AmaNani 10:1-36
10 UJehova wasesithi kuMosi:
2 “Zenzele amacilongo amabili,+ uwenze ngesiliva usebenzisa isando njalo yiwo ozawasebenzisa ukubiza abantu bako-Israyeli kanye lokubabikela ukuthi sekuhanjwa.
3 Nxa engatshaywa womabili, bonke abantu kumele bazobuthana kuwe emnyango wetende lokuhlangana.+
4 Nxa kungatshaywa elilodwa kuphela, abakhokheli abazinhloko zezinkulungwane zako-Israyeli yibo okumele babuye kuwe.+
5 “Nxa lingatshaya icilongo kuzwakale umsindo otshintshatshintshayo, abakhempe empumalanga+ kumele basuke bahambe.
6 Nxa lingatshaya icilongo okwesibili kuzwakale umsindo otshintshatshintshayo, abakhempe eningizimu+ kumele basuke bahambe. Kufanele batshaye amacilongo ngalindlela nxa sekumele iqembu ngalinye lisuke.
7 “Nxa libuthanisa lonke ibandla lako-Israyeli, kumele litshaye icilongo+ kodwa akumelanga kuzwakale umsindo otshintshatshintshayo.
8 Abaphristi amadodana ka-Aroni, yibo okufanele batshaye amacilingo+ njalo ukusetshenziswa kwabo kuzakuba ngumlayo ozahlala ukhona kini kuzo zonke izizukulwane zenu.
9 “Nxa kumele ilizwe lenu liye empini, liyekulwa lesitha esilithwalise nzima, kumele litshaye amacilongo limemezele ukuthi kuyehlaselwa.+ Lapho-ke uJehova uNkulunkulu wenu uzalikhumbula njalo lizasindiswa ezitheni zenu.
10 “Kanti njalo kumele litshaye amacilongo phezu kweminikelo yenu yokutshiswa+ lemihlatshelo yenu yobudlelwano,+ ngezikhathi zenu zokuthokoza+ nxa lisenza imikhosi yenu,+ lalapho kuqala izinyanga zenu zomnyaka. Lokhu kuzakuba yisikhumbuzo phambi kukaNkulunkulu wenu. NginguJehova uNkulunkulu wenu.”+
11 Mhlaka 20 ngenyanga yesibili, ngomnyaka wesibili+ iyezi lasuka phezu kwethabanikeli+ loBufakazi.
12 Ngakho abantu bako-Israyeli baqala ukusuka enkangala yeSinayi, belandelana ngendlela okwakuhlelwe ukuthi benze ngayo nxa sebehamba+ njalo iyezi lama enkangala yePharani.+
13 Kwakungokokuqala ukuthi basuke belandela lokho uJehova ayekutshele uMosi.+
14 Ngakho iqembu elibunjwa yizizwana ezintathu ezingaphansi kwamadodana kaJuda laqala ukusuka kusiya ngendawo elabelwe kuyo* njalo uNashoni+ indodana ka-Aminadabi nguye owayekhokhela iqembu lelo.
15 Owayekhokhela iqembu lesizwana samadodana ka-Isakhari nguNethaneli+ indodana kaZuwari.
16 Owayekhokhela iqembu lesizwana samadodana kaZebhuloni ngu-Eliyabi+ indodana kaHeloni.
17 Kwathi ithabanikeli selidiliziwe+ amadodana kaGeshoni+ lamadodana kaMerari+ okuyiwo ayethwala ithabanikeli, asesuka ahamba.
18 Ngemva kwalokho iqembu elibunjwa yizizwana ezintathu ezingaphansi kwabakoRubheni laqala ukusuka kusiya ngendawo elabelwe kuyo* njalo owayekhokhela iqembu lelo ngu-Elizuri+ indodana kaShedewuri.
19 Owayekhokhela iqembu lesizwana samadodana kaSimiyoni nguShelumiyeli+ indodana kaZurishadayi.
20 Owayekhokhela iqembu lesizwana samadodana kaGadi ngu-Eliyasafi+ indodana kaDuweli.
21 Ngemva kwalokho kwasuka amadodana kaKhohathi ayethwala izinto zendawo engcwele.+ Kwakumele ithabanikeli libe selimisiwe ngesikhathi efika.
22 Ngemva kwalokho iqembu elibunjwa yizizwana ezintathu ezingaphansi kwamadodana ka-Efrayimi lasuka kusiya ngendawo elabelwe kuyo* njalo owayekhokhela iqembu lelo ngu-Elishama+ indodana ka-Amihudi.
23 Owayekhokhela iqembu lesizwana samadodana kaManase nguGamaliyeli+ indodana kaPhedazuri.
24 Owayekhokhela iqembu lesizwana samadodana kaBhenjamini ngu-Abhidani+ indodana kaGidiyoni.
25 Ngemva kwalokho iqembu elibunjwa yizizwana ezintathu ezingaphansi kwamadodana kaDani lasuka kusiya ngendawo elabelwe kuyo* njalo labumba ibutho elalihamba ngemuva ukuze livikele wonke amaqembu. Owayekhokhela iqembu lelo ngu-Ahiyezeri+ indodana ka-Amishadayi.
26 Owayekhokhela iqembu lesizwana samadodana ka-Asheri nguPhagiyeli+ indodana ka-Okhirani.
27 Owayekhokhela iqembu lesizwana samadodana kaNafithali ngu-Ahira+ indodana ka-Enani.
28 Le yiyo indlela eyayilandelwa ngabantu bako-Israyeli kanye lamaqembu* abo nxa sebesuka.+
29 UMosi wasekhuluma loHobhabhi indodana kayisezala uRehuweli*+ umMidiyani wathi kuye: “Thina sesisuka lapha, sesisiya endaweni uJehova athe uzasinika yona.+ Sicela uhambe lathi+ njalo sizakuphatha kuhle ngoba uJehova uthembise abantu bako-Israyeli izinto ezinhle.”+
30 Kodwa yena wathi kuye: “Angisoze ngihambe lani, ngizabuyela elizweni lakithi lasezihlotsheni zami.”
31 UMosi wamphendula wathi: “Sicela ungasitshiyi ngoba wena uyakwazi lapho esingakhempa khona enkangala futhi nguwe ongasitshengisa indlela.*
32 Nxa ungahamba lathi,+ loba yikuphi okuhle uJehova azasenzela khona lathi sizakwenzela khona.”
33 Ngakho basuka entabeni kaJehova+ baqala uhambo lwamalanga amathathu njalo ibhokisi+ lesivumelwano sikaJehova laliphambi kwabo phakathi kohambo lolu lwamalanga amathathu, ukuze badingelwe indawo yokuphumula.+
34 Iyezi likaJehova+ laliphezu kwabo emini ngesikhathi besuka endaweni ababekhempe kuyo.
35 Loba nini lapho ibhokisi lesivumelwano elalisuka khona, uMosi wayesithi: “Awu Jehova sukuma,+ izitha zakho aziphaphatheke, kuthi labo abakuzondayo babaleke phambi kwakho.”
36 Nxa selibekwa phansi wayesithi: “Awu Jehova, phenduka kuzinkulungwane zako-Israyeli ezingelakubalwa.”+
Amabala angaphansi
^ Kumbe, “ngamabutho alo.”
^ Kumbe, “ngamabutho alo.”
^ Kumbe, “ngamabutho alo.”
^ Kumbe, “ngamabutho alo.”
^ Kumbe, “ngamabutho.”
^ Lapha kutshiwo uJethro.
^ Kumbe, “ongaba ngamehlo ethu.”
