Eyesibili EyamaKhosi 22:1-20
22 UJosiya+ wayeleminyaka engu-8 ngesikhathi esiba yinkosi futhi wabusa eJerusalema okweminyaka engu-31.+ Unina kwakunguJedida indodakazi ka-Adaya waseBhozikhathi.+
2 Wenza okulungileyo phambi kukaJehova wahamba kuzo zonke izindlela zikakhokho wakhe uDavida.+ Kazange aphambukele kwesokudla loba kwesenxele.
3 Ngomnyaka wesi-18 wokubusa kweNkosi uJosiya, inkosi yathuma uShafani unobhala, indodana ka-Azaliya indodana kaMeshulami, endlini kaJehova+ yathi kuye:
4 “Hamba kuHilikhiya+ umphristi omkhulu umtshele aqoqe imali yonke elethwa endlini kaJehova,+ leyo abalindi beminyango abayithatha ebantwini.+
5 Kumele bayinike labo ababekwe ukuthi bakhangele umsebenzi owenziwa endlini kaJehova, bona bayiphe labo abazakwenza umsebenzi wokulungisa indlu kaJehova,*+
6 izingcitshi zomsebenzi, labakhi lalabo abakwazi ukwakha ngamatshe. Imali leyo bazayisebenzisa ukuthenga izigodo lamatshe abaziweyo abazawasebenzisa ukulungisa indlu.+
7 Kodwa akumelanga babuzwe ukuthi imali abayiphiweyo bayisebenzise njani ngoba bangamadoda athembekileyo.”+
8 Ngemva kwesikhathi uHilikhiya umphristi omkhulu watshela uShafani unobhala+ wathi: “Ngithole ibhuku loMthetho+ endlini kaJehova.” UHilikhiya wasenika uShafani ibhuku lelo, uShafani walibala.+
9 UShafani unobhala wasesiya enkosini wafika wathi kuyo: “Izinceku zakho zithethe yonke imali etholakale endlini zayinika labo ababekwe ukuthi bakhangele umsebenzi owenziwa endlini kaJehova.”+
10 UShafani unobhala waqhubeka wathi enkosini: “Kulebhuku+ engiliphiwe ngumphristi uHilikhiya.” UShafani waseqalisa ukulibalela inkosi.
11 Inkosi yathi isizwa amazwi ayesebhukwini loMthetho yadabula izigqoko zayo,+
12 yasitshela umphristi uHilikhiya, lo-Ahikhamu+ indodana kaShafani, lo-Akhibhori indodana kaMikhaya, loShafani unobhala kanye lo-Asaya inceku yayo, yathi:
13 “Hambani liyengibuzela kuJehova ngamazwi asebhukwini leli elitholakeleyo, libuzele labantu kanye labo bonke abakoJuda ngoba uJehova usithukuthelele kakhulu+ ngenxa yokuthi okhokho bethu abawalalelanga amazwi asebhukwini leli, futhi abakwenzanga okubhalwe kulo okwakumele kwenziwe yisizwe sakithi.”
14 Ngakho umphristi uHilikhiya, lo-Ahikhamu, lo-Akhibhori, loShafani, lo-Asaya baya kumphrofethikazi+ uHulida. UHulida wayeyinkosikazi kaShalumi indodana kaThikhiva indodana kaHarihasi, owayekhangela indlu okwakugcinelwa kuyo izigqoko. UHulida wayehlala esigabeni esitsha sedolobho leJerusalema njalo yikho lapho amadoda la akhuluma laye khona.+
15 Wathi kuwo: “Nanku okutshiwo nguJehova uNkulunkulu ka-Israyeli, ‘Kumele litshele indoda elithume kimi lithi:
16 “UJehova uthi, ‘Ngizakwehlisela umonakalo endaweni le lakubo bonke abahlala kuyo njalo wonke amazwi asebhukwini elibalwe yinkosi yakoJuda azagcwaliseka.+
17 Ulaka lwami luzavutha phezu kwendawo le futhi alusoze luphele+ ngoba abantu laba bangitshiyile batshisela abanye onkulunkulu imihlatshelo,+ bengithukuthelisa ngakho konke abakwenza ngezandla zabo.’”+
18 Kodwa enkosini yakoJuda elithume ukuthi lizobuza kuJehova kumele lithi, “Nanku okutshiwo nguJehova uNkulunkulu ka-Israyeli mayelana lamazwi owazwileyo:
19 ‘Ngiwuzwile umthandazo wakho ngenxa yokuthi inhliziyo yakho ikwamukele okuzwileyo, wazehlisa+ phambi kukaJehova ngesikhathi usizwa engikukhulumileyo mayelana lendawo le labantu abahlala kuyo, ukuthi bazaqalekiswa njalo loba ngubani obabonayo uzakwethuka. Ngikuzwile ngoba udabule izigqoko zakho+ wakhala phambi kwami, kutsho uJehova.
20 Ngenxa yalokho, amehlo akho awasoze awubone umonakalo engizawehlisela indawo le. Uzakufa* ungcwatshwe engcwabeni lakho ngokuthula.’”’” Basuka lapho bayatshela inkosi impendulo.
Amabala angaphansi
^ Kumbe, “wokulungisa lapho imiduli yendlu kaJehova edabuke khona.”
^ Kumbe, “Uzalala ndawonye labokhokho bakho.”