IHubo 104:1-35
104 Ngizamdumisa uJehova.+
Jehova Nkulunkulu wami umkhulu kakhulu.+
Wembethe ubukhosi* lenkazimulo.+
2 Ukukhanya kukuthandele+ angathi yisembatho,Welula amazulu angathi welula amaseyili etende.+
3 UNkulunkulu wakha indawo yakhe yokuhlala emanzini asesibhakabhakeni,+Enze amayezi abe yinqola yakhe,+Ahambe emoyeni.+
4 Wenza izingilosi zakhe zibe lamandla,*Izinceku* zakhe zibe ngumlilo ovuthayo.+
5 Ubeke umhlaba phezu kwezisekelo zawo,+Awusoze ususwe endaweni yawo* kuze kube nini lanini.+
6 Wawembesa ngamanzi amanengi angathi uwuvale ngengubo.+
Amanzi ayesibekele izintaba,
7 Wawakhuza abaleka,+Wakhwaza aphaphatheka.
8 Izintaba zaphakama,+ izigodi zatshona,Amanzi aya endaweni owawuwalungisele yona.
9 Wawafakela umngcele okungamelanga aweqe,+Ukuze angaphindi asibekele umhlaba.
10 Yena wenza ukuthi amanzi ampompoze ezigodini,Ageleze phakathi kwezintaba,
11 Ukuze zonke inyamazana zeganga zithole amanzi,Labobabhemi beganga banathe nxa bomile.
12 Inyoni zakha izidleke zazo eduze kwamanzi,Ziyahlabela zisezihlahleni eziyizithingithingi.
13 UNkulunkulu uthelela izintaba esezindlini zakhe eziphezulu.+
Umhlaba uyawusuthisa ngezithelo zomsebenzi wakhe.+
14 Umilisa utshani ukuze inkomo zithole ukudla,Amilise lezilimo esenzela abantu,+Ukuze bathole ukudla elizweni,
15 Lewayini elithokozisa inhliziyo yomuntu,+Lamafutha enza ubuso bomuntu bucazimule,Lesinkwa esenza umuntu abe lamandla.+
16 Zithola amanzi amanengi izihlahla zikaJehova,Imisedari yeLebhanoni ayihlanyelileyo,
17 Lapho izinyoni ezakha khona izidleke.
Amangabuzane+ ahlala ezihlahleni zomjunipha.
18 Amagogo ahlala* ezintabeni ezinde,+Imbila zicatsha emadwaleni.+
19 Wenze inyanga ukuze ehlukanise izigaba zomnyaka,Ilanga liyasazi isikhathi okumele litshone ngaso.+
20 Uletha umnyama kube sebusuku,+Zonke inyamazana zeganga beseziphuma zihambahambe.
21 Izilwane ezilamandla ziyabhonga zifuna ukubamba inyamazana,+Zidinga ukudla kwazo kuNkulunkulu.+
22 Nxa ilanga liphuma,Ziyabuyela ziyelala ezikhundleni zazo.
23 Umuntu uyaphuma aye emsebenzini wakhe,Asebenze kuze kube ntambama.
24 Minengi imisebenzi yakho Jehova!+
Yonke uyenze ngokuhlakanipha.+
Umhlaba ugcwele lokho okwenzileyo.
25 Ulwandle lukhulu futhi lubanzi,Lugcwele izinto eziphilayo, ezincane lezinkulu.+
26 Imikhumbi ihamba kulo,LoLeviyathani*+ wamdalela ukuthi adlalele kulo.
27 Zonke izidalwa lezi zilindele wena,Ukuthi uzinike ukudla kwazo ngesikhathi esifaneleyo.+
28 Lokho ozinika khona ziyakubuthelela,+Nxa uvula isandla sakho zithola konke okuhle ezikufunayo.+
29 Nxa ungafihla ubuso bakho ziyakhathazeka.
Ungakhipha umoya wazo ziyafa zibuyele ethulini.+
30 Nxa ungathumela umoya wakho ziyadalwa.+
Uyawuvuselela umhlaba.
31 Inkazimulo kaJehova izahlala kuze kube nini lanini.
UJehova uzathokoza ngemisebenzi yakhe.+
32 Ukhangela umhlaba uzamazame,Athinte izintaba zithunqe intuthu.+
33 Ngizahlabelela uJehova+ okwempilo yami yonke,Ngizahlabela ngimdumise uNkulunkulu wami nxa nje ngisaphila.+
34 Kwangathi imicabango yami* ingamthokozisa.
Ngizathokoza ngoJehova.
35 Izoni zizatshabalala emhlabeni,Abenza okubi abasoze baphinde babe khona.+
Ngizamdumisa uJehova. Dumisani uJah!*
Amabala angaphansi
^ Kumbe, “Ulesithunzi.”
^ Kumbe, “zibe ngumoya olamandla.”
^ Kumbe, “Izikhonzi.”
^ Kumbe, “unyikinywe.”
^ Kumbe, “Imbuzi zeganga zihlala.”
^ Khangela iNgcazelo Yamabala.
^ Ezinye inguqulo zithi, “iminakano yami ngaye.”
^ Kumbe, “Haleluya!” NgesiHebheru ukuthi “Yah” kumbe “Jah” yikufitshaniswa kwebizo elithi Jehova.
