Eyesibili EyamaKhosi 9:1-37
9 Umphrofethi u-Elisha wabiza omunye wamadodana abaphrofethi wathi kuye: “Bopha ukhalo lwakho uthathe imbodlela le yamafutha uphangise uye eRamothi-giliyadi.+
2 Nxa ungafika lapho, udinge uJehu+ umntakaJehoshafathi indodana kaNimishi. Ungene umsukumise phakathi kwabafowabo, uye laye endlini engaphakathi.
3 Uthathe imbodlela yamafutha uwathele ekhanda lakhe ubususithi, ‘Nanku okutshiwo nguJehova: “Ngiyakugcoba ukuthi ube yinkosi yako-Israyeli.”’+ Ngemva kwalokho uvule umnyango uhle ubaleke.”
4 Ngakho inceku yomphrofethi yasuka yaya eRamothi-giliyadi.
5 Yathola izinduna zamabutho zihlezi, yasisithi: “Kulelizwi engithunywe ukuthi ngizokutshela lona nduna.” UJehu wathi: “Utsho ubani?” Yona yaphendula yathi: “Ngitsho wena nduna yami.”
6 Ngakho uJehu wasukuma wayangena endlini. Inceku yathela amafutha ekhanda lakhe yathi, “Nanku okutshiwo nguJehova uNkulunkulu ka-Israyeli: ‘Ngiyakugcoba ukuthi ube yinkosi yabantu bakaJehova, abantu bako-Israyeli.+
7 Kumele ubulale bonke abemuli ka-Ahabi inkosi yakho, futhi ngizaphindisela ngenxa yezinceku zami ezazingabaphrofethi lazo zonke izinceku zikaJehova ezabulawa nguJezebheli.+
8 Bonke abendlu ka-Ahabi bazatshabalala baphele du njalo ngizabulala bonke abesilisa endlini yakhe, kugoqele lalabo abangelamandla labazihluphekelayo ko-Israyeli.+
9 Ngizakwenza kwabendlu ka-Ahabi lokho engakwenza kwabendlu kaJerobhowami+ indodana kaNebhathi. Bazakuba njengabendlu kaBhahasha+ indodana ka-Ahija.
10 UJezebheli uzadliwa yizinja ensimini eseJeziriyeli+ njalo akulamuntu ozamngcwaba.’” Ngemva kwalokho inceku yavula umnyango yabaleka.+
11 UJehu wathi ebuyela ezincekwini zenkosi yakhe, zambuza zathi: “Konke kuhamba kuhle? Uhlanya lolu belufunani kuwe?” UJehu waphendula wathi: “Lani liyamazi umuntu lowana futhi liyazazi lenkulumo zakhe.”
12 Kodwa izinceku zenkosi yakhe zathi: “Ulamanga! Sicela usitshele.” Ngakho wabatshela lokho okwakukhulunywe yindoda leyo, wasesithi: “Uphinde wathi, ‘Nanku okutshiwo nguJehova: “Ngiyakugcoba ukuthi ube yinkosi yako-Israyeli.”’”+
13 Bathi besizwa lokho ngamunye wakhipha isembatho sakhe wasibeka phansi emasitephisini ukuze uJehu anyathele phezu kwazo.+ Batshaya uphondo bathi: “UJehu useyinkosi!”+
14 Ngakho uJehu+ indodana kaJehoshafathi indodana kaNimishi wabumba icebo lokuhlamukela uJehoramu.
UJehoramu lebutho lako-Israyeli babeseRamothi-giliyadi+ bevikele abantu bako-Israyeli ukuthi bangahlaselwa nguHazayeli+ inkosi yeSiriya.
15 Kodwa iNkosi uJehoramu yabuyela eJeziriyeli+ ukuze amanxeba ayo aphole njengoba amaSiriya ayeyilimazile ngesikhathi isilwa loHazayeli inkosi yeSiriya.+
UJehu wathi: “Nxa lingisekela, lingavumeli muntu ukuthi aphume edolobheni ayebika lokhu eJeziriyeli.”
16 UJehu wasegada inqola yakhe waya eJeziriyeli lapho okwakuloJehoramu khona. UJehoramu wayelele ngoba wayelimele futhi u-Ahaziya inkosi yakoJuda wayezombona.
17 Umlindi wathi emi phezu komphotshongo eJeziriyeli wabona iqembu lamadoda ayehamba loJehu lisiza, wahle wathi: “Ngibona iqembu lamadoda.” UJehoramu waphendula wathi: “Thuma omunye wabagadi bamabhiza abahlangabeze ababuze ukuthi baza ngokuthula yini.”
18 Ngakho wahamba wayabahlangabeza wafika wathi: “Inkosi ithi, ‘Liza ngokuthula yini?’” Kodwa uJehu wathi: “Ukuthula kwani? Yana emva kwami ungilandele!”
Umlindi wabika wathi: “Isithunywa sifikile kubo kodwa asiphendukanga.”
19 Yikho inkosi yathuma omunye umgadi webhiza, wafika wathi kubo: “Inkosi ithi, ‘Liza ngokuthula yini?’” Kodwa uJehu wathi: “Ukuthula kwani? Yana emva kwami ungilandele!”
20 Umlindi wabika wathi: “Ufikile kubo kodwa kaphendukanga futhi otshayela inqola ungathi nguJehu umzukulu* kaNimishi ngoba utshayela angathi luhlanya.”
21 UJehoramu wathi: “Bophani inqola!” Ngakho babopha inqola yakhe yempi. UJehoramu inkosi yako-Israyeli lo-Ahaziya+ inkosi yakoJuda basuka ngezinqola zabo bayahlangabeza uJehu. Bahlangana laye ensimini kaNabhothi+ umJeziriyeli.
22 UJehoramu uthe embona nje uJehu wathi: “Uza ngokuthula yini Jehu?” Kodwa yena wathi: “Kungaba lokuthula njani nxa ubufebe bukanyoko uJezebheli+ busesekhona njalo kugcwele ubuthakathi bakhe?”+
23 UJehoramu wahle watshibilikisa inqola yakhe wabaleka, wathi ku-Ahaziya: “Sebesihlamukele Ahaziya!”
24 UJehu wathatha umtshoko wakhe watshoka uJehoramu emhlane, umtshoko wayahlaba enhliziyweni, uJehoramu wawela enqoleni yakhe.
25 UJehu wasesithi kuBhidikhari inceku yakhe: “Mthwale uyemjikela ensimini kaNabhothi umJeziriyeli.+ Khumbula ukuthi sasisonke sigade inqola ngemva kukayise u-Ahabi ngesikhathi uJehova ekhuluma ngaye esithi:+
26 ‘“Njengoba ngibone igazi likaNabhothi+ lelamadodana akhe izolo,” kutsho uJehova, “lawe ngizakujezisa+ loba sekutheni ensimini yonale,” kutsho uJehova.’ Ngakho mthathe uyemjikela ensimini leyo njengoba nje uJehova watsho.”+
27 U-Ahaziya+ inkosi yakoJuda wathi ebona okwakusenzakala wabaleka ngendlela edlula engadini enkulu.* (UJehu wamlandela wathi: “Mbulaleni laye!” Ngakho bamgwaza esenqoleni esesiya eGuri eseduze le-Ibhiliyami,+ kodwa waqhubeka ebaleka esiya eMegido wayafela khona.
28 Izinceku zika-Ahaziya zamthwala zaya laye eJerusalema, zafika zamngcwaba ethuneni lakhe emangcwabeni abokhokho bakhe edolobheni likaDavida.+
29 U-Ahaziya+ wayeqalise ukubusa koJuda ngomnyaka wesi-11 wokubusa kukaJehoramu indodana ka-Ahabi.)
30 UJezebheli+ wezwa ukuthi uJehu wayesefikile eJeziriyeli.+ Yikho wazicomba amehlo aba mnyama futhi wazicecisa ikhanda ngemiceciso, waselunguza ngewindi.
31 UJehu wathi engena egedini, uJezebheli wathi: “Kwamhambela kuhle yini uZimri owabulala inkosi yakhe?”+
32 UJehu wasekhangela phezulu ewindini wathi: “Ngubani ongisekelayo? Ngubani?”+ Amadoda amabili loba amathathu ayeyiziphathamandla zesigodlweni ahle alunguza ngewindi amkhangela.
33 UJehu wasesithi: “Mphoseleni phansi!” Ngakho amphosela phansi, igazi lakhe lachaphakela emdulini lasemabhizeni, uJehu wasemnyathela ngamabhiza.
34 Ngemva kwalokho wangena endlini wadla wanatha, wasesithi: “Ngicela lithathe owesifazana lowana oqalekisiweyo liyemngcwaba. Phela uyindodakazi yenkosi.”+
35 Kodwa bathi sebesiyamthatha ukuthi bayemngcwaba abatholanga lutho, ngaphandle kokhakhayi lezandla kanye lenyawo.+
36 Baphenduka bayamtshela uJehu, yena wathi: “Lokhu kugcwalisa ilizwi uJehova+ alikhuluma esebenzisa inceku yakhe u-Elija umThishibi elithi, ‘Umzimba kaJezebheli uzadliwa yizinja ensimini eseJeziriyeli.+
37 Isidumbu sikaJezebheli sizakuba ngumquba emhlabathini wensimu eseJeziriyeli ukuze kungabi lomuntu ozakuthi: “Lo nguJezebheli.”’”
