Eyesibili EyamaKhosi 21:1-26
21 UManase+ wayeleminyaka engu-12 ngesikhathi esiba yinkosi njalo wabusa eJerusalema okweminyaka engu-55.+ Ibizo likanina kwakunguHefizibha.
2 Wenza okubi phambi kukaJehova elandela izenzo ezenyanyekayo zezizwe+ uJehova ayezixotshe phambi kwabako-Israyeli.+
3 Wakha kutsha izindawo eziphakemeyo* ezazidilizwe nguyise uHezekhiya,+ wakhela uBhali ama-alithare njalo wenza lesithombe sika-Ashera,*+ njengalokho okwakwenziwe ngu-Ahabi inkosi yako-Israyeli.+ Wakhothamela lonke ibutho elisemazulwini* walikhonza.+
4 Wakha lama-alithare endlini kaJehova,+ leyo uJehova ayekhulume ngayo wathi: “Ngizabeka ibizo lami eJerusalema.”+
5 Waphinda wakhela lonke ibutho elisemazulwini* ama-alithare+ emagumeni womabili endlu kaJehova.+
6 Watshisa indodana yakhe emlilweni, wenza amasalamusi, wahlahlula+ futhi wavumela ukuthi kube lezangoma labalomoya wokutshela abantu ngekusasa.+ Wenza izinto ezinengi kakhulu ezimbi phambi kukaJehova wamthukuthelisa.
7 Wathatha isithombe sika-Ashera*+ ayesibazile wasifaka endlini uJehova ayekhulume ngayo kuDavida lakuSolomoni indodana yakhe wathi: “Ngizafaka ibizo lami endlini le laseJerusalema, idolobho engilikhethileyo kuzo zonke izizwana zako-Israyeli, ukuze lihlale khona kokuphela.+
8 Angisoze ngiphinde ngenze abako-Israyeli basuke elizweni engalinika okhokho babo+ nxa bangenza konke engabatshela khona,+ konke okuseMthethweni inceku yami uMosi eyabatshela ukuthi bawulandele.”
9 Kodwa bona abazange balalele. UManase waqhubeka ebadukisa. Wabangela ukuthi benze okubi kakhulu ukwedlula izizwe uJehova ayezitshabalalise phambi kwabako-Israyeli.+
10 UJehova waqhubeka ekhuluma lezinceku zakhe ezingabaphrofethi+ esithi:
11 “UManase inkosi yakoJuda wenze zonke izinto lezi ezenyanyekayo. Wenze okubi ukwedlula wonke ama-Amori+ aphila ngaphambi kwakhe+ njalo ubangele ukuthi abakoJuda bone ngenxa yezithombe zakhe ezenyanyekayo.*
12 Yikho nanku okutshiwo nguJehova uNkulunkulu ka-Israyeli: ‘Ngizaletha umonakalo omkhulu phezu kweJerusalema+ lakoJuda, ozakwenza ukuthi indlebe zaloba ngubani ozwa ngawo zincencethe.+
13 Ngizakwelula phezu kweJerusalema intambo yokulinganisa+ eyasetshenziswa eSamariya,+ ngelule lentambo yokuqondisa eyasetshenziswa phezu kwendlu ka-Ahabi.+ Ngizakwesula iJerusalema ngiyitshiye ihlanzekile njengomuntu owesula umganu usale uhlanzekile abesewumbokotha.+
14 Abantu bami abaseleyo ngizabalahla+ futhi ngibanikele ezandleni zezitha zabo. Bazathunjwa babe yimpahla yezitha zabo zonke+
15 ngoba benza okubi phambi kwami, baqhubeka bengithukuthelisa kusukela ngelanga okhokho babo abaphuma ngalo eGibhithe kuze kube lamuhla.’”+
16 Phezu kokubangela ukuthi abakoJuda bone ngokwenza okubi phambi kukaJehova, uManase wabulala abantu abanengi kakhulu abangelacala, wagcwalisa yonke iJerusalema+ ngegazi labo.
17 Yonke imbali kaManase, lakho konke akwenzayo kanye lezono zakhe kubhaliwe ebhukwini lembali yamakhosi akoJuda.
18 UManase wafa wangcwatshwa engadini eyayisemzini wakhe, ingadi ka-Uza.+ Ngemva kwalokho indodana yakhe u-Amoni yaba yinkosi esikhundleni sakhe.
19 U-Amoni+ wayeleminyaka engu-22 ngesikhathi esiba yinkosi futhi wabusa eJerusalema okweminyaka emibili.+ Unina kwakunguMeshulemethi indodakazi kaHaruzi weJothibha.
20 Waqhubeka esenza okubi phambi kukaJehova njengalokho okwakwenziwe nguyise uManase.+
21 Waqhubeka esenza konke okwakusenziwa nguyise futhi ekhonza njalo ekhothamela izithombe ezenyanyekayo ezazikhonzwa nguyise.+
22 Watshiya uJehova uNkulunkulu wabokhokho bakhe njalo kazange ahambe ezindleleni zikaJehova.+
23 Izinceku zika-Amoni zabumba icebo lokumhlamukela, zambulala endlini yakhe.
24 Kodwa abantu belizwe bababulala bonke ababehlamukele iNkosi u-Amoni, basebebeka uJosiya indodana yayo ukuthi abe yinkosi esikhundleni sayo.+
25 Yonke imbali ka-Amoni lalokho akwenzayo kubhaliwe ebhukwini lembali yamakhosi akoJuda.
26 Bamngcwaba ethuneni lakhe engadini ka-Uza,+ indodana yakhe uJosiya+ yasisiba yinkosi esikhundleni sakhe.
Amabala angaphansi
^ Khangela iNgcazelo Yamabala.
^ Khangela iNgcazelo Yamabala.
^ Lapha kutshiwo ilanga lenyanga lezinkanyezi.
^ Lapha kutshiwo ilanga lenyanga lezinkanyezi.
^ Khangela iNgcazelo Yamabala.
^ Ibala lesiHebheru elisetshenziswe lapha lingabe lihambelana lebala elitsho ubulongwe futhi lisetshenziswa nxa kukhulunywa ngento enyanyisayo.
