AmaNani 13:1-33
13 UJehova wasekhuluma loMosi wathi:
2 “Thuma amadoda ayehlola ilizwe laseKhenani engizalinika abantu bako-Israyeli. Kumele uthume indoda eyodwa esizwaneni ngasinye futhi ngayinye kumele ibe ngomunye wabakhokheli+ besizwana sakibo.”+
3 Ngakho uMosi wawathuma amadoda lawo esuka enkangala yePharani,+ njengokutsho kukaJehova, njalo wonke ayengabakhokheli bako-Israyeli.
4 Nanka amabizo awo: Owesizwana sakoRubheni kwakunguShamuwa indodana kaZakhuri,
5 owesizwana sakoSimiyoni kwakunguShafathi indodana kaHori,
6 owesizwana sakoJuda kwakunguKhalebhi+ indodana kaJefune,
7 owesizwana sako-Isakhari kwakungu-Igali indodana kaJosefa,
8 owesizwana sako-Efrayimi kwakunguHosheya+ indodana kaNuni,
9 owesizwana sakoBhenjamini kwakunguPhalithi indodana kaRafu,
10 owesizwana sakoZebhuloni kwakunguGadiyeli indodana kaSodi,
11 owesizwana sikaJosefa+ kwabakoManase+ kwakunguGadi indodana kaSusi,
12 owesizwana sakoDani kwakungu-Amiyeli indodana kaGemali,
13 owesizwana sako-Asheri kwakunguSethuri indodana kaMikhayeli,
14 owesizwana sakoNafithali kwakunguNabhi indodana kaVofisi.
15 owesizwana sakoGadi kwakunguGewuweli indodana kaMakhi.
16 La yiwo amabizo amadoda athunywa nguMosi ukuthi ayehlola ilizwe futhi uMosi wanika uHosheya indodana kaNuni ibizo elithi Joshuwa.*+
17 UMosi wathi ewathuma ukuthi ayehlola ilizwe laseKhenani wathi kuwo: “Qansani liye eNegebhi njalo lifike liqanse liye ezintabeni.+
18 Kumele lihlole ukuthi ilizwe lakhona linjani+ lokuthi abantu abahlala kulo balamandla yini loba hatshi, ukuthi banengi yini kumbe balutshwana,
19 kanye lokuthi ilizwe lihle yini kumbe libi, lokuthi bahlala ematendeni kumbe emadolobheni avikelwe ngemiduli.
20 Lihlole lokuthi ilizwe lakhona livundile* yini kumbe lilugwadule,+ lilezihlahla yini loba hatshi. Kufanele libe lesibindi+ njalo lithathe ezinye izithelo zalelolizwe libuye lazo.” Phela kwakuyisikhathi samagilebisi avuthwa kuqala.+
21 Ngakho amadoda lawo asuka ayahlola ilizwe kusukela enkangala yeZini+ kusiya eRehobhi+ eduze kweLebho-hamathi.*+
22 Athi eqansa esiya eNegebhi afika eHebroni+ lapho okwakuhlala khona u-Ahimani loSheshayi loThalimayi,+ izizukulwane zama-Anakhi.+ IHebroni yakhiwa kusasele iminyaka eyisikhombisa ukuthi kwakhiwe iZowani yaseGibhithe.
23 Athi efika esigodini* se-Eshikholi,+ aquma ugatsha olwalulelixha lamagilebisi elalisinda okokuthi kwakumele luthwalwe ngamadoda amabili elugaxe esigodweni njalo akha lamaharinathi kanye lamakhiwane.+
24 Abiza indawo leyo ngokuthi yisigodi se-Eshikholi*+ ngenxa yelixha elaqunywa ngama-Israyeli kuleyondawo.
25 Ngemva kwamalanga angu-40+ aphenduka evela hlola ilizwe.
26 Ngakho afika kuMosi lo-Aroni labo bonke abantu bako-Israyeli enkangala yePharani eKhadeshi,+ ethulela bonke abantu umbiko njalo abatshengisa lezithelo zalelolizwe.
27 Nanku umbiko awutshela uMosi: “Sihambile elizweni osithume kulo, lilizwe eligeleza uchago loluju+ sibili futhi nanzi lezithelo zalo.+
28 Lanxa kunjalo, abantu abahlala elizweni lelo balamandla, lamadolobho akhona makhulu futhi agonjolozelwe ngemiduli. Size sabona lama-Anakhi khonale.+
29 Ama-Amaleki+ ahlala eNegebhi,+ amaHithi, lamaJebusi,+ lama-Amori+ ahlala emangweni osezintabeni njalo amaKhenani+ ahlala eduze kolwandle+ laseceleni komfula uJodani.”
30 UKhalebhi wasezama ukwenza ukuthi abantu ababemi phambi kukaMosi bahlaliseke wathi: “Kasihambeni khathesi, sizalithatha sibili ilizwe ngoba sizalinqoba loba sekutheni.”+
31 Kodwa amadoda ayehambe laye athi: “Ngeke senelise ukuyakulwa labantu labo ngoba balamandla kulathi.”+
32 Baqhubeka betshela abantu bako-Israyeli umbiko omubi+ mayelana lelizwe ababehambe bayalihlola besithi: “Ilizwe esifike kulo salihlola lilizwe elitshabalalisa abantu balo njalo bonke abantu esibabone khona bade okungajayelekanga.+
33 Size sabona lamaNefilimi khonale, amadodana ka-Anakhi+ adabuka* kumaNefilimi njalo bekungathi sizintethe nje nxa sizikhangele thina ngitsho lasemehlweni awo.”
Amabala angaphansi
^ Kumbe, “Jehoshuwa,” okutsho ukuthi, “UJehova uyasindisa.”
^ NgesiHebheru, “linonile.”
^ Kumbe, “emngceleni weHamathi.”
^ Kumbe, “esihotsheni.”
^ Ibizo leli litsho ukuthi, “Ilixha lamagilebisi.”
^ Kumbe, “abantwana bamaNefilimi.”
