoJuda.+
12 AbakoJuda banqotshwa ngabako-Israyeli, ngamunye wabaleka waya emzini wakhe.*
13 UJehowashi inkosi yako-Israyeli wabamba u-Amaziya inkosi yakoJuda indodana kaJehowashi indodana ka-Ahaziya eBhethi-shemeshi, waya laye eJerusalema. Wafika wadiliza umduli weJerusalema kusukela egedini lako-Efrayimi+ kusiyafika egedini elisekhoneni,+ umango ongaba ngamamitha angu-178.*
14 Wathatha lonke igolide lesiliva lazo zonke izitsha ezazisendlini kaJehova lasezindlini zokugcinela inotho yendlu yenkosi.* Wathumba labantu wasebuyela eSamariya.
15 Yonke imbali kaJehowashi lalokho akwenzayo, lobuqhawe bakhe kanye lokulwa kwakhe lo-Amaziya inkosi yakoJuda kubhaliwe ebhukwini lembali yamakhosi ako-Israyeli.
16 UJehowashi wafa wangcwatshwa eSamariya+ emangcwabeni amakhosi ako-Israyeli. Indodana yakhe uJerobhowami*+ yaba yinkosi esikhundleni sakhe.
17 U-Amaziya+ indodana kaJehowashi inkosi yakoJuda waphila iminyaka engu-15 ngemva kokufa kukaJehowashi+ indodana kaJehowahazi, inkosi yako-Israyeli.+
18 Yonke imbali ka-Amaziya ibhaliwe ebhukwini lembali yamakhosi akoJuda.
19 Ngemva kwesikhathi abantu beJerusalema benza icebo lokumhlamukela+ u-Amaziya. Yikho wabaleka waya eLakhishi kodwa bathuma amadoda amlandela khonale afika ambulala.
20 Bamthwala ngamabhiza bayamngcwaba eJerusalema emangcwabeni abokhokho bakhe, edolobheni likaDavida.+
21 Ngemva kwalokho bonke abantu bakoJuda bathatha u-Azariya*+ bambeka ukuthi abe yinkosi esikhundleni sikayise u-Amaziya.+ Ngalesosikhathi wayeleminyaka engu-16.+
22 INkosi u-Amaziya yathi isifile,+ u-Azariya wakha kutsha i-Elathi+ wayibuyisela ebantwini bakoJuda.
23 Ngomnyaka wesi-15 wokubusa kuka-Amaziya indodana kaJehowashi inkosi yakoJuda, uJerobhowami+ indodana kaJehowashi inkosi yako-Israyeli waba yinkosi eSamariya futhi wabusa okweminyaka engu-41.
24 Waqhubeka esenza okubi phambi kukaJehova. Kazange azitshiye zonke izono uJerobhowami indodana kaNebhathi ayebangele ukuthi abako-Israyeli bazenze.+
25 Wabuyisela umngcele wako-Israyeli kusukela eLebho-hamathi*+ kuze kuyefika eLwandle lwe-Arabha,*+ njengoba nje uJehova uNkulunkulu ka-Israyeli wayetshilo esebenzisa uJona+ indodana ka-Amithayi, umphrofethi owayedabuka eGathi-heferi.+
26 Phela uJehova wayesebubonile ubunzima abako-Israyeli ababephakathi kwabo.+ Kwakungela loyedwa owayenganceda abako-Israyeli, kungela ngitsho labangelamandla okuzivikela lababuthakathaka.
27 Kodwa uJehova wayethembise ukuthi wayengasoze alesule ibizo labako-Israyeli emhlabeni.+ Ngakho wabasindisa ngesandla sikaJerobhowami indodana kaJehowashi.+
28 Yonke imbali kaJerobhowami lakho konke akwenzayo, lobuqhawe bakhe kanye lezimpi azilwayo lokuthi wabuyisela iDamaseko+ leHamathi+ ebantwini bakoJuda labako-Israyeli, kubhaliwe ebhukwini lembali yamakhosi ako-Israyeli.
29 UJerobhowami wafa wangcwatshwa emangcwabeni amakhosi ako-Israyeli. Indodana yakhe uZakhariya+ yaba yinkosi esikhundleni sakhe.
Amabala angaphansi
^ Khangela iNgcazelo Yamabala.
^ Kumbe, “siqondane ubuso ngobuso.”
^ Kumbe, “usesigodlweni sakho.”
^ NgesiHebheru, “etendeni lakhe.”
^ Kumbe, “zingalo ezingu-400.” Khangela iSengezo ku-B14.
^ Kumbe, “yesigodlo senkosi.”
^ Lapha kutshiwo uJerobhowami wesibili.
^ Ibizo leli litsho ukuthi, “UJehova uncedile.” U-Azariya ubizwa langokuthi ngu-Uziya ku-2Am 15:13; 2Imi 26:1-23; Isy 6:1 lakuZak 14:5
^ Kumbe, “egedini leHamathi.”
^ Lapha kutshiwo uLwandle Lwesawudo.
