Eyesibili EyamaKhosi 4:1-44
4 Kwafika owesifazana owayethethwe ngomunye wamadodana abaphrofethi+ wakhala ku-Elisha wathi: “Umkami obeyinceku yakho usefile, futhi wena uyakwazi ukuthi wayemesaba kakhulu uJehova.+ Khathesi kufike umuntu ayelesikwelede sakhe njalo usefuna ukuthatha abantwabami bobabili abenze izigqili zakhe.”
2 U-Elisha wamphendula wathi: “Manje ufuna ngikwenzeleni? Ngitshela ukuthi ulani endlini.” Owesifazana wasesithi: “Incekukazi yakho ayilalutho ngaphandle kwembiza elamafutha.”+
3 U-Elisha wathi: “Phuma ubhode kubo bonke omakhelwane bakho uboleke imbiza ezingelalutho. Ungaboleki ezilutshwana.
4 Nxa usuzitholile imbiza ungene endlini lamadodana akho livale umnyango, ugcwalise zonke imbiza lezo ngamafutha, eziyabe sezigcwele uzibeke eceleni.”
5 Owesifazana wasesuka wahamba.
Wangena endlini lamadodana akhe bavala umnyango. Ayelokhu emqhubela imbiza yena ethela amafutha.+
6 Imbiza zathi sezigcwele wathi kwenye indodana yakhe: “Ngiqhubela enye imbiza.”+ Kodwa indodana yakhe yathi: “Akusela.” Ngakho amafutha ama khonapho.+
7 Owesifazana wasuka wayatshela umuntu kaNkulunkulu weqiniso, yena wasesithi: “Hamba uyethengisa amafutha lawo ubhadale izikwelede zakho, besekusithi wena lamadodana akho lisebenzise imali eseleyo.”
8 Ngelinye ilanga u-Elisha waya eShunemi.+ Endaweni le kwakulomunye owesifazana owayehlonitshwa kakhulu. Owesifazana lo wamncenga ukuthi azokudla emzini wakhe.+ Yikho u-Elisha wayesithi nxa edlula lapho, angene emzini lowo adle.
9 Owesifazana lo wathi kumkakhe: “Ngiyakwazi ukuthi indoda le ejayele ukudlula lapha ngumuntu ongcwele kaNkulunkulu.
10 Ngicela simakhele indlu ephahleni+ simfakele umbheda, letafula, lesitulo kanye lesibane. Uzakuthi angafika lapha ahlale kuyo.”+
11 Ngelinye ilanga u-Elisha wafika lapho wasesiyalala endlini esephahleni.
12 Wathi encekwini yakhe uGehazi:+ “Biza owesifazana weShunemi.”+ UGehazi wasembiza, owesifazana wabuya.
13 U-Elisha wasesithi kuGehazi: “Ngicela umbuze uthi, ‘Njengoba usebenze nzima usenzela konke lokhu,+ ufuna ngikwenzeleni?+ Ngikukhulumele lenkosi+ kumbe lomkhokheli wamabutho?’” Owesifazana wasephendula wathi: “Akulanto engikhathazayo ngoba ngihlala labantu bakithi.”
14 Ngakho u-Elisha wathi: “Manje simenzeleni?” UGehazi wasesithi: “Kalandodana+ futhi lomkakhe usegugile.”
15 U-Elisha wahle wathi: “Mbize.” UGehazi wambiza, owesifazana wafika wama emnyango.
16 U-Elisha wathi kuye: “Ngesikhathi lesi ngomnyaka ozayo uzabe uphethe indodana.”+ Kodwa yena waphendula wathi: “Hatshi nkosi yami, muntu kaNkulunkulu weqiniso! Ungathembisi incekukazi yakho into engasoze yenzakale.”
17 Lakanye owesifazana lo wazithwala, wasebeletha indodana ngomnyaka owalandelayo ngesikhathi esifananayo, njengoba nje u-Elisha wayetshilo.
18 Umntwana wakhula, kwathi ngelinye ilanga waya kuyise owayesemasimini esebenza labantu ababevuna.
19 Wayelokhu esithi kuyise: “Ikhanda lami, ikhanda lami libuhlungu!” Ngakho uyise wathi encekwini yakhe: “Mthwale umhambise kunina.”
20 Inceku yamthwala yahamba laye kunina, unina wamphatha kwaze kwaba semini, kodwa wacina esifa.+
21 Owesifazana wathwala umntanakhe wayamlalisa embhedeni womuntu kaNkulunkulu weqiniso,+ wasephuma wavala umnyango.
22 Ngemva kwalokho wabiza umkakhe wathi: “Ngicela uthume enye inceku ibuye kimi lobabhemi. Ngifuna ukuya kumuntu kaNkulunkulu weqiniso masinyane besengiphenduka.”
23 Kodwa umkakhe wathi: “Kungani ufuna ukuyambona lamuhla? Inyanga ayikathwasi+ futhi ayisilo langa lesabatha.” Yena wasesithi: “Ungakhathazeki, konke kuhamba kuhle.”
24 Owesifazana wabophela isihlalo kubabhemi wasegada, wathi encekwini yakhe: “Khokhela ubabhemi. Ungahambi kancane usenzela mina ngaphandle nxa ngingatsho njalo.”
25 Owesifazana waya kumuntu kaNkulunkulu weqiniso entabeni iKhameli. Umuntu kaNkulunkulu weqiniso wathi embona esesekhatshana wathi encekwini yakhe uGehazi: “Khangela, nanguyana owesifazana weShunemi.
26 Ngicela ugijime umhlangabeze umbuze ukuthi unjani lokuthi umkakhe lendodana yakhe bayaphila yini.” UGehazi wathi embuza, owesifazana waphendula wathi: “Konke kuhamba kuhle.”
27 Owesifazana wathi efika emuntwini kaNkulunkulu weqiniso entabeni wadumela inyawo zakhe.+ UGehazi uthe ebona lokho wasondela efuna ukumsusa, kodwa umuntu kaNkulunkulu weqiniso wathi: “Myekele ukhathazeke kakhulu, kodwa uJehova kazange angitshele lutho, ungifihlele.”
28 Owesifazana wasesithi: “Ngake ngacela indodana yini kuwe nkosi yami? Angithi ngakutshela ukuthi ungangithembisi amanga?”+
29 U-Elisha wahle wathi kuGehazi: “Bophela izembatho zakho ekhalweni,+ uthathe intonga yami uhambe. Nxa ungahlangana lomuntu ungambingeleli futhi nxa engakubingelela ungamphenduli. Ufike ubeke intonga yami ebusweni bomntwana.”
30 Unina womntwana wathi: “Ngifunga ngoJehova uNkulunkulu ophilayo, ngifunge langawe, angisoze ngikutshiye.”+ Ngakho u-Elisha wasuka wahamba laye.
31 UGehazi wahamba phambili wafika wabeka intonga ebusweni bomntwana, kodwa akuzange kwenzakale lutho.+ Wabuyela emuva wahlangabeza u-Elisha wathi kuye: “Umntwana kavukanga.”
32 U-Elisha wathi efika endlini wathola umfana elele embhedeni wakhe efile.+
33 Wangena wazivalela endlini lomfana, wasethandaza kuJehova.+
34 Ngemva kwalokho wakhothama walala phezu komntwana, umlomo wakhe waqondana lowomntwana, lamehlo akhe aqondana lawomntwana njalo izandla zakhe wazibeka phezu kwezomntwana. Waqhubeka elokhu elele phezu kwakhe, umzimba womntwana waze waqalisa ukukhudumala.+
35 U-Elisha wasukuma wahambahamba endlini, wabuyela futhi embhedeni wafika wakhothama phezu komntwana. Umfana wathimula kasikhombisa wasevula amehlo.+
36 U-Elisha wabiza uGehazi wathi kuye: “Biza owesifazana weShunemi.” UGehazi wambiza. Owesifazana wathi efika, u-Elisha wathi kuye: “Thatha indodana yakho.”+
37 Owesifazana wangena wazilahla phansi enyaweni zakhe, wathi mbo phansi ngobuso. Ngemva kwalokho wathatha indodana yakhe waphuma.
38 U-Elisha wabuyela eGiligali futhi ngalesosikhathi kwakulendlala.+ Amadodana abaphrofethi+ athi ehlezi phambi kwakhe, u-Elisha wathi encekwini yakhe:+ “Faka imbiza enkulu eziko uphekele amadodana abaphrofethi ukudla.”
39 Omunye wabo wasesuka esiyakukha imibhida egangeni. Wabona esinye isihlahla seganga wasesikha izithelo zaso wazigcwalisa esembathweni sakhe. Wabuyela wafika wazisikelela wazifaka embizeni engazi ukuthi yizithelo bani.
40 Baphakulela abantu ukuthi badle, kodwa bathi benambitha nje bakhala besithi: “Kuletshefu embizeni muntu kaNkulunkulu weqiniso.” Behluleka ukudla,
41 u-Elisha wasesithi: “Lethani ifulawa.” Wayithatha wayifaka embizeni wathi: “Nikani abantu badle.” Kwakungaselatshefu embizeni.+
42 Kwafika enye indoda ivela eBhali-shalisha.+ Yayiphathele umuntu kaNkulunkulu weqiniso isaka lamabele ayesanda kuvunwa+ lezinkwa ezingu-20 ezaziphekwe ngefulawa yebhali eyayivunwe kuqala.+ U-Elisha wasesithi: “Nika abantu badle.”
43 Kodwa inceku yakhe yathi: “Nginganika abantu abangu-100 ukudla okuncane kangaka?”+ U-Elisha waphendula wathi: “Banike abantu badle ngoba nanku okutshiwo nguJehova, ‘Bazadla kusale okunye.’”+
44 Ngakho inceku yabanika badla kwasala okunye,+ njengoba nje uJehova wayetshilo.
