Eyesibili EyamaKhosi 15:1-38
15 Ngomnyaka wesi-27 wokubusa kukaJerobhowami* inkosi yako-Israyeli, u-Azariya*+ indodana ka-Amaziya+ inkosi yakoJuda waqalisa ukubusa.+
2 Wayeleminyaka engu-16 ngesikhathi esiba yinkosi futhi wabusa eJerusalema okweminyaka engu-52. Unina kwakunguJekholiya njalo wayengoweJerusalema.
3 U-Azariya waqhubeka esenza okulungileyo phambi kukaJehova njengoyise u-Amaziya.+
4 Kodwa izindawo eziphakemeyo* azizange zidilizwe+ futhi abantu babelokhu betshisa imihlatshelo njalo benikela ezindaweni eziphakemeyo.+
5 UJehova watshaya iNkosi u-Azariya ngobulephero njalo yaba lobulephero+ yaze yafa. Yayisihlala yodwa kwenye indlu+ njalo indodana yayo uJothamu+ yiyo eyayisiphethe isigodlo,* isahlulela abantu elizweni.+
6 Yonke imbali ka-Azariya+ lakho konke akwenzayo kubhaliwe ebhukwini lembali yamakhosi akoJuda.
7 U-Azariya wafa wangcwatshwa emangcwabeni abokhokho bakhe+ edolobheni likaDavida, indodana yakhe uJothamu yasisiba yinkosi esikhundleni sakhe.
8 Ngomnyaka wesi-38 wokubusa kuka-Azariya+ inkosi yakoJuda, uZakhariya+ indodana kaJerobhowami waba yinkosi yako-Israyeli eSamariya futhi wabusa okwenyanga eziyisithupha.
9 Wenza okubi phambi kukaJehova njengabokhokho bakhe. Waqhubeka esenza izono ezenziwa nguJerobhowami indodana kaNebhathi, ezabangela ukuthi abako-Israyeli bone.+
10 UShalumi indodana kaJabheshi wahlamukela uZakhariya wambulala+ e-Ibhiliyami.+ Wathi esembulele, waba yinkosi esikhundleni sakhe.
11 Yonke imbali kaZakhariya ibhaliwe ebhukwini lembali yamakhosi ako-Israyeli.
12 Ngakho lagcwaliseka ilizwi likaJehova ayelitshele uJehu, elithi: “Abendlu yakho bazahlala esihlalweni sobukhosi sako-Israyeli+ kuze kube yisizukulwane sesine.”+ Lokhu yikho okwenzakalayo.
13 Ngomnyaka wesi-39 wokubusa kuka-Uziya+ inkosi yakoJuda, uShalumi indodana kaJabheshi waba yinkosi futhi wabusa okwenyanga egcweleyo eSamariya.
14 UMenahemu indodana kaGadi wasuka eThiriza+ waya eSamariya wafika wabulala uShalumi+ indodana kaJabheshi. Wathi esembulele waba yinkosi esikhundleni sakhe.
15 Yonke imbali kaShalumi kanye lokuhlamuka kwakhe kubhaliwe ebhukwini lembali yamakhosi ako-Israyeli.
16 Kungalesosikhathi lapho uMenahemu abuya khona evela eThiriza wahlasela iThifisa labo bonke ababekuyo kanye lezindawo zayo ngenxa yokuthi abantu balapho abazange bamvulele amagedi. Wayihlasela waqhaqha izisu zabesifazana abazithweleyo.
17 Ngomnyaka wesi-39 wokubusa kuka-Azariya inkosi yakoJuda, uMenahemu indodana kaGadi waba yinkosi ko-Israyeli futhi wabusa okweminyaka elitshumi eSamariya.
18 Waqhubeka esenza okubi phambi kukaJehova njalo okwempilo yakhe yonke kazange azitshiye zonke izono uJerobhowami indodana kaNebhathi abangela ukuthi abako-Israyeli bazenze.+
19 UPhuli+ inkosi ye-Asiriya weza ezohlasela ilizwe lako-Israyeli. UMenahemu wanika uPhuli amathalenta* esiliva angu-1 000 ukuze uPhuli amncedise ukuqinisa umbuso wakhe.+
20 Ngakho uMenahemu wabhadalisa izikhulu+ imali ukuze athole isiliva leso. Wathatha amashekheli* esiliva angu-50 endodeni ngayinye, wawanika inkosi ye-Asiriya. Yikho inkosi ye-Asiriya yasuka yahamba, ayisazange iqhubeke iselizweni.
21 Yonke imbali kaMenahemu+ lakho konke akwenzayo kubhaliwe ebhukwini lembali yamakhosi ako-Israyeli.
22 UMenahemu wafa njalo indodana yakhe uPhekhahiya yaba yinkosi esikhundleni sakhe.
23 Ngomnyaka wesi-50 wokubusa kuka-Azariya inkosi yakoJuda, uPhekhahiya indodana kaMenahemu waba yinkosi yako-Israyeli eSamariya futhi wabusa okweminyaka emibili.
24 Waqhubeka esenza okubi phambi kukaJehova. Kazange azitshiye izono ezenziwa nguJerobhowami indodana kaNebhathi, lezo abangela ukuthi abako-Israyeli bazenze.+
25 Inceku yakhe uPhekha+ indodana kaRemaliya yamhlamukela yasimbulala eSamariya enqabeni yendlu yenkosi,* lo-Arigobi lo-Ariye. UPhekha wayelamadoda eGiliyadi angu-50 futhi wathi esebulele uPhekhahiya, waba yinkosi esikhundleni sakhe.
26 Yonke imbali kaPhekhahiya lakho konke akwenzayo kubhaliwe ebhukwini lembali yamakhosi ako-Israyeli.
27 Ngomnyaka wesi-52 wokubusa kuka-Azariya inkosi yakoJuda, uPhekha+ indodana kaRemaliya waba yinkosi yako-Israyeli eSamariya njalo wabusa okweminyaka engu-20.
28 Waqhubeka esenza okubi phambi kukaJehova. Kazange azitshiye izono uJerobhowami indodana kaNebhathi abangela ukuthi abako-Israyeli bazenze.+
29 Ngensuku zikaPhekha inkosi yako-Israyeli, uThigilathi-phileseri+ inkosi ye-Asiriya wahlasela wathumba i-Ijoni, le-Abheli-bhethi-mahakha,+ leJanowa, leKhedeshi,+ leHazori, leGiliyadi+ kanye leGalile, lonke nje ilizwe lakoNafithali.+ Wathumba abantu ababehlala emadolobheni lawo wabasa e-Asiriya.+
30 UHosheya+ indodana ka-Ela wabumba icebo lokuhlamukela uPhekha indodana kaRemaliya. Wamhlasela wambulala wasesiba yinkosi esikhundleni sakhe. Kwakungumnyaka wesi-20 wokubusa kukaJothamu+ indodana ka-Uziya.
31 Yonke imbali kaPhekha lakho konke akwenzayo kubhaliwe ebhukwini lembali yamakhosi ako-Israyeli.
32 Ngomnyaka wesibili wokubusa kukaPhekha indodana kaRemaliya inkosi yako-Israyeli, uJothamu+ indodana ka-Uziya+ inkosi yakoJuda waba yinkosi.
33 Wayeleminyaka engu-25 ngesikhathi esiba yinkosi futhi wabusa eJerusalema okweminyaka engu-16. Unina kwakunguJerusha indodakazi kaZadokhi.+
34 UJothamu waqhubeka esenza okulungileyo phambi kukaJehova njengoyise u-Uziya.+
35 Kodwa izindawo eziphakemeyo azizange zidilizwe futhi abantu babelokhu betshisa imihlatshelo njalo benikela ezindaweni eziphakemeyo.+ UJothamu nguye owakha igedi lendlu kaJehova elingaphezulu.+
36 Yonke imbali kaJothamu lalokho akwenzayo kubhaliwe ebhukwini lembali yamakhosi akoJuda.
37 Ngalezonsuku uJehova waqalisa ukuthuma uRezini inkosi yeSiriya loPhekha+ indodana kaRemaliya ukuthi bayehlasela abakoJuda.+
38 UJothamu wafa wangcwatshwa emangcwabeni abokhokho bakhe edolobheni likaDavida ukhokho wakhe, indodana yakhe u-Ahazi yasisiba yinkosi esikhundleni sakhe.
Amabala angaphansi
^ Ibizo leli litsho ukuthi, “UJehova uncedile.” U-Azariya ubizwa langokuthi ngu-Uziya ku-2Am 15:13; 2Imi 26:1-23; Isy 6:1 lakuZak 14:5.
^ Lapha kutshiwo uJerobhowami wesibili.
^ Khangela iNgcazelo Yamabala.
^ Kumbe, “indlu.”
^ Ithalenta lalingamakhilogremu angu-34,2. Khangela iSengezo ku-B14.
^ Ishekheli yayilingana lamagremu angu-11,4. Khangela iSengezo ku-B14.
^ Kumbe, “yesigodlo senkosi.”