AmaNani 35:1-34
35 UJehova waqhubeka ekhuluma loMosi emagcekeni akoMowabi eduze komfula uJodani+ eJerikho wathi:
2 “Tshela abako-Israyeli ukuthi elifeni labo abazalithola+ kumele banike amaLevi amadolobho azahlala kuwo njalo bawanike lamadlelo aseduze kwamadolobho lawo.+
3 AmaLevi azahlala emadolobheni lawo njalo amadlelo akhona azakuba ngawezifuyo zawo, lempahla yawo kanye lazo zonke ezinye izinyamazana zawo.
4 Amadlelo asemadolobheni elizawanika amaLevi azaqhela okomango ozingalo* ezingu-1 000 nxa usuka emdulini wedolobho kuwo wonke amacele alo.
5 Kumele lilinganise umango ozingalo ezingu-2 000 ngaphandle kwedolobho eceleni elisempumalanga, lomango ozingalo ezingu-2 000 eceleni eliseningizimu, lomango ozingalo ezingu-2 000 eceleni elisentshonalanga kanye lomango ozingalo ezingu-2 000 eceleni elisenyakatho, idolobho libe phakathi laphakathi. La yiwo okuzakuba ngamadlelo asemadolobheni awo.
6 “Phakathi kwamadolobho elizawanika amaLevi, ayisithupha azakuba ngamadolobho okuphephela+ ukuze umuntu obulele omunye abalekele khona+ njalo lizawanika lamanye amadolobho angu-42.
7 Esewonke amadolobho elizawanika amaLevi azakuba ngu-48 kanye lamadlelo awo.+
8 Amadolobho elizawanika wona azavela elifeni elitholwe ngabantu bako-Israyeli.+ Eqenjini elikhulu lizathatha amanengi kuthi eqenjini elincane lithathe amalutshwana.+ Iqembu ngalinye lizanika amaLevi amanye amadolobho alo kusiya ngokuthi lithole ilifa elinganani.”
9 UJehova waqhubeka ekhuluma loMosi wathi:
10 “Khuluma labako-Israyeli uthi kubo, ‘Selichapha umfula uJodani ukuze liyengena elizweni leKhenani.+
11 Kumele likhethe amadolobho okulula ukufika kuwo, abe ngamadolobho okuphephela ukuze umuntu obulele omunye* ngengozi abalekele khona.+
12 Amadolobho la azakuba zindawo zenu zokuphephela ukuze livikelwe kulowo ophindiselayo,*+ ukuze umuntu obulele omunye angabulawa engazange athonisiswe phambi kwebandla.+
13 Lo yiwo ozakuba ngumsebenzi wamadolobho ayisithupha elizawakhetha.
14 Kumele likhethe amadolobho amathathu kulelicele elisempumalanga komfula uJodani+ lamanye amathathu elizweni leKhenani+ ukuze abe ngamadolobho okuphephela.
15 Amadolobho la ayisithupha azakuba yisiphephelo kwabako-Israyeli, lasemuntwini wesinye isizwe+ kanye lalowo obuye wazohlala phakathi kwenu. Loba ngubani obulele umuntu* ngengozi kumele abalekele kuwo.+
16 “‘Kodwa nxa umuntu angatshaya omunye ngesikhali sensimbi afe, uyabe engumbulali. Umbulali kumele abulawe loba sekutheni.+
17 Nxa angamtshaya ngelitshe elingabangela ukuthi afe abesesifa, ungumbulali. Umbulali kumele abulawe loba sekutheni.
18 Nxa angamtshaya ngogodo olungambulala njalo abesesifa, ungumbulali. Umbulali kumele abulawe loba sekutheni.
19 “‘Ophindiselayo* nguye ozabulala umbulali. Yena ngokwakhe uzambulala nxa angahlangana laye.
20 Nxa kuyikuthi umfuqile wafa ngenxa yokuthi ubemzonda kumbe umjikijele ngento ethile efuna ukumlimaza,*+
21 kumbe nxa angamtshaya ngenqindi ngenxa yokuthi ubemzonda, abesesifa. Lowo ombuleleyo kumele abulawe loba sekutheni, ungumbulali. Ophindiselayo uzambulala nxa angahlangana laye.
22 “‘Kodwa nxa engakwenzanga ngabomo njalo engamfuqanga ngenxa yokuthi ubemzonda kumbe nxa ejikele into ethile kuye engahlosanga ukumlimaza,*+
23 kumbe nxa ubengamboni wasefuqa ilitshe lawela phezu kwakhe kungayisikho ukuthi ubeyisitha sakhe futhi engahlosanga ukumlimaza kodwa umuntu wafa,
24 ibandla kumele lahlulele phakathi kwalowo obulele umuntu kanye lalowo ophindiselayo lilandela imithetho le yokwahlulela.+
25 Ngemva kwalokho ibandla kumele limvikele umuntu obulele omunye ukuze angabulawa ngumuntu ophindiselayo njalo limbuyisele edolobheni lakhe lokuphephela abebalekele kulo futhi kufanele ahlale kulo kuze kufe umphristi omkhulu owagcotshwa ngamafutha angcwele.+
26 “‘Kodwa nxa umuntu owabulala umuntu angaphuma emngceleni wedolobho lesiphephelo ayabe ebalekele kulo,
27 ophindiselayo abesemthola ephandle komngcele wedolobho lakhe lokuphephela, abesembulala kasoze abe lecala legazi.
28 Phela kumele ahlale edolobheni lakhe lokuphephela umphristi omkhulu aze afe. Kodwa nxa umphristi omkhulu angafa lowo owabulala omunye usengabuyela emzini wakhe.+
29 Izinto lezi zizakuba yimithetho yenu yokwahlulela kuzo zonke izizukulwane zenu ezindaweni zonke elihlala kuzo.
30 “‘Loba ngubani obulala umuntu* kumele abulawe njengombulali+ nxa kulabantu abakufakazelayo lokho.+ Kakho umuntu okufanele abulawe ngobufakazi obulethwa ngumuntu oyedwa nje.
31 Akumelanga lamukele inhlawulo yokuhlenga impilo yomuntu ongumbulali okufanele abulawe ngoba kumele abulawe loba sekutheni.+
32 Akumelanga lamukele inhlawulo yokuhlenga umuntu obaleke edolobheni lakhe lokuphephela, beselimvumela ukuthi aqhubeke ehlala emzini wakhe umphristi omkhulu engakafi.
33 “‘Akumelanga lingcolise ilizwe elihlala kulo ngoba igazi liyalingcolisa ilizwe+ njalo ayikho enye indlela okungahlawulelwa ngayo igazi elichithiweyo elizweni ngaphandle kokuthi kuchithwe igazi lalowo olichithileyo.+
34 Akumelanga lilingcolise ilizwe elihlala kulo, ilizwe engihlala kulo ngoba mina Jehova ngihlezi phakathi kwabantu bako-Israyeli.’”+
Amabala angaphansi
^ Ingalo yayilingana lamasentimitha angu-44,5. Khangela iSengezo ku-B14.
^ Kumbe, “umphefumulo.”
^ Kumbe, “kumphindiseli wegazi.”
^ Kumbe, “umphefumulo.”
^ Kumbe, “Umphindiseli wegazi.”
^ NgesiHebheru, “ngesikhathi emcathamele.”
^ NgesiHebheru, “engamcathamelanga.”
^ Kumbe, “umphefumulo.”
