AmaNani 4:1-49
4 UJehova wasekhuluma loMosi lo-Aroni wathi:
2 “Kumele kubalwe amadodana kaKhohathi+ phakathi kwamadodana kaLevi kusiya ngezimuli zawo langezindlu zaboyise,
3 wonke aleminyaka engu-30+ kusiya kwengu-50+ aseqenjini elikhethwe ukuthi lisebenze etendeni lokuhlangana.+
4 “Lo ngumsebenzi ozakwenziwa ngamadodana kaKhohathi etendeni lokuhlangana.+ Umsebenzi lo ungcwele kakhulu:
5 Nxa sekufanele abantu basuke, u-Aroni lamadodana akhe bazakhipha ikhetheni+ elingaphakathi bavale ngalo ibhokisi loBufakazi.+
6 Bazalembesa ngesikhumba senyamazana yolwandle, besebeligubuzela ngelembu eliluhlaza okwesibhakabhaka bafake lezigodo zokulithwala.+
7 “Bazakwendlala ilembu eliluhlaza okwesibhakabhaka phezu kwetafula yesinkwa sokubukiswa,+ besebefaka phezu kwayo izinditshi, lamankomitsho, lemiganu kanye lamajagi eminikelo yokunathwayo.+ Isinkwa somnikelo wezikhathi zonke+ kumele sihlale siphezu kwayo.
8 Bazakwembathisa izinto lezi ngelembu elibomvu, besebezembathisa ngesikhumba senyamazana yolwandle, bafake lezigodo zokuthwala itafula.+
9 Ngemva kwalokho bazathatha ilembu eliluhlaza okwesibhakabhaka bathandele uluthi lwesibane,+ lezibane zalo,+ lendlawu zalo,* lenkezwana zokuthwala amalahle+ lazo zonke izitsha zamafutha asetshenziswa kulo.
10 Bazagoqela uluthi lwesibane lazo zonke izitsha zalo ngesikhumba senyamazana yolwandle, besebekufaka esigodweni okuzathwalwa ngaso.
11 Kanti njalo bazakwembathisa i-alithare legolide+ ngelembu eliluhlaza okwesibhakabhaka, besebeligubuzela ngesikhumba senyamazana yolwandle njalo bafake lezigodo zokulithwala.+
12 Bazathatha zonke izitsha+ abahlala bezisebenzisa nxa besenza inkonzo endaweni engcwele, bazifake elenjini eliluhlaza okwesibhakabhaka njalo bazembathise ngesikhumba senyamazana yolwandle, besebezifaka esigodweni sokuthwala.
13 “Kumele babuthe umlotha* e-alithareni+ njalo bendlale ilembu elenziwe ngewulu eyibubende* phezu kwalo.
14 Bazafaka phezu kwalo zonke izitsha abazisebenzisa nxa besenza inkonzo e-alithareni: inkezwana zokuthwala amalahle, lamafologwe, lamafotsholo, lemiganu, zonke nje izitsha ze-alithare+ njalo kumele balembathise ngesikhumba senyamazana yolwandle, bafake lezigodo zokulithwala.+
15 “U-Aroni lamadodana akhe kumele babe sebeqedile ukwembathisa indawo engcwele+ layo yonke impahla yayo nxa sekuyisikhathi sokuthi abantu basuke. Ngemva kwalokho amadodana kaKhohathi azangena azothwala izinto lezi+ kodwa akumelanga athinte indawo engcwele ngoba angafa.+ Lo kuzakuba ngumsebenzi* wamadodana kaKhohathi etendeni lokuhlangana.
16 “U-Eliyazari+ indodana ka-Aroni umphristi nguye olomsebenzi wokukhangela amafutha ezibane,+ lempepha enukelelayo,+ lomnikelo wamabele wezikhathi zonke kanye lamafutha angcwele.+ Nguye okumele akhangele lonke ithabanikeli lakho konke okukulo kanye lendawo engcwele lezitsha zayo.”
17 UJehova waqhubeka ekhuluma loMosi lo-Aroni wathi:
18 “Lingavumeli ukuthi isizwana sezimuli zamaKhohathi+ sitshabalaliswe phakathi kwamaLevi.
19 Kodwa benzeleni lokhu ukuze baqhubeke bephila njalo bangafi ngenxa yokusondela ezintweni ezingcwele kakhulu.+ U-Aroni lamadodana akhe bazangena banike ngamunye wabo umsebenzi wakhe kanye lalokho okufanele akuthwale.
20 AmaKhohathi akumelanga angene abone izinto ezingcwele loba okwesikhatshana nje, ngoba angafa.”+
21 UJehova wasekhuluma loMosi wathi:
22 “Kumele kubalwe amadodana kaGeshoni+ ngezindlu zaboyise langezimuli zawo.
23 Kumele ubhalise wonke aleminyaka engu-30 kusiya kwengu-50 aseqenjini elikhethwe ukuthi lisebenze etendeni lokuhlangana.
24 Nanzi izinto okumele abemuli yamaGeshoni bazinakekele njalo bazithwale:+
25 Bazathwala amalembu etende lethabanikeli,+ itende lokuhlangana, lesembozo salo sezikhumba zenyamazana yolwandle esiphezu kwalo,+ lekhetheni elisemnyango wetende lokuhlangana,+
26 lamakhetheni afakwe egumeni,+ lekhetheni elisegedini leguma+ eligombolozele ithabanikeli kanye le-alithare, lentambo zetende, lazo zonke izitsha kanye lakho konke okusetshenziswa enkonzweni yalo. Lo yiwo umsebenzi wabo.
27 Wonke umsebenzi ozakwenziwa ngamaGeshoni+ lezinto azazithwala, kumele kukhangelwe ngu-Aroni lamadodana akhe. Imithwalo yonke le izakuba ngumsebenzi wabo.
28 Le yiyo inkonzo okumele yenziwe ngabemuli yamaGeshoni etendeni lokuhlangana+ njalo imisebenzi yabo izakhangelwa ngu-Ithamari+ indodana ka-Aroni umphristi.
29 “Amadodana kaMerari+ kumele uwabhalise ngezimuli zawo langezindlu zaboyise.
30 Kumele ubhalise wonke aleminyaka engu-30 kusiya kwengu-50, aseqenjini elikhethwe ukuthi lisebenze etendeni lokuhlangana.
31 Nanku okufanele akuthwale+ okuphathelane lenkonzo yawo etendeni lokuhlangana: amapulanka ethabanikeli,+ lemithando yalo,+ lensika zalo,+ lezisekelo zalo,+
32 lensika+ zeguma eligombolozele ithabanikeli, lezisekelo zazo,+ lezikhonkwane zazo zetende,+ lentambo zazo zetende, layo yonke impahla yazo kanye lakho konke okuphathelane lenkonzo le. Kumele linike ngamunye lokho azakuthwala.
33 Le yiyo indlela abemuli yamadodana kaMerari+ abazasebenza ngayo etendeni lokuhlangana beqondiswa ngu-Ithamari indodana ka-Aroni umphristi.”+
34 UMosi lo-Aroni labakhokheli+ babantu bako-Israyeli basebebhalisa amadodana amaKhohathi+ ngezimuli zawo langezindlu zaboyise,
35 wonke ayeleminyaka engu-30 kusiya kwengu-50 ayeseqenjini elikhethwe ukuthi lisebenze etendeni lokuhlangana.+
36 Esewonke abhaliswayo ngezimuli zawo ayengu-2 750.+
37 Laba yibo bonke abezimuli zamaKhohathi ababhaliswayo ababesebenza etendeni lokuhlangana. UMosi lo-Aroni bababhalisa belandela lokho uJehova ayekutshele uMosi.+
38 Amadodana kaGeshoni+ abhaliswa ngezimuli zawo langezindlu zaboyise,
39 wonke ayeleminyaka engu-30 kusiya kwengu-50 ayeseqenjini elikhethwe ukuthi lisebenze etendeni lokuhlangana.
40 Esewonke abhaliswayo ngezimuli zawo langezindlu zaboyise ayengu-2 630.+
41 Laba yibo bonke abezimuli zamadodana kaGeshoni ababhaliswayo ababesebenza etendeni lokuhlangana. UMosi lo-Aroni bababhalisa belandela lokho uJehova ayekutshele uMosi.+
42 Amadodana kaMerari abhaliswa ngezimuli zawo langezindlu zaboyise,
43 wonke ayeleminyaka engu-30 kusiya kwengu-50 ayeseqenjini elikhethwe ukuthi lisebenze etendeni lokuhlangana.+
44 Esewonke abhaliswayo ngezimuli zawo ayengu-3 200.+
45 Laba yibo abezimuli zamadodana kaMerari ababhaliswayo, uMosi lo-Aroni bababhalisa belandela lokho uJehova ayekutshele uMosi.+
46 UMosi lo-Aroni labakhokheli bako-Israyeli babhalisa wonke amaLevi la ngezimuli zawo langezindlu zaboyise,
47 ayeleminyaka engu-30 kusiya kwengu-50 njalo ayekhethwe ukuthi asebenze etendeni lokuhlangana futhi athwale konke okuphathelane lalo.+
48 Esewonke abhaliswayo ayengu-8 580.+
49 Abhaliswa kulandelwa lokho uJehova ayekutshele uMosi, munye ngamunye kusiya ngomsebenzi ayewuphiwe langalokho okwakumele akuthwale, abhaliswa njengoba nje uJehova wayetshilo kuMosi.
Amabala angaphansi
^ Lapha kutshiwo insimbi yokubambisa amalahle esasigelo.
^ Kumbe, “umlotha ohlangene lamafutha.” Lapha kutshiwo umlotha owawuhlangene lamafutha emihlatshelo.
^ NgesiNgisi umbala oyibubende yi-purple.
^ Kumbe, “ngumthwalo.”
