Eyesibili EyamaKhosi 24:1-20
24 Ngensuku zikaJehoyakhimu, uNebhukhadinezari+ inkosi yeBhabhiloni wabuya wazomhlasela. UJehoyakhimu waba yinceku yakhe okweminyaka emithathu kodwa wacina ehlamuka.
2 UJehova wasethumela amaqembu amabutho amaKhaledi,+ laweSiriya, lawamaMowabi kanye lawama-Amoni ukuthi amhlasele. Waqhubeka ewathuma elizweni lakoJuda ukuze alitshabalalise, njengoba nje uJehova wayekhulumile+ esebenzisa izinceku zakhe ezingabaphrofethi.
3 UJehova nguye owathi lokhu kwenzakale koJuda ukuze abasuse phambi kwakhe+ ngenxa yazo zonke izono ezazenziwe nguManase,+
4 lokubulala kwakhe abantu abangelacala.+ Phela wagcwalisa iJerusalema ngegazi labantu abangelacala, yikho uJehova wayengafuni ukuxola.+
5 Yonke imbali kaJehoyakhimu lakho konke akwenzayo kubhaliwe ebhukwini lembali yamakhosi akoJuda.+
6 UJehoyakhimu wafa,+ indodana yakhe uJehoyakhini yasisiba yinkosi esikhundleni sakhe.
7 Inkosi yeGibhithe ayiphindanga yaphuma elizweni layo isiyahlasela ngoba inkosi yeBhabhiloni yayisithethe yonke indawo eyayingeyenkosi yeGibhithe,+ kusukela esihotsheni* seGibhithe+ kuze kuyefika emfuleni uYufrathe.+
8 UJehoyakhini+ wayeleminyaka engu-18 ngesikhathi esiba yinkosi, futhi wabusa eJerusalema+ okwenyanga ezintathu. Unina kwakunguNehushitha indodakazi ka-Elinathani waseJerusalema.
9 Waqhubeka esenza okubi phambi kukaJehova, elandela konke okwakusenziwa nguyise.
10 Ngalesosikhathi izinceku zikaNebhukhadinezari inkosi yeBhabhiloni zabuya zizohlasela iJerusalema zayivimbezela.+
11 UNebhukhadinezari inkosi yeBhabhiloni wafika ngesikhathi izinceku zakhe zivimbezele idolobho.
12 UJehoyakhini inkosi yakoJuda waphuma waya enkosini yeBhabhiloni+ elonina, lezinceku zakhe, labakhokheli* kanye leziphathamandla zesigodlweni.+ Inkosi yeBhabhiloni yathumba uJehoyakhini ngomnyaka wesi-8 wokubusa kwayo.+
13 Yathatha zonke impahla eziligugu ezazisendlini kaJehova lasendlini yenkosi.*+ Yaqumaquma zonke izitsha zegolide ezazisethempelini likaJehova, ezazenziwe nguSolomoni inkosi yako-Israyeli.+ Lokhu kwenzakala njengoba nje uJehova wayetshilo.
14 Yathumba bonke abantu ababeseJerusalema, zonke izikhulu zenkosi,*+ lawo wonke amaqhawe alamandla, lazo zonke izingcitshi zemisebenzi labakhandi bensimbi.+ Yathumba abantu abangu-10 000. Akulamuntu owasalayo elizweni ngaphandle kwalabo ababengabayanga.+
15 Inkosi yeBhabhiloni yathumba uJehoyakhini+ eJerusalema yamusa eBhabhiloni.+ Yathatha lonina, lamakhosikazi akhe, leziphathamandla zesigodlweni kanye lamadoda ahlonitshwayo elizweni yahamba labo eBhabhiloni.
16 Inkosi yeBhabhiloni yathumba wonke amaqhawe angu-7 000, yathumba labangu-1 000 ababezingcitshi zemisebenzi labakhandi bensimbi. Bonke babengamaqhawe, beyifundele impi.
17 Inkosi yeBhabhiloni yabeka uMathaniya umfowabo kayise kaJehoyakhini+ waba yinkosi esikhundleni sikaJehoyakhini, yasimtshintsha ibizo waba nguZedekhiya.+
18 UZedekhiya wayeleminyaka engu-21 ngesikhathi esiba yinkosi futhi wabusa eJerusalema okweminyaka engu-11. Unina kwakunguHamuthali+ indodakazi kaJeremiya waseLibhina.
19 UZedekhiya waqhubeka esenza okubi phambi kukaJehova, elandela konke okwakusenziwa nguJehoyakhimu.+
20 UJehova wayethukuthele, yikho izinto lezi zenzakala koJuda laseJerusalema waze wacina ebasusile phambi kwakhe.+ UZedekhiya wahlamukela inkosi yeBhabhiloni.+
Amabala angaphansi
^ Khangela iNgcazelo Yamabala.
^ Kumbe, “lamadodana akhe.”
^ Kumbe, “lasesigodlweni senkosi.”
^ Kumbe, “wonke amadodana enkosi.”
