AmaNani 9:1-23
9 UJehova wakhuluma loMosi enkangala yeSinayi ngenyanga yokuqala+ sekungumnyaka wesibili bephume elizweni leGibhithe wathi:
2 “Abantu bako-Israyeli kumele balungise umhlatshelo wePhasika+ ngesikhathi sawo esibekiweyo.+
3 Kumele liwulungise mhlaka 14 ngayonale inyanga sekuhwalala,* ngesikhathi sawo esibekiweyo. Kufanele liwulungise lilandela yonke imilayo ephathelane lawo kanye lazo zonke iziqondiso ezimayelana lawo.”+
4 Ngakho uMosi watshela abako-Israyeli ukuthi balungise umhlatshelo wePhasika.
5 Lakanye bawulungisa umhlatshelo wePhasika enkangala yeSinayi, mhlaka 14 kuhwalala, ngenyanga yokuqala. Abako-Israyeli bawulungisa belandela konke uJehova ayekutshele uMosi.
6 Kodwa kwakulabantu ababengcolile ngenxa yokuthinta isidumbu somuntu+ njalo babengenelisi ukulungisa umhlatshelo wePhasika ngalelolanga. Ngakho baya phambi kukaMosi lo-Aroni mhlalokho+
7 bathi kuye: “Singcolile ngenxa yokuthinta isidumbu. Kambe sesingaze sivinjelwe ukunikela umnikelo kuJehova ngesikhathi sawo esibekiweyo kanye labanye abantu bako-Israyeli?”+
8 UMosi wabaphendula wathi: “Manini khonapho, ngisayakuzwa ukuthi uJehova uzakuthini mayelana lani.”+
9 UJehova wasesithi kuMosi:
10 “Tshela abako-Israyeli uthi: ‘Loba ngubani phakathi kwenu loba kuzizukulwane zenu ezizalandela ozabe engcoliswe yikuthinta isidumbu+ kumbe oyabe ethethe uhambo olude, kumele awulungise umhlatshelo wePhasika owenzelwa uJehova.
11 Kumele bawulungise mhlaka 14 kuhwalala, ngenyanga yesibili.+ Kufanele bawudle kanye lesinkwa esingelamvubelo lemibhida ebabayo.+
12 Akumelanga batshiye inyama yawo kuze kube sekuseni+ njalo akumelanga bephule amathambo awo.+ Kumele bawulungise belandela yonke imilayo ephathelane lePhasika.
13 Kodwa nxa umuntu angayekela ngabomo ukulungisa umhlatshelo wePhasika yena ehlanzekile njalo engathathanga uhambo, kumele abulawe+ ngoba uyekele ukunikela umnikelo kaJehova ngesikhathi sawo esibekiweyo. Umuntu lowo uzajeziswa ngenxa yesono sakhe.
14 “‘Kanti njalo nxa kulomuntu wesinye isizwe ohlala lani, laye kumele alungise umhlatshelo wePhasika owenzelwa uJehova.+ Kumele awulungise elandela imilayo ephathelane lePhasika kanye leziqondiso ezimayelana lalo.+ Kufanele kube lomthetho owodwa kini kungelani lokuthi ngumuntu wesinye isizwe kumbe ngoyisizalwane elizweni.’”+
15 Ngelanga ithabanikeli elamiswa ngalo+ iyezi lasibekela ithabanikeli, okutsho itende loBufakazi, kodwa kusihlwa okwakubonakala angathi ngumlilo kwaqhubeka kuphezu kwalo kwaze kwasa.+
16 Lokhu yikho okwaqhubeka kusenzakala: Emini iyezi lalisibekela ithabanikeli kuthi ebusuku kube khona okungathi ngumlilo.+
17 Kwakusithi nxa iyezi lingasukuma phezu kwetende, abako-Israyeli bahle basuke bahambe+ njalo lalisithi lingama endaweni ethile abako-Israyeli bakhempe khonapho.+
18 Abako-Israyeli babesuka nxa uJehova angathi basuke njalo babekhempa nxa uJehova angathi bakhempe.+ Ingqe nje iyezi lingasukanga phezu kwethabanikeli babeqhubeka bekhempile.
19 Nxa iyezi laliqhubeka liphezu kwethabanikeli okwensuku ezinengi abako-Israyeli babelalela uJehova bangasuki.+
20 Kwezinye izikhathi iyezi lalisiba phezu kwethabanikeli okwensukwana nje. Abako-Israyeli babeqhubeka bekhempile nxa uJehova angathi bangasuki futhi nxa uJehova angathi basuke, babeqhubeka ngohambo.
21 Kwezinye izikhathi iyezi lalisima kuphela kusukela kusihlwa kuze kuse njalo lalisithi lingasukuma ekuseni basuke bahambe. Iyezi lalisithi lingasukuma kungelani lokuthi kusemini kumbe kusebusuku babesuka baqhubeke ngohambo.+
22 Nxa nje iyezi lalilokhu liphezu kwethabanikeli, kungelani lokuthi zinsuku ezimbili, yinyanga eyodwa loba ukwedlula lapho, abako-Israyeli babengasuki, babeqhubeka bekhempile. Kodwa lalisithi lingasukuma labo baqhubeke ngohambo.
23 Nxa uJehova angathi bakhempe babekhempa, nxa uJehova angathi basuke babesuka. Baqhubeka belalela uJehova njalo belandela umlayo uJehova ayebanika wona esebenzisa uMosi.
Amabala angaphansi
^ Lapha kungabe kutshiwo ngesikhathi ilanga selisiyatshona, sekuqalisa ukuba mnyama.
