AmaNani 6:1-27
6 UJehova waqhubeka ekhuluma loMosi wathi:
2 “Khuluma labantu bako-Israyeli uthi kubo, ‘Nxa indoda loba owesifazana angenza isifungo esiqakathekileyo sokuba ngumNaziri*+ kuJehova,
3 akumelanga anathe iwayini loba eminye imihlobo yotshwala. Akumelanga anathe iviniga enziwe ngewayini loba iviniga yeminye imihlobo yotshwala.+ Akumelanga anathe loba yini enziwe ngamagilebisi kumbe adle amagilebisi amanzi kumbe onyisweyo.
4 Kangadli loba yini evela ezihlahleni zamagilebisi kuzo zonke izinsuku zakhe zokuba ngumNaziri, kungaba ngamagilebisi angakavuthwa kumbe amakhasi akhona.
5 “‘Kuzo zonke insuku zesifungo sakhe sokuba ngumNaziri akumelanga aphuce ikhanda lakhe ngereza.+ Kumele aqhubeke engcwele ngokuyekela inwele zakhe zikhule kuze kuphele insuku zakhe zokwahlukaniselwa uJehova.
6 Kuzo zonke insuku zakhe zokwahlukaniselwa uJehova akumelanga asondele eduzane kwesidumbu somuntu.
7 Lanxa kungaze kufe uyise loba unina kumbe umfowabo loba udadewabo akumelanga azingcolise+ ngoba uphawu lokuba ngumNaziri kuNkulunkulu wakhe lusekhanda lakhe.
8 “‘Ungcwele kuJehova kuzo zonke insuku zakhe zokuba ngumNaziri.
9 Kodwa nxa kungenzakala ukuthi umuntu afe eceleni kwakhe+ njalo angcolise inwele zakhe eziluphawu lokwehlukaniselwa uNkulunkulu,* kumele aphuce ikhanda lakhe+ ngelanga azahlanjululwa ngalo. Kumele aphuce ngelanga lesikhombisa.
10 Ngelanga lesi-8 kumele alethe amajuba amabili kumbe abantwana benkwilimba ababili kumphristi emnyango wetende lokuhlangana.
11 Umphristi uzawanikela, elinye libe ngumnikelo wesono, elinye libe ngumnikelo wokutshiswa njalo uzamhlawulela ngenxa yesono sakhe+ esiphathelane lomuntu ofileyo. Ngemva kwalokho umNaziri uzangcwelisa ikhanda lakhe ngalelolanga.
12 Ngakho uzaqalisa kutsha insuku zakhe zokuba ngumNaziri kuJehova kodwa insuku ezidlulileyo azisoze zisabalwa ngoba ungcolise ubuNaziri bakhe njalo kumele alethe imvana enduna elomnyaka owodwa ibe ngumnikelo wecala.
13 “‘Nanku umthetho ophathelane lomNaziri: Nxa angaqeda insuku zakhe zokuba ngumNaziri+ kumele alethwe emnyango wetende lokuhlangana.
14 Kumele alethe umnikelo wakhe kuJehova khonapho: lmvana enduna elomnyaka owodwa engelasici eyomnikelo wokutshiswa,+ lemvana ensikazi elomnyaka owodwa engelasici eyomnikelo wesono,+ lenqama engelasici eyomhlatshelo wobudlelwano,+
15 lebhasikiti yezinkwa ezingelamvubelo eziyisigombolozi ezenziwe ngefulawa ecolekileyo ehlanganiswe lamafutha, lezinkwa ezingelamvubelo eziyisipatalala ezigcotshwe amafutha kanye lomnikelo wamabele+ lomnikelo wokunathwayo.+
16 Umphristi uzaletha izinto lezi phambi kukaJehova njalo uzanikela umnikelo wakhe wesono lomnikelo wakhe wokutshiswa.
17 Uzanikela inqama yomhlatshelo wobudlelwano kuJehova kanye lebhasikiti yezinkwa ezingelamvubelo, abeseletha umnikelo wayo wamabele+ lomnikelo wayo wokunathwayo.
18 “‘Ngemva kwalokho umNaziri kumele aphuce inwele zakhe*+ emnyango wetende lokuhlangana, abesethatha inwele lezo ezakhula ngesikhathi engumNaziri aziphosele emlilweni ngaphansi komhlatshelo wobudlelwano.
19 Umphristi kumele athathe umkhono wenqama oxhwathisiweyo,+ athathe lesinkwa esisodwa esiyisigombolozi esingelamvubelo ebhasikitini kanye lesinkwa esisodwa esiyisipatalala esingelamvubelo. Izinto lezi uzazifaka ezandleni zalowo ongumNaziri nxa esephucile inwele eziluphawu lwakhe lokuba ngumNaziri.
20 Kanti njalo umphristi kufanele azunguze izinto lezo zibe ngumnikelo wokuzunguzwa phambi kukaJehova.+ Lezi yizinto ezingcwele ezinikwa umphristi ndawonye lesifuba somnikelo wokuzunguzwa lomlenze womnikelo.+ Ngemva kwalokho umNaziri usenganatha iwayini.
21 “‘Nanku umthetho ophathelane lomNaziri+ owenza isifungo: Nxa angenza isifungo njalo esenelisa ukunikela kuJehova umnikelo owedlula lokho okukhangelelweyo kuye njengomNaziri, kumele asigcwalise isifungo asenzileyo ehlonipha umthetho wokuba ngumNaziri.’”
22 UJehova wasesithi kuMosi:
23 “Tshela u-Aroni lamadodana akhe uthi, ‘Nansi indlela okumele libusise ngayo+ abantu bako-Israyeli. Kumele lithi kubo:
24 “Kwangathi uJehova angalibusisa+ njalo alivikele.
25 Kwangathi uJehova angenza ubuso bakhe bukhazimule kini,+ sengathi angaba lomusa kini.
26 Kwangathi uJehova angakhangelisa ubuso bakhe kini, alinike ukuthula.”’+
27 Kumele babeke ibizo lami phezu kwabantu bako-Israyeli+ ukuze ngibabusise.”+
Amabala angaphansi
^ NgesiHebheru ibala leli litsho ukuthi, “okhethiweyo; onikelweyo; owahlukaniswe labanye.”
^ Kumbe, “angcolise ikhanda lakhe lobuNaziri.”
^ Kumbe, “aphuce ikhanda lobuNaziri bakhe.”
