AmaNani 36:1-13
-
Umthetho ophathelane labesifazana abazindlalifa (1-13)
36 Abakhokheli bezimuli zabosendo lukaGiliyadi indodana kaMakhiri+ indodana kaManase abezimuli zamadodana kaJosefa basondela bakhuluma phambi kukaMosi labakhokheli bako-Israyeli.
2 Bathi: “UJehova watshela inkosi yami ukuthi yabe ilizwe ngenkatho+ ukuze libe lilifa labantu bako-Israyeli njalo uJehova watshela inkosi yami ukuthi ilifa lomfowethu uZelofehadi ilinike amadodakazi akhe.+
3 Nxa abesifazana laba bangatshada lamadoda esinye isizwana sako-Israyeli, ilifa labo lalo lizathathwa lisuke elifeni labobaba bethu lifakwe elifeni lesizwana abayabe bendele kuso, lokhu kuzabangela ukuthi ilifa lelo lithathwe elifeni lethu esalabelwa ngenkatho.
4 Kuzakuthi sekungumnyaka weJubhili+ ebantwini bako-Israyeli, ilifa labesifazana laba lithathwe lengezelelwe elifeni lesizwana abayabe bendele kuso. Ngakho ilifa labo lizakhitshwa elifeni lesizwana sabobaba bethu.”
5 UMosi wasenika abako-Israyeli umlayo elandela lokho uJehova ayekutshilo, wathi: “Okutshiwo ngabesizwana samadodana kaJosefa kuqondile.
6 Nanti ilizwi elikhulunywe nguJehova mayelana lamadodakazi kaZelofehadi: ‘Angazikhethela labo afuna ukutshada labo. Kodwa kumele atshade lamadoda azalwa emulini yabesizwana sikayise.
7 Alikho ilifa labantu bako-Israyeli okumele lisuke kwesinye isizwana liye kwesinye, ngoba abako-Israyeli kufanele bagcine ilifa lesizwana sabokhokho babo.
8 Wonke amadodakazi aphiwe ilifa phakathi kwezizwana zako-Israyeli kumele atshade labantu abazalwa esizwaneni saboyise+ ukuze abantu bako-Israyeli bagcine ilifa labokhokho babo.
9 Alikho ilifa okumele lisuke kwesinye isizwana liye kwesinye, ngoba isizwana ngasinye sako-Israyeli kumele sigcine ilifa laso.’”
10 Amadodakazi kaZelofehadi enza khona kanye uJehova ayekutshele uMosi.+
11 Ngakho amadodakazi kaZelofehadi uMahila, loThiriza, loHogila, loMilikha kanye loNowa+ atshada lamadodana abafowabo bakayise.
12 Abesifazana laba baba ngamakhosikazi amadoda azalwa emulini zakoManase indodana kaJosefa ukuze ilifa labo liqhubeke lisesizwaneni sabemuli kayise.
13 Le yiyo imilayo kanye lemithetho yokwahlulela uJehova ayinika abantu bako-Israyeli esebenzisa uMosi, emagcekeni akoMowabi eduze komfula uJodani, eJerikho.+
